އެހެން ކުލަބަކަށް ބަދަލުވުމުގެ ވިސްނުމެއް އަލްވަރޭޒްގެ ނެތް!

މެންޗެސްޓަރ ސިޓީ ދޫކޮށް އެހެން އެއްވެސް ކުލަބަކަށް ބަދަލުވުމުގެ ވިސްނުމެއް ނެތް ކަމަށް، އެ ޓީމަށް ކުޅެމުން އަންނަ އާޖެންޓީނާގެ ފޯވާޑް ހޫލިއަން އަލްވަރޭޒް ބުނެފި އެވެ.

އުމުރުން 23 އަހަރުގެ ކުޅުންތެރިޔާ ސިޓީ އަށް ބަދަލުވީ މިއަހަރުގެ ޖަނަވަރީ މަހު އެވެ. އެ ކުލަބާއެކު އޭނާ ސޮއި ކުރީ ފަސް އަހަރާ ބައިގެ އެއްބަސްވުމެއްގަ އެވެ. އެ އެއްބަސްވުމުގެ މުއްދަތު ހަމަވާނީ، 2028 ވަނަ އަހަރު އެވެ. ސިޓީން އޭނާ ހޯދީ، މިދިޔަ އަހަރު ޤަތަރުގައި ކުރިއަށް ދިޔަ ފީފާ ވޯލްޑް ކަޕްގަައި، އާޖެންޓީނާ އާއެކު އަލްވަރޭޒް ދެއްކި މޮޅު ކުޅުމުގެ ސަބަބުންނެވެ.

ސިޓީގައި ވެސް ޒުވާން އަލްވަރޭޒް އަންނަނީ މޮޅަށް ކުޅެމުންނެވެ. ސިޓީގައި އޭނާގެ ކުރިމަގާ ގުޅޭ ގޮތުން ވާހަކަ ދައްކަމުން އަލްވަރޭޒް ބުނީ، ހަގީގަތަކީ ސިޓީގައި އޭނާ ހުރީ ވަރަށް ހިތްހަމަ ޖެހިގެން އަދި ވަރަށް އުފަލުން ކަމަށެވެ. ސިޓީ އަށް އޭނާ ބަދަލުވިތާ އަދި މިހާތަނަށްވީ އަހަރަކާ ދުވަސްކޮޅެއްކަން ފާހަގަކޮށް އަލްވަރޭޒް ބުނީ، މިހާތަނަށް ސިޓީ އާއެކު ހޯދުނު ކޮންމެ ކާމިޔާބީއަކާ މެދު ވެސް ހިތްހަމަ ޖެހޭ ކަމަށެވެ. އިތުރަށް އޭނާ ބުނީ، މިހާރު އެންމެ ބޮޑު އަމާޒަކީ އަނެއްކާ ވެސް ސިޓީ އާއެކު އެ ހުރިހާ ކާމިޔާބީއެއް ތަކުރާރު ކުރުން ކަމަށެވެ. ސިޓީގައި އަލްވަރޭޒް ދައްކަމުން އަންނަ ކުޅުމުގެ ސަބަބުން، އޭނާ ހޯދުމުގެ ޝައުޤުވެރިކަން ސްޕެއިންގެ ގަދަ ދެ ބާރު ކަމަށްވާ، ބާސެލޯނާ އަދި ރެއާލް މެޑްރިޑުން ވެސް ގެންގުޅޭ ކަމަށް މީޑިއާ ރިޕޯޓުތައް ވަނީ ބުނެފަ އެވެ.

އަލްވަރޭޒް ވަނީ މިހާތަނަށް ސިޓީ އަށް ކުޅެދިން 75 މެޗުން 27 ލަނޑު ޖަހައިފަަ އެވެ. އެ ކުލަބާއެކު އޭނާ ވަނީ ޔޫރަޕުގެ ހުރިހާ ތައްޓެއް ކާމިޔާބު ކޮށްފަ އެވެ. އޭގެ ތެރޭގައި އިނގިރޭސި ޕްރިމިއާ ލީގު، އެފްއޭ ކަޕް، ޔުއެފާ ޗެމްޕިއަންސް ލީގު، ޔުއެފާ ސުޕަ ކަޕް އަދި ފީފާ ކުލަބު ވޯލްޑް ކަޕް ހިމެނެ އެވެ. އާޖެންޓީނާ ޤައުމީ ޓީމުން އޭނާ އަށް ޖާގަ ލިބުނީ 2021 ވަނަ އަހަރު އެވެ. މިހާތަނަށް އާޖެންޓީނާ އާއެކު އޭނާ ވަނީ ތިން ތައްޓެއް ކާމިޔާބު ކޮށްފަ އެވެ. އެއީ ކޮޕާ އެމެރިކާ ފުޓުބޯޅަ މުބާރާތް، ބައްރުތަކުގެ ޗެމްޕިއަނުންގެ މެދުގައި ކުޅޭ ފައިނަލިސިމާ އަދި ފީފާ ވޯލްޑް ކަޕް މުބާރާތެވެ.