އަލުން ފުރަތަމަ ޑިވިޝަންގެ ޖާގަ ހޯދަން ކުރާ މަސައްކަތުގައި އޮތް ވަރުގަދަ ރޫހު ދަމަހައްޓާ, ނިއުރޭޑިއަންޓުން ހަތަރު ވަނަ މޮޅު ހޯދައިފިއެވެ.
ދެވަނަ ޑިވިޝަންގެ ގްރޫޕް ސްޓޭޖްގައި މިހާތަނަށް ނިއުރޭޑިއަންޓް ކުޅުނީ ހަތަރު މެޗެވެ. ހަތަރު މެޗުންވެސް މޮޅުވެ 12 ޕޮއިންޓާއެކު ނިއުރޭޑިއަންޓް އޮތީ ގްރޫޕްގެ އެއްވަނާގައެވެ. ހަތަރު ވަނަ މެޗުގައި ބުރާސްފަތި ދުވަހުގެރޭ ކުރި ހޯދީ ކުރިން ފުރަތަމަ ޑިވިޝަންގައި ވާދަކުރި ބީޖީއާ ވާދަކޮށް 2-0 ނެވެ. މެޗުގެ ފުރަތަމަ ހާފްގައި ނިއުރޭޑިއަންޓްގެ ފުރަތަމަ ލަނޑު ޖެހީ ކޯފީއެވެ. ދެވަނަ ހާފްގައި ދެވަނަ ލަނޑު ޖެހީ ލިޔާހުއެވެ. މުޅި މެޗުގައި ނިއުރޭޑިއަންޓުން ލަނޑު ޖަހާނެ ރަނގަޅު ފުރުޞަތުތަކެއް ހޯދިނަމަވެސް, ގިނަ ފުރުޞަތުތައް ގޯލަކަށް ބަދަލުކޮށް ނުލެވުނެވެ. އެކަމަކު މެޗުން މޮޅުވުމުން ނިއުރޭޑިއަންޓް އޮތީ ސެމީފައިނަލްގެ ޖާގައަކާ ގާތުގައެވެ.
ނިއުރޭޑިއަންޓް ހިމެނޭ ގްރޫޕްގެ ދެވަނާގައި އޮތީ ދިހަ ޕޮއިންޓާއެކު އެލްޓީ ސްޕޯރޓްސް ކްލަބެވެ. އެލްޓީއަށް ކުރިއަށް އޮތީ ނިއުރޭޑިއަންޓް މެޗެވެ. ތިންވަނާގައި އޮތީ ހަ ޕޮއިންޓާއެކު ޓީނޭޖެވެ. ވިކްޓްރީ އޮތީ ހަތަރު ޕޮއިންޓާއެކު ހަތަރު ވަނާގައެވެ. ފަސްވަނާގައި އޮތީ މަހިބަދޫއެވެ. އެއީ ތިން ޕޮއިންޓާއެކުއެވެ. މަހިބަދޫއަށް ކުރިއަށް ނިއުރޭޑިއަންޓް މެޗު އެބައޮތެވެ.
