ސްޕާތަކުގެ ނަމުގައި ހިންގާ ފާހިޝް އަމަލުތައް ހުއްޓުވުމަށް ވަނީ ޚާއްސަ މަސައްކަތްތަކެއް ފެށިފައި: ސީޕީ
ނަފާ ލިބޭ މީހުން ހޯދައި، ފިޔަވަޅު އަޅާނެ
ކޮމިޝަނަރ އޮފް ޕޮލިސް، އަލީ ޝުޖާއު
ސްޕާތަކުގެ ނަމުގައި ހިންގާ ފާހިޝް އަމަލުތައް ހުއްޓުވުމަށް ޚާއްސަ މަސައްކަތްތަކެއް ފަށާފައިވާކަމަށް، ކޮމިޝަނަރ އޮފް ޕޮލިސް (ސީޕީ) އަލީ ޝުޖާއު ވިދާޅުވެއްޖެއެވެ.
އާދިއްތަ ދުވަހު ފުލުހުން ބޭއްވި ނޫސްވެރިންގެ ބައްދަލުވުމުގައި ސީޕީ ވިދާޅުވީ، ގްރޭޓަރ މާލެ ސަރަހައްދުގެ ސްޕާތަކުގެ ނަމުގައި ހިންގާ ފާހިޝް އަމަލުތައް ހުއްޓުވުމަށް ޚާއްސަ މަސައްކަތްތަކެއް ފަށާފައިވާކަމަށެވެ.
އެގޮތުން އެފަދަ ވިޔަފާރިތައް ހިންގާ މީހުންނާއި، އެކަމުން ނަފާ ލިބޭ މީހުން ހޯދައި، ފިޔަވަޅު އަޅާނެކަމަށް ސީޕީ ވިދާޅުވިއެވެ.
ކުޑަކުދިންނާއި، އަންހެނުންނަށް ކުރާ އަނިޔާއަށް އިޝާރާތް ކުރައްވައި ސީޕީ ވިދާޅުވީ، މިފަދަ އަނިޔާތަކުގެ މައްސަލަތަކާމެދު އަޅައިނުލާ ދޫކޮށްނުލާނެ ކަމަށާއި، މިފަދަ މައްސަލަތަކަށް ޚާއްސަ ސަމާލުކަމެއް ދޭނެކަމަށެވެ.
މީގެ އިތުރުން ސީޕީ ވިދާޅުވީ ޓެރަރިޒަމްގެ އަމަލުތައް ހުއްޓުވުމަށްވެސް ފުލުހުންގެ ހުރިހާ ރިސޯސްތަކެއް ބޭނުންކުރާނެ ކަމަށެވެ.
ސީޕީ ވިދާޅުވީ މުޖުތަމައުގެ ސަލާމަތާއި ރައްކާތެރިކަން ކަށަވަރުކުރާނެ ކަމަށާއި، ސައިބަރ ކްރައިމް، ފައިނޭންޝަލް ކްރައިމް، އަދި ސްކޭމްގެ މައްސަލަތައް ޚާއްސަ ސަމާލުކަމެއްދީގެން މަސައްކަތްތައް ކުރާނެ ކަމަށެވެ. މިކަންކަމަށް ވިކްޓިވައިޒްވާ ފަރާތްތަކަށް ލިބޭ ގެއްލުންތައް ކުޑަކުރާނެ ކަމަށް ސީޕީ ވިދާޅުވިއެވެ.
ގިނަ މަސައްކަތްތަކެއް ކުރާނެކަމަށް ސީޕީ ވިދާޅުވިނަމަވެސް، މަސައްކަތްތައް ކުރިއަށް ގެންދާ ގޮތުގެ ތަފްސީލެއް ހާމަކޮށްފައިނުވެއެވެ.
