ވިލިމާލޭ ރައްޔިތުންނަށް އޮޅުވާލުމަށް ސަރުކާރުން ވަނީ މަސައްކަތްތަކެއް ފަށާފައި: އާޒިމް

ވިލިމާލޭ ރައްޔިތުންގެ އޮޅުވާލުމަށް ސަރުކާރުން މަސައްކަތްތަކެއް ފަށާފައިވާކަމަށް، މާލެ ސިޓީ މޭޔަރުކަމަށް ވާދަކުރައްވާ އެމްޑީޕީ ކެންޑިޑޭޓު އާދަމް އާޒިމް ވިދާޅުވެއްޖެއެވެ.

އާޒިމް އެކްސްގައި ކުރައްވާފައިވާ ވީޑިއޯއެއްގައި ވިދާޅުވީ، މާލެއެކޭ އެއްގޮތަށް ވިލިމާލޭގެ މުނިސިޕަލް ސަރވިސްތަކާއި އަދި އެހެން ހުރިހާ ކަންތައްތަކަށް ވަރަށް ބޮޑަށް އިހުމާލުވެފައި ވާކަމަށެވެ.

އާޒިމް ވިދާޅުވީ ވިލިމާލެއަށް އައިސް ރައްޔިތުންނާ ބައްދަލުކޮށް މައްސަލަތައް ފާހަގަކުރަމުންދާތީ، ސަރުކާރުގެ ވަރަށް ބޮޑު ސަމާލުކަމެއް ވިލިމާލެއަށް ލިބިފައިވާކަމަށާއި، އެކަމާ އުފާކުރައްވާ ކަމަށެވެ. އަދި ވިލިމާލެއަށް އެއްވެސް ވަރަކަށް ސަރުކާރުން އަޅާނުލާކަން ރައްޔިތުން ވަރަށް ބޮޑަށް ފާހަގަކޮށްފައިވާކަމަށް އާޒިމް ވިދާޅުވިއެވެ.

އާޒިމް ވިދާޅުވީ ވިލިމާލޭގައި ރަނގަޅުކުރަން ހުރި ކަންކަން މިހާރުވެސް ރަނގަޅުކުރެވޭނެ ކަމަށާއި، މަސައްކަތްތައް ފެށުމަށް އެއް އަހަރު މަޑުކުރަން ނުޖެހޭކަމަށެވެ.

އެގޮތުން ވިލިމާލޭގެ ހޮސްޕިޓަލުގައި ޑޮކްޓަރުން ނުތިބޭ މައްސަލައާއި، ފެނާއި ކަރަންޓުގެ ޚިދުމަތްތައް ރަނގަޅުކުރެވޭނެކަން އާޒިމް ފާހަގަކުރެއްވިއެވެ. އަދި ވިދާޅުވީ ވިލިމާލޭ ރައްޔިތުންގެ ކަންބޮޑުވުންތަކުގެ ވާހަކަ މީޑިއާގައި ދައްކަވަން ފެއްޓެވުމުން ސަރުކާރުން ދަޅަދައްކައި، ރައްޔިތުންނަށް އޮޅުވާލަން ކަންތައްތަކެއް ކުރަން ފަށާފައިވާ ކަމަށެވެ. ނަމަވެސް އެކަން މިއަދު ކާމިޔާބު ނުވާނެކަމަށާއި، ރައްޔިތުން މިހާރު ވަރަށް ބޮޑަށް ހޭލުންތެރިވެފައި ވާކަަމަށް އާޒިމް ވިދާޅުވިއެވެ.