އަޒްމީން އިސްތިއުފާދެއްވާފައިވާ ކަމަށް ބުނާ "ފޭކު" ލިޔުމުގެ މައްސަލަ ފުލުހުން ބަލަން ފަށައިފި

ކުލަބު ވެލެންސިއާގެ ޗެއާމަންކަމުގެ މަޤާމުން ޢަބްދުﷲ އަޒްމީން އިސްތިއުފާ ދެއްވާފައިވާ ކަމަށް ބުނެ ފޭކު ލިޔުމެއް ހުށަހެޅި މައްސަލަ ވެލެންސިއާއިން ދިވެހި ފުލުހުންނަށް ހުށަހަޅައިފި އެވެ.

މި މަހުގެ 31 ވަނަ ދުވަހު އޮންނަ ފުޓުބޯޅަ އެސޯސިއޭޝަން މޯލްޑިވްސް (އެފްއޭއެމް)ގެ އިންތިޚާބުގައި ކުލަބު ވެލެންސިއާ އިން ތާއީދު ކުރަނީ، އެފްއޭއެމްގެ ކުރީގެ ރައީސް އަޙުމަދު ޠާރިޤް (ޓޮމް) އަށެވެ. ނަމަވެސް އެ އިންތިޚާބުގައި ވާދަކުރައްވާ ކުލަބު އީގަލްސްގެ ވައިސް ޗެއާމަން، މުފާވިޒް ހާޝިމް (މުފާ) އަތުގައި ވެސް ވެލެންސިއާގެ ތާއީދު ސިޓީއެއް އޮތެވެ. ނަމަވެސް ވެލެންސިއާ އިން ބުނީ އެއީ އެ ކުލަބުގެ ނަމުގައިވާ ފޭކު ލިޔުމެއް ކަމަށެވެ.

ކްލަބު ވެލެންސިއާގެ ޗެއާމަންކަމުން އަޒްމީން އިސްތިއުފާ ދެއްވާފައިވާ ކަމަށް ބުނެ އެފްއޭއެމަށް ލިޔުމެއް ފޮނުވާފައި މައްސަލައިގައި، އެ ކުލަބުގެ ޗެއާމަން އަޒްމީން ވިދާޅުވީ، އެއީ ފޭކު ލިޔުމެއް ކަމަށާއި، އެ މަގާމުން އިސްތިއުފާ ނުދެއްވާ ކަމަށެެވެ. އަޒްމީން ފާހަގަ ކުރެއްވި ގޮތުގައި މަގާމުން އިސްތިއުފާ ދޭ ނަމަ، އެކަން އަންގަން ޖެހޭނީ ކޮމިޝަނަރ އޮފް ސްޕޯޓްސް އަށެވެ. އަޒްމީން ވިދާޅުވީ މިހާރު އެ މައްސަލަ ފުލުހުންނަށް ހުށަހަޅުއްވާފައިވާ ކަމަށެވެ.

މިކަމާ ގުޅިގެން ރާއްޖެ އެމްވީން ސުވާލު ކުރުމުން ފުލުހުން ބުނީ، ވެލެންސިއާގެ ފަރާތުން އެ އިދާރާ އަށް މައްސަލަ ހުށަހަޅާފައިވާ ކަމަށެވެ. އަދި އެ މައްސަލަ ތަހުގީގު ކުރަމުންގެންދާ ކަމުގައި ވެސް ފުލުހުން ވަނީ ބުނެފަ އެެވެ.

ކުލަބު ވެލެންސިއާގެ ތާއީދު އޮތީ ޓޮމް އަށް ކަމަށް ބަޔާންކޮށް، އެ ކުލަބުން ވަނީ އެފްއޭއެމްގެ އިލެކްޓޯރިއަލް ކޮމެޓީ އަށް ވެސް އެކަން އަންގައިފަ އެވެ. އަދި ޓޮމް އަށް އޮތް ތާއީދު ސިޓީ ފިޔަވައި، ދެން އޮތް ސިޓީ އަކީ އަސްލެއް ނޫން ކަމަށް ވެސް ބުނެފައިވެ އެވެ.