މަޖިލިސް އިންތިހާބު ބާއްވާނެ ތާރީހެއް އަންނަ ހަފްތާގައި އިއުލާންކުރާނެ ކަމަށް އިލެކްޝަންސް ކޮމިޝަންގެ ނައިބު ރައީސް އިސްމާއިލް ހަބީބު ވިދާޅުވެއްޖެއެވެ.

ރާއްޖެއެމްވީއަށް މައުލޫމާތު ދެއްވަމުން އިލެކްޝަންސް ކޮމިޝަންގެ ނައިބްރައީސް އިސްމާއިލް ހަބީބު ވިދާޅުވީ މަޖިލިސް އިންތިހާބުގެ ތާރީހް ކަނޑައެޅުމާއި ގުޅޭގޮތުން ބޭއްވި ކޮމިޝަންގެ ބައްދަލުވުމުން ނިންމާފައިވަނީ، މަޖިލިސް އިންތިހާބު ބާއްވާނެ ތާރީހެއް އާދީއްތަ ދުވަހު އިއުލާންކުރައްވާނެ ކަމަށެވެ.

އިލެކްޝަންސް ކޮމިޝަނުން ވަނީ ރައްޔިތުންގެ މަޖިލީހުގެ އިންތިޚާބު 2024 ގައި ވާދަކުރާ ކެންޑިޑޭޓުންނާއި، ކެންޑިޑޭޓުންގެ އިންތިޚާބީ އޭޖެންޓުންގެ ކުށާއި، ދަރަނީގެ ރެކޯޑު ސާފުކުރުމުގައި، ފަސޭހަ ކަމާއި، އިތުބާރާއި ޔަގީންކަމާއެކު، ކުށާއި ދަރަނީގެ ރެކޯޑް ސާފުކުރުމަށް، އެކޮމިޝަނުން، ޑިޕާޓްމަންޓް އޮފް ޖުޑީޝަލް އެޑްމިނިސްޓްރޭޝަނާއި، މޯލްޑިވްސް އިންލަންޑް ރެވެނިއު އޮތޯރިޓީގެ އިސް ބޭފުޅުންނާއެކު މަޝްވަރާކޮށްފައެވެ.

ރައްޔިތުންގެ މަޖިލީހުގެ މިނިވަން މުއައްސަސާތަކުގެ ކޮމިޓީގައި އީސީން އެދިފައިވަނީ މަޖިލިސް އިންތިޚާބުގެ ތާރީޚު ކަނޑައެޅުމަކީ ކޮމިޝަނުގެ ކަމެއްގެ ގޮތުގައި ކޮމިޓީން ނިންމަވައިދެއްވުމަށެވެ. އެގޮތުން އިންތިޚާބު ފަސްކުރާނަމަ މައްސަލަތައް ދިމާވާ ކަމަށާއި، އެހެންކަމުން އަދި ދުވަހެއް ކަނޑަނާޅާކަމަށް އީސީގެ ރައީސް ވިދާޅުވެފައިވެއެވެ.

މަޖިލިސް އިންތިޚާބުގެ ވޯޓުލުން ރޯދަމަހަށްފަހު ބާއްވަން އީސީއަށް ހުށަހެޅުމަށް، ރައްޔިތުންގެ މަޖިލީހުގެ މިނިވަން މުއައްސަސާތަކާބެހޭ ކޮމިޓީން ފާސްކޮށްފައިވަނީ 26 ނޮވެންބަރު 2023 ވީ އާދިއްތަ ދުވަހެވެ.

ހަބީބު ވިދާޅުވީ އިންތިހާބު ބާއްވާނީ ރޯދައިގެ ކުރިންތޯ ނުވަތަ ފަހުންތޯ އަދި އެކަމާއި ގުޅުންހުރި ކަންކަމާއި މެދު މަޝްވަރާކޮށް ދިރާސާތަކެއް ހަދާފައިވާ ކަމަށެވެ. އަދި އިންތިހާބު ބާއްވާނެ ތާރީހެއް ހާމަކުރާނީ އާދީއްތަ ދުވަހު ކަމަށެވެ.