ފަހަތުން އަރާ އެވަޓަން ބަލިކޮށް، މެންޗެސްޓަރ ސިޓީ އަލުން ހަތަރަކަށް

ފަހަތުން އަރާ އެވަޓަން ބަލިކޮށް, މެންޗެސްޓަރ ސިޓީން އަލުން ހަތަރު ވަނަ އަށް ޖެހިލައިފިއެވެ.

މިދިޔަ ހަފްތާގައި ސިޓީން ކުޅެން އޮތް ލީގު މެޗު ފަސްކުރުމާވެސް އެކު ފަސްވަނަ އަށް ސޮއްސާލި ސިޓީން އަލުން ގަދަ ހަތަރެއްގެ ތެރެއަށް ވަނީ 3-1 ން އެވަޓަން ބަލިކޮށްގެންނެވެ. މެޗު ސިޓީން ކާމިޔާބުކުރީ ފުރަތަމަ ހާފްގައި އެވަޓަން އިން ކުރިހޯދާފައި ވަނިކޮށް, ދެވަނަ ހާފްގައި ތިން ލަނޑު ޖަހައިގެންނެވެ. ފުރަތަމަ ހާފްގައި އެވަޓަން އަށް ކުރިހޯދައިދިނީ ހެރިސަން އެވެ. ދެވަނަ ހާފް ފަށައިގެން އަށް ވަނަ މިނިޓްގައި ސިޓީ އަށް ނަތީޖާ ހަމަހަމަ ކޮށްދިނީ ފޮޑެން އެވެ. އަދި ކުރި ހޯދައިދިނީ އަލްވާރޭޒް އެވެ. އަލްވަރޭޒް ލަނޑު ޖެހީ ޕެނަލްޓީ އަކުންނެވެ. ލީޑް ފުޅާކޮށްދިނީ ބާނާޑޯ ސިލްވާ އެވެ.

ސިޓީން އެވަޓަން ބަލިކޮށް އަލުން ހަތަރު ވަނަ އަށް މިޖެހިލީ ކްލަބް ވަރލްޑްކަޕްގެ ތަށްޓާއެކު, މިއަހަރު ފަސްވަނަ މުބާރާތް ކާމިޔާބުކުރުމަށްފަހު އެނބުރި އައިހެވެ. ލީގުގެ ޗެމްޕިއަން ސިޓީ މިހާރު ހަތަރު ވަނާގައި އޮތީ 18 މެޗުން 37 ޕޮއިންޓާ އެކުއެވެ. ތިންވަނާގައި އެސްޓަން ވިލާ އޮތީ 19 މެޗުން 39 ޕޮއިންޓާ އެކުއެވެ. ލިވަޕޫލް އެއްވަނާގައި އޮތީ 19 މެޗުން 42 ޕޮއިންޓާ އެކުއެވެ.