ދެވަނަ ޑިވިޝަން ފުޓްބޯޅަ މުބާރާތުގައި މަސްއޮޑި ސްޕޯރޓްސް ކްލަބުން ކުޅުނު ދެވަނަ މެޗުގައިވެސް 4 ލަނޑުގެ މޮޅެއް ހޯދައިފިއެވެ.

ފުރަތަަމ މެޗު 4-0ން ކާމިޔާބުކުރި މަސްއޮޑި، ދެވަނަ މެޗުވެސް ކާމިޔާބުކުރީ އެނަތީޖާއިންނެވެ. ދެވަނަ މެޗުގައި 4-0ން ކުރިހޯދީ އެލްޓީ ސްޕޯރޓްސް ކްލަބްގެ މައްޗަށެވެ. މެޗުގެ ކޮންމެ ހާފެއްގައި މަސްއޮޑިން ދެ ލަނޑު ޖެހިއެވެ. ފުރަތަމަ ހާފްގައި ދެ ލަނޑު ޖެހީ އައްޒާމް އަބްދުﷲއާއި ފެލިކްސްއެވެ. ދެވަނަ ހާފްގައި ދެ ލަނޑު ޖެހީ އިބްރާހީމް އާޒިމާއި ސަރްދޯވްއެވެ. ދެވަނަ ހާފްގެ ދެ ލަނޑު ޖެހީ މެޗުގެ އިތުރު ވަގުތުގައެވެ. މުބާރާތުގައި ކުޅުނު ފުރަތަމަ މެޗު މަސްއޮޑިން ކާމިޔާބުކުރީ މަހިބަދޫ ސްޕޯރޓްސް ކްލަބާ ވާދަކޮށެވެ. މަސްއޮޑިއަކީ މުބާރާތަށް އެންމެ ރަނގަޅަށް ތައްޔާރުވި އެއް ޓީމެވެ.

މަސްއޮޑިއާ އެއް ގްރޫޕެއްގައި ހިމެނެނީ މަހިބަދޫއާއި, އެލްޓީ ސްޕޯރޓްސް ކްލަބާއި, ޖޭޖޭ ސްޕޯރޓްސްއާއި ކުޑަހެންވޭރެވެ. ފުރަތަމަ މެޗުގައި ކުޑަހެންވޭރުން ވަނީ 5-0ން ޖޭޖޭ ސްޕޯރޓްސް ކްލަބް ބަލިކޮށްފައެވެ.