ވީއޭއެމް ކަޕްގެ ޗެމްޕިއަންކަން ވެމްކޯ އިން ހޯދައިފި

ވޮލީ ބޯޅަ އެސޯސިއޭޝަން އޮފް މޯލްޑިވްސް (ވީއޭއެމް) ކަޕްގެ އަންހެން ޑިވިޝަންގެ ޗެމްޕިއަންކަން ކުލަބު ވެމްކޯ އިން ހޯދައިފި އެވެ.

ކުލަބު ވެމްކޯ އިން މުބާރާތުގެ ޗެމްޕިއަންކަން ހޯދީ، ހޮނިހިރު ދުވަހުގެ ރޭ ޒުވާނުންގެ މަރުކަޒުގެ އެތެރޭ ކޯޓުގައި ކުޅުނު ފައިނަލް މެޗުގައި ޕޮލިސް ކުލަބުގެ މައްޗަށް ކުރި ހޯދައިގެންނެވެ. ޕޮލިސް ކުލަބުގެ މައްޗަށް ވެމްކޯ އިން ކުރި ހޯދީ ތިން ސެޓު އެއް ސެޓުންނެވެ.

މެޗުގެ ފުރަތަމަ ސެޓާއި ދެ ވަނަ ސެޓު ކާމިޔާބު ކުރީ ވެމްކޯ އިންނެވެ. އެއީ ފުރަތަމަ ސެޓު 25-19 އަދި ދެ ވަނަ ސެޓު 25-23ންނެވެ. ނަމަވެސް ޕޮލިސް ކުލަަބުން ވަނީ ތިން ވަނަ ސެޓުގައި ކުޅުން ރަނގަޅުކޮށް، އެ ސެޓު ކާމިޔާބުކޮށް އުންމީދެއް ހޯދައިފަ އެވެ. ޕޮލިސް ކުލަބުން ތިން ވަނަ ސެޓު ކާމިޔާބު ކުރީ 13-25ންނެވެ. މެޗުގެ ހަތަރު ވަނަ ސެޓުގައި ވެސް ޕޮލިސް ކުލަބުން ވަނީ ރަނގަޅަށް ސެޓު ފަށައިފަ އެވެ. މި ސެޓުގައި އެ ޓީމުން ލީޑު ވެސް ހޯދި އެވެ، އެހެން ނަމަވެސް، ވެމްކޯ އިން ވަނީ ކުޅުން ރަނގަޅުކޮށް މި ސެޓު ކާމިޔާބު ކޮށްފަ އެވެ. ހަތަރު ވަނަ ސެޓު 25-21ން ކާމިޔާބުކޮށް ވެމްކޯ އިން ވަނީ މުބާރާތުގެ ޗެމްޕިއަންކަން ހޯދައިފަ އެވެ.

މިއަހަރުގެ މުބާރާތުގެ ޑްރީމް ޓީމުގައި ހިމެނުނު ކުޅުންތެރިންނަކީ، ވެމްކޯގެ އައިޝަތު މާޖިދާ، ޖޫޒާން ޒަރީރު، މާޔާ ޙުސެއިން ޞަލާޙު، ފައިޙާ މުޙައްމަދު، ޕޮލިސް ކުލަބުގެ ޙައްވާ ރާޝިދާ، މަރިޔަމް އަޒުމާ އަދި ވޮލީ ބޯލް ޔޫތު ނިއު ޖެނެރޭޝަންގެ އާމިނަތު ރިޔާޝާ އެވެ. މުބާރާތުގެ އެންމެ މޮޅު ކޯޗަކަށް ހޮވުނީ ޗެމްޕިއަން ވެމްކޯގެ ކޯޗު އަޙުމަދު އަދީލް (ބޭބެ) އެވެ. މުބާރާތުގެ އެންމެ އުންމީދީ ކުޅުންތެރިޔަކަށް ޕޮލިސް ކުލަބުގެ މާސާ ފާރޫގް ހޮވުނުއިރު، މުބާރާތުގެ އެންމެ މޮޅު ކުޅުންތެރިޔަކީ ވެމްކޯގެ މާޖިދާ އެވެ.

މިއީ ވެމްކޯ އިން މުބާރާތް ކާމިޔާބު ކުރި ހަތަރު ވަނަ ފަހަރެވެ. މީގެ ކުރިން އެ ޓީމުން ވަނީ 2019، 2022 ވަނަ އަދި 2023 ވަނަ އަހަރު ވެސް މުބާރާތް ކާމިޔާބު ކޮށްފަ އެވެ. ވެމްކޯ އިން ހަތަރު ފަހަރު ވެސް މުބާރާތް ކާމިޔާބު ކުރީ ފައިނަލްގައި ޕޮލިސް ކުލަބުގެ މައްޗަށް ކުރި ހޯދައިގެންނެވެ.