ގޭންގްތަކާ ގުޅިގެން ކުށްކުރާ ކުޑަކުދިން ނަގައި، އެ ކުދިން ރިހެބިލިޓޭޓް ކުރުމުގެ މަޝްވަރާތައް ދަނީ ކުރަމުން - ސީޕީ
31 ޑިސެމްބަރު 2023 | އާދީއްތަ 14:1418 އަހަރު ނުފުރޭ ކުދިން ގޭންގްތަކަށް ވައްދާކަން ފުލުހުންނަށް ލިބޭ މައުލޫމާތުތަކުން އެނގޭ
ކޮމިޝަނަރ އޮފް ޕޮލިސް، އަލީ ޝުޖާއު
ގޭންގްތަކާއި ގުޅިގެން ކުށްކުރާ ކުޑަކުދިން ނަގާ، އެ ކުދިން ރިހެބިލިޓޭޓް ކުރުމުގެ މަޝްވަރާތައް ދަނީ ކުރަމުންކަމަށް, ކޮމިޝަނަރ އޮފް ޕޮލިސް (ސީޕީ) އަލީ ޝުޖާއު ވިދާޅުވެއްޖެއެވެ.
އާދިއްތަ ދުވަހު ފުލުހުން ބޭއްވި ނޫސްވެރިންގެ ބައްދަލުވުމުގައި ވާހަކަފުޅުދައްކަވަމުން، މަސްތުވާތަކެތީގެ މައްސަލަ ހައްލުކުރުމަށާއި، ކުށްކުރާ ގްރޫޕްތަކުގެ ކިބައިން މުޖުތަމައު ސަލާމަތްކުރުމަށްޓަކައި މަސައްކަތްތަކެއް ކުރައްވާނެކަން ސީޕީ ވަނީ ފާހަގަކުރައްވާފައެވެ. އެކަން ހާސިލްކުުރުމަށްޓަކައި، ވަށާޖެހޭ މަސައްކަތްތަކެއް ކުރަންޖެހޭ ކަމަށް އޭނާ ވަނީ ވިދާޅުވެފައެވެ. ޝުޖާއު ވިދާޅުވީ މިހާތަނަށްވެސް އެފަދަ މަސައްކަތްތައް ކުރެވިގެން އައީ ވަރަށް ބޮޑަށް ރާވައިގެން ކަމަށެވެ. އެހެންނަމަވެސް އެކަމުން އާއްމުން އެންމެ ބޭނުންވާ ނަތީޖާ ހާސިލްކުރެވިފައި ނުވާކަން ޝުޖާއު ފާހަގަކުރެއްވިއެވެ. އެހެންކަމުން ވަށާޖެހޭގޮތަށް މަސައްކަތް ނުކޮށް، އެކަމުން ނަތީޖާ ހާސިލްނުކުރެވޭނެ ކަމަށް ޝުޖާއު ވިދާޅުވިއެވެ.
ގޭންގްތަކާ ގުޅިގެން ކުށްކުރާ ކުޑަކުދިން މަދުކުރުމަށް މަސައްކަތްކުރާނެ ގޮތަށް އޭނާ ވަނީ އަލިއަޅުއްވާލައްވާފައެވެ. ކުށްކުރާ ގްރޫޕްތަކުގެ ބިރުވެރިކަން، ގްރޭޓަރ މާލެއާއި ބޮޑެތި ސިޓީތަކަށް އޮތްކަމަށްވެސް ސީޕީ ވިދާޅުވިއެވެ. ޚާއްސަކޮށް 18 އަހަރު ނުފުރޭ ކުދިން ގޭންގްތަކަށް ވައްދާކަން ފުލުހުންނަށް ލިބޭ މައުލޫމާތުތަކުން އެނގޭކަމަށް އޭނާ ވިދާޅުވިއެވެ. ވީމާ މި ފަދަ ގްރޫޕުތަކަށް އަމާޒުކޮށްގެން ކަންކަން އެންފޯސްކުރުމުގެ އިތުރުން، މި ކަމުގައި އުޅޭ ކުޑަކުދިން ޑިޕާޓްމަންޓް އޮފް ޖުވެނައިލް ޖަސްޓިސްއާ ގުޅިގެން ނަގާނެކަމަށް ސީޕީ ވިދާޅުވިއެވެ. ހަމައެހެންމެ އެ ޑިޕާޓްމަންޓުގެ ދަށުން މި ފަދަ ކުދިން ރިހެބިލިޓޭޓްކުރުމުގެ މަޝްވަރާތައް ކުރިއަށްދާ ކަމަށް ވިދާޅުވިއެވެ.
ހަމައެއާއެކު މަސްތުވާތަކެތި އެތެރެކޮށް، އެ ތަކެތި ވިއްކުމާއި އޭގެ ބޭނުންކުރާ ބިދޭސީންގެ މައްސަލަތައް ބަަލައި ނިމުމުން، މޯލްޑިވްސް އިމިގްރޭޝަނާ ގުޅިގެން ބިދޭސީންގެ ކަންކަން ހައްލުކުރުމަށް މިހާރަށްވުރެ ބޮޑަށް މަސައްކަތް ކުރެވޭނެ ކަމަށް ވިދާޅުވިއެވެ. އަދި ރާއްޖެއަށް މަސްތުވާތަކެތި އެތެރެކުރާ ޑްރަގް ނެޓްވޯރކްތަކުގެ ބޮޑުންނާއި މިކަމުން ނަފާލިބޭ އެންމެން ހޯދައި، އަދި ރާއްޖޭގެ މީހުން ދިރިއުޅޭ ރަށްރަށަށް ބަނގުރާ އެތެރެކުރާ ސަފާރީތައް ހޯދައި ފިޔަވަޅު އެޅުމުގައި ކުރަންޖެހުނު ކޮންމެ މަސައްކަތެއް ފުލުހުން ސާބިތުކަމާއެކު ކުރަމުންދާނެ ކަމަށްވެސް ވިދާޅުވިއެވެ.
