ދެވަނަ ޑިވިޝަން މުބާރާތް އެފްއޭއެމް އިން އަނެއްކާވެސް ފަސްކޮށްފި! ގެއްލުން ކްލަބްތަކަށް!

ދެވަނަ ޑިވިޝަން ފުޓްބޯޅަ މުބާރާތް ފެށުން އެފްއޭއެމްއިން އަނެއްކާވެސް ފަސްކޮށްފިއެވެ.

ބުރާސްފަތި ދުވަހުގެރޭ އެއިދާރާއިން ފޭސްބުކް ޕޭޖް މެދުވެރިކޮށް އިއުލާންކޮށްފައިވާ ގޮތުން މުބާރާތް ފަށާނީ ޑިސެމްބަރު 10 ވަނަ ދުވަހުއެވެ. ނަމަވެސް ބުރާސްފަތި ދުވަހުގެރޭ އެންމެ ފުރަތަމަ ކުރި ޕޯސްޓްގައި ބުނެފައިވަނީ މުބާރާތް ފަށާނީ ނޮވެމްބަރު 25 ގައި ކަމަށެވެ. އޭގެ ކުރިން ކްލަބްތަކަށް އަންގަމުން ދިޔައީ ނޮވެމްބަރު 20 ވަނަ ދުވަހު މުބާރާތް ފަށާނެ ކަމަށެވެ. މީޑިޔާއަށް މައުލޫމާތު ދޭ ގްރޫޕްގައި ވެސް މީގެ ކުރިން އެފްއޭއެމް އިން ވަނީ ނޮވެމްބަރު 20 ގައި މުބާރާތް ފަށާނެ ކަމަށެވެ.

ދެވަނަ ޑިވިޝަނަށް އެންމެ ފުރަތަމަ ޕްރެކްޓިސް ފެށި ނިއުރޭޑިއަންޓާއި, ވިކްޓްރީން ޕްރެކްޓިސް ފެށިއިރުވެސް ބުނީ ނޮވެމްބަރު 20 ގައި މުބާރާތް ފަށާނެކަމަށް އަނގަބަހުން އަންގާފައި ވާކަމަށެވެ. ނަމަވެސް އޭރުވެސް ނިއުރޭޑިއަންޓްގެ ކޯޗު އަހުމަދު ނިމާދު ބުނަމުން އައީ އެއީ އަނގަބަހުން އޮތް, ރަސްމީ ކުރުމެއް ނެތް އެންގުމަކަށްވާތީ ކަންބޮޑުވުން އެބައޮތް ކަމަށެވެ.

މުބާރާތުގެ ތާރީޚަށް ގެނައި ބަދަލާ ގުޅިގެން ކްލަބްތަކުން ޑިސެމްބަރުގެ ނިޔަލަށް ބިދޭސީ ކުޅުންތެރިންނާއެކު ހެދި އެއްބަސުވުން ޖެނުއަރީގެ ނިޔަލަށް އިތުރު ކުރަން ޖެހި, ޚަރަދު އެތަށް ތަނަކުން ބޮޑުވާނެއެވެ. ޕްރެކްޓިސް ފެށި ބައެއް ކްލަބްތަކުން މިހާރު ކުޅުންތެރިންނާއެކު އެއްބަސްވުން ހަދާފައިވަނީ ސެޕްޓެމްބަރުން ޑިސެމްބަރަށެވެ.

އެފްއޭއެމްއިން ރާވާ ހިންގާ ހަރަކާތްތައް ފަށާނެކަމަށް, ނިމޭނެކަމަށް ބުނާ ތާރީޚުތަކަކީ ވެސް އިތުބާރެއް, ޔަޤީންކަމެއް ނެތް އެއްޗަކަށް ވަނީ ވެފައެވެ. ދިވެހި ޕްރިމިއަރ ލީގު އަލުން ފަށާނެ ތާރީޚެއް ވެސް ނޭންގެއެވެ.