"ރަސްވާދަ"އިގެ ގޮތުގައި ޕްރޮމޯޓްކުރި ރާއްޖޭގެ ފުޓްބޯޅައިގެ ދެބާރު ދެވަނަ ޑިވިޝަންގައި ވާދަކުރި މެޗު ނިއުރޭޑިއަންޓް ސްޕޯރޓްސް ކްލަބުން ކާމިޔާބުކޮށްފިއެވެ.

ސަސްޕެންޝަނަށްފަހު އަލުން ފުރަތަމަ ޑިވިޝަނަށް އެރުމަށް ވިކްޓްރީއާއި ނިއުރޭޑިއަންޓް ކުރަމުންދާ މަސައްކަތުގައި ދެވަނަ ޑިވިޝަންގައި ވާދަކުރި މެޗު ނިއުރޭޑިއަންޓް ކާމިޔާބުކުރީ 4-1 ނެވެ. އެއް ގްރޫޕެއްގައި ހިމެނޭ ދެޓީމްގެ މެޗު ކާމިޔާބުކޮށް ނިއުރޭޑިއަންޓުން ވަނީ ނުވަ ޕޮއިންޓާއެކު އެއްވަނައަށް ޖެހިލާފައެވެ. ނިއު ވަނީ ކުޅުނު ތިން މެޗުވެސް ކާމިޔާބުކޮށްފައެވެ. ވިކްޓްރީއަށް ތިން މެޗުން ލިބިފައިވަނީ ހަތަރު ޕޮއިންޓެވެ. އެހެންކަމުން ސެމީފައިނަލްގެ ޖާގައެއް ހޯދަން ވިކްޓްރީއަށް އޮތީ އުނދަގޫ މަރުހަލާއެކެވެ.

މިދިޔަ ތިން އަހަރަށް ބަލާއިރުވެސް ކްލަބް ފުޓްބޯޅައިގައި އެންމެ ގިނަ ސަޕޯޓަރުން ވަން މެޗުގެ ފުރަތަމަ ހާފްގައިވެސް ނިއުރޭޑިއަންޓުން ތިން ލަނޑު ޖެހިއެވެ. ފުރަތަމަ ލަނޑު ގޯލްގެ ދުރު ކަނަށް ފޮނުވާލައިގެން ކާމިޔާބުކުރީ ކުރިން ފުރަތަމަ ޑިވިޝަންގައިވެސް ނިއުއަށް ކުޅުނު އަހުމަދު ސުހެއިލްއެވެ. ނިއުރޭޑިއަންޓްގެ ދެވަނަ ލަނޑު ބިދޭސީ ފޯވާޑް ކޯފީ ޖެހީ ކީޕަރަށް އެއްވެސް ފުރުޞަތެއް ނުދީއެވެ. އެލަނޑުގައިވެސް ސުހެއިލްގެ ދައުރު ބޮޑެވެ. ތިންވަނަ ލަނޑު ފުރަތަމަ ހާފްގެ އިތުރު ވަގުތުގައި ކޯފީ ޖެހީ ސުހެއިލް ނަގައިދިން ބޯޅަ ވެއްޓިގެންފައި ބޮލުން ގޯލްގެ ތެރެއަށް ފޮނުވާލައިގެންނެވެ. މިހާފްގައި ނިއުރޭޑިއަންޓްގެ ލިޔާހުއަށް ރަނގަޅު ފުރުޞަތެއް ލިބި ބޭނުން ނުކުރެވުނެވެ. ފުރަތަމަ ހާފްގައި ނިއުގެ ގޯލާ އަމާޒުކޮށް ވިކްޓްރިއަށް ފޮނުވާލެވުނީ އެންމެ ބޯޅައެކެވެ. އެއީ ހާފް ނިމެން ދަނިކޮށް ލިބުނު ހިލޭޖެހުމަކުން ފޮނުވާލި ބޯޅައެކެވެ.

ދެވަނަ ހާފްގައި ފުރަތަމަ ލަނޑު ޖެހީ ވިކްޓްރީންނެވެ. ނިއުރޭޑިއަންޓްގެ ޕެނަލްޓީ އޭރިޔާ ތެރެއިން ކުރި ފައުލަކަށް ދިން ޕެނަލްޓީ ކާމިޔާބުކުރީ މުޙައްމަދު ކުޑޫއެވެ. ދެވަނަ ހާފްގައި ނިއުރޭޑިއަންޓުންވެސް ލަނޑު ޖެހީ ޕެނލްޓީއަކުންނެވެ. އެއީ ޝަމްވީލް މުޙައްމަދު ވިކްޓްރީގެ އޭރިޔާ ތެރެއިން ދެ ކުޅުންތެރިން ކައިރިން ނައްޓާލިފަހުން ކުރި ފައުލަށް ދިން ޕެނަލްޓީއަކުންނެވެ. ޕެނަލްޓީ ކާމިޔާބުކުރީ މިޑްފީލްޑަރ ޓޮރިކްއެވެ. އޭގެކުރިން އޭނާއަށް ހުސްކޮށް ލިބުނު ފުރުޞަތު ބޭކާރުވީ ކީޕަރު ކައިރިންވެސް ނައްޓާލުމަށްފަހު ކޮއްޓަން އުޅުމުންނެވެ.

މިއީ 2018 ވަނަ އަހަރުގެ ފަހުން ވިކްޓްރީއާއި ނިއުރޭޑިއަންޓްގެ ފުރަތަމަ ކުރިމަތިލުމެވެ. މިމޮޅާއެކު ސެމީފައިނަލްގެ ފުރުޞަތު ނިއުރޭޑިއަންޓަށް ބޮޑެވެ.