ވަޒީފާ ގެއްލޭފަރާތްތަކުގެ އިންޝުއަރެންސްގެ ބިލް އަލުން މަޖިލީހަށް ހުށަހެޅުމަށް ފައްޔާޒް ގޮވާލައްވައިފި

ސަރުކާރުން އަނބުރާ ގެންދިޔަ، ވަޒީފާ ގެއްލޭ ފަރާތްތަކުގެ އިންޝުއަރެންސްގެ ބިލް އަލުން ރައްޔިތުން މަޖިލީހަށް ހުށަހެޅުމަށް، ކުރީގެ އިކޮނޮމިކް މިނިސްޓަރު ފައްޔާޒް އިސްމާއީލް ގޮވާލައްވައިފިއެވެ.

ކުރީގެ ރައީސް އިބްރާހީމް މުހައްމަދު ސާލިހުގެ ވެރިކަމުގައި ހުށަހެޅި، މަސައްކަތުގެ މާހައުލުގެ ރައްކާތެރިކަމުގެ ބިލު ފާސްކުރުމާއެކު، ރައީސް ޑރ. މުހައްމަދު މުއިއްޒު އަންގާރަ ދުވަހު ވަނީ އެ ބިލު ތަސްދީގު ކުރައްވާފައެވެ.

އެކަމާ ގުޅޭގޮތުން ފައްޔާޒު ވިދާޅުވީ މިއީ ވަރަށް އުފާވެރި، ތާރީޚީ ދުވަހެއް ކަމަށެވެ. އެގޮތުން ޔޫނިއަން ގާނޫނުގެ އިތުރުން މަސައްކަތުގެ މާހައުލުގެ ރައްކާތެރިކަމުގެ ގާނޫނު ވުޖޫދަށް އައުމަކީ، ރާއްޖޭގެ އިޖުތިމާއީ އަދި އިގުތިސާދީ ދާއިރާއަށް ލިބޭ ވަރަށް ބޮޑު ކުރިއެރުމެއް ކަމަށެވެ. މިއީ މުޅި މާހައުލު ބަދަލުކޮށްލާނޭ ދެ ގާނޫނު ކަމަށާއި، ބާކީ އޮތީ ޔޫއީއައި ބިލުގައިކަން ފައްޔާޒު ފާހަގަކުރެއްވިއެވެ.

ފައްޔާޒު ވިދާޅުވީ މަސައްކަތްތެރިންގެ ހައްގުތައް ލިއްބައިދީ، އެ ހައްގުތައް ރައްކާތެރިކުރުމަށް ކުރެވުނު މަސައްކަތް ކާމިޔާބުކޮށް، އެ ބިލް ވުޖޫދުކުރަން ކެރުނީ އެމްޑީޕީ ސަރުކާރަށާއި މަޖިލީހަށް ކަމަށެވެ. ފައްޔާޒު ވިދާޅުވީ މަސައްކަތްތެރިންގެ ހައްގުގެ އިތުރުން އިންސާފުގެ ދަތުރުގެ މިހިސާބަށް އާދެވުނުއިރު މިނިމަމް ވޭޖް ގާއިމުކުރެވި، ޔޫނިއަން އުފެއްދުމުގެ ހައްގު ކަށަވަރުކުރެވިފައި ވާކަމަށެވެ. މި ދަތުރުގައި އުފުލަންޖެހުނު ތަކުލީފަށްވުރެ މި ކާމިޔާބީގެ ހިތްހަމަޖެހުމާއި އުފާވެރިކަން ބޮޑުކަމަށް ފައްޔާޒު ވިދާޅުވިއެވެ.

މިއަދު މަސައްކަތްތެރިންގެ ހައްގުތައް ހިމާޔަތްކުރެވޭނެ ވަށާޖެހޭ ގާނޫނީ އޮނިގަނޑު ފުރިހަމަކުރެވިފައި ވާކަން ފާހަގަކުރައްވައި ފައްޔާޒު ވިދާޅުވީ، ރައީސް މުއިއްޒުގެ ސަރުކާރުން އަނބުރާ ގެންދިޔަ ވަޒީފާ ގެއްލޭފަރާތްތަކުގެ އިންޝުއަރަންސްގެ ބިލް އަލުން މަޖިލީހަށް ފޮނުވަންޖެހޭ ކަމަށެވެ.

ވަޒީފާ ގެއްލޭ ފަރާތްތަކަށް މާލީ އެހީތެރިކަން ފޯރުކޮށްދިނުމަށް އެމްޑީޕީ ސަރުކާރުން ބިލެއް ހުށަހެޅީ މިދިޔަ ނޮވެމްބަރު މަހުގެ ތެރޭގައެވެ. އެ ބިލުގައި ވަނީ ވަޒީފާ ގެއްލިފައި ތިބޭ މީހުންނަށް "ޖޮބް ސަރޗް" އެލަަވަންސެއް ދޭން ހުށަހަޅާފައެވެ. އެ އެލަވަންސް ދެނީ، ވަޒީފާ ގެއްލުނުއިރު ލިބެމުންދިޔަ ޕެންޝަނަށް ބަލައި، މުސާރައިގެ 70 އިންސައްތައެވެ. ނަމަވެސް މި ސަރުކާރުން ވަނީ އެ ބިލު އަނބުރާ ގެންގޮސްފައެވެ.