ކެނެބިސް ޓްރެފިކް ކުރުމުގެ ކުށް ސާބިތުވި މީހަކު އުމުރަށް ޖަލަށްލައި، އެއްލައްކަ ރުފިޔާއިން ޖޫރިމަނާކޮށްފި
ކްރިމިނަލް ކޯޓުގައި މި ޙުކުމް ކުރެއްވީ ގާޒީ އަލީ އާދަމް
ފުލުހުން ހިންގި އޮޕަރޭޝަނެއްގެ ތެރެއިން ނަގާފައިވާ ފޮޓޯއެއް
ކެނެބިސް ޓްރެފިކް ކުރުމުގެ ކުށް ސާބިތުވި މީހަކު އުމުރަށް ޖަލަށް ލުމާއެކު، އެއްލައްކަ ރުފިޔާއިން ޖޫރިމަނާ ކުރުމަށް ކްރިމިނަލް ކޯޓުން ޙުކުމްކޮށްފިއެވެ.
މި މައްސަލައިގައި ދައުލަތުން ދައުވާކޮށްފައިވަނީ ލ ގަން ތުނޑި، އަމްސާޕެލަސް ސައިފުﷲ ސައީދުގެ މައްޗަށެވެ.
އޭނާގެ މައްޗަށް ދައުވާކޮށްފައިވަނީ ކޮންޓްރޯލް ޑެލިވަރީ އޮޕަރޭޝަނެއްގެ ތެރެއިން ހިންގި ތަހުގީގަކަށްފަހުއެވެ.
ކޮންޓްރޯލް ޑެލިވަރީ އޮޕަރޭޝަނަކީ ރާއްޖެއަށް އެތެރެކުރާ މަސްތުވާތަކެތި، ނުވަތަ ރާއްޖޭގެ ސަރަޙައްދުގައި ވިއްކުމަށް އެއްތަނުން އަނެއްތަނަށް ގެންދެވޭ މަސްތުވާތަކެތި ޓްރެފިކް ކުރާ މައި ފަރާތްތައް ދެނެގަނެ، އެމީހުން ހިފައި ހައްޔަރު ކުރުމުގެ ބޭނުމަށް ކޮމިޝަނަރ އޮފް ޕޮލިސް ނުވަތަ އޭނާ ކަނޑައަޅުއްވާ ފަރާތެއްގެ ހުއްދައާއެކު ހިންގާ އޮޕަރޭޝަނެއްކަމަށް މަސްތުވާތަކެއްޗާ ބެހޭ ޤާނޫނުގައި ބަޔާންކޮށްފައިވެއެވެ.
މި މައްސަލައިގައި ހިމެނޭ ސައިފުﷲ ވަނީ އެހެން މީހަކު ރާއްޖެ އެތެރެވިއިރު ގެނައި މަސްތުވާތަކެއްޗާ ޙަވާލުވެ، އެ ޕާރުސަލް ހިފައިގެން ގޮސްފައެވެ. ފުލުހުން އޭނާ ޗެކްކުރިއިރު އޭނާ ލައިގެން ހުރި ސޯޓުގެ ޖީބުން މަސްތުވާތަކެތި އަޅާފައިވާ ދަޅެއް ފެނިފައިވެއެވެ.
މި މައްސަލައިގައި އޭނާގެ މައްޗަށް ކޮށްފައިވަނީ ކެނެބިސް ޓްރެފިކް ކުރުމުގެ ކުށުގެ ދައުވާއެވެ.
މި ދައުވާއަށް ޖަވާބުދާރީވަމުން އޭނާ ބުނެފައިވަނީ، ދައުވާއަށް އިންކާރު ކުރާ ކަމަށެވެ. އެގޮތުން ފިލްމު ހުސްކުރި ދަޅު ފެނުނު ސޯޓަކީ އޭނާގެ ރައްޓެއްސެއްގެ ސޯޓެއް ކަމަށާއި، ސޯޓުގެ ޖީބުގައި މަސްތުވާތަކެތި އަޅާފައިވާ ދަޅެއް އޮތްކަން އޭނާއަށް ނޭނގޭކަމަށް ބުނެފައިވެއެވެ.
މި މައްސަލައިގައި ކޯޓުން ނިންމާފައިވަނީ އޭނާގެ މައްޗަށް ކުށް ސާބިތުވާކަމަށެވެ. އެހެންކަމުން ކުށުގެ އުޤޫބާތެއްގެ ގޮތުން އޭނާ 25 އަހަރު ދުވަހުގެ މުއްދަތަކަށް ޖަަލަށް ލުމަށާއި، އެއްލައްކަ ރުފިޔާއިން ޖޫރިމަނާ ކުރުމަށް ކޯޓުން ވަނީ ޙުކުމްކޮށްފައެވެ.
އޭނާ ބަންދުގައި ހުރި މުއްދަތު ޙުކުމުން އުނިކުރުމުން އޭނާ ތަންފީޒު ކުރަންޖެހޭނީ 24 އަހަރާއި 10 މަހާއި 6 ދުވަހުގެ ޖަލު ޙުކުމެކެވެ.
ކްރިމިނަލް ކޯޓުގައި މި ޙުކުމް ކުރެއްވީ ގާޒީ އަލީ އާދަމްއެވެ.
