ގިނަ ފުރުސަތުތަކާއެކު އީސީގެ ޖޮބް ފެއަރ ފަށައިފި

ގިނަ ފުރުސަތުތަކާއެކު އިލެކްޝަންސް ކޮމިޝަންގެ ޖޮބް ފެއަރ ފަށައިފިއެވެ.

ދަރުބާރުގޭގައި ޖޮބް-ފެއަރ އާދިއްތަ ދުވަހުގެ ހެނދުނު 10 ޖެހިއިރު ވަނީ ފަށާފައެވެ. އަދި ރޭގަނޑު 10 ޖެހުމާއި ހަމައަށް ކުރިއަށްދާނެއެެވެ. ހޯމަ ދުވަހު (23 ޑިސެމްބަރު) ވެސް ހެނދުނު 10ން ރޭގަނޑު 10ށް ޖޮބް ފެއަރ ކުރިއަށްދާނެއެވެ.

ރާއްޖެއެމްވީ އަށް މައުލޫމާތު ދެއްވަމުން އީސީގެ ނައިބު ރައީސް އިސްމާއިލް ހަބީބު ވިދާޅުވީ މި ޖޮބް ފެއަރ އިން އަލަށް ވަޒީފާއަށް އަންނަ ކުދިންނަށް ވެސް ތަފާތު ތަޖުރިބާއެއް ކުރެވިގެންދާނެ ކަމަށެވެ. އަދި މި ޖޮބް ފެއަރ އިން ވަޒީފާއަށް ހޮވޭ މީހުން، ޖެނުއަރީ މަހު ވަޒީފާއަށް ނެރޭނެ ކަމަށް ވިދާޅުވިއެވެ.

އީސީން ބުނީ އަންނަ އަހަރު ބާއްވާ މަޖިލިސް އިންތިޚާބުގައި އެ ކޮމިޝަންގެ ޓާސްކް ފޯހުގައި މަސައްކަތް ކުރުމަށް 100 އަށްވުރެ ގިނަ މީހުން ނެގުމަށް ހަމަޖެހިފައިވާ ކަމަށާއި އޭގެ ތެރޭގައި އިދާރީ އެކި މަސައްކަތްތަކަށް ބޭނުންވާ މަޤާމްތަކަށް ކުރިމަތިލުމުގެ ފުރުޞަތު ޖޮބްފެއަރގައި ހުޅުވާލާފައި ވާކަމަށެވެ.

އެގޮތުން ހުޅުވާލާފައިވާ މަޤާމުތަކުގެ ތެރޭގައި ޤައުމީ ކޮމްޕްލެއިންޓްސް ބިޔުރޯގެ މެންބަރު، އެސިސްޓެންޓް މެނޭޖަރ، ސީނިއަރ އޮފިސަރ، ސީނިއަރ އޮފިސަރ މީޑިއާ، އަދި ސީނިއަރ އެޑިޓަރ ފޮޓޯގްރާފަރ ހިމެނެއެވެ. އަދި ގްރެފިކް ޑިޒައިނަރ، އޮފިސަރ، ޓެކް އޮފިސަރ، ލޮޖިސްޓިކް އޮފިސަރ، އެސިސްޓެންޓް އޮފިސަރ، ސެކިޔުރިޓީ އޮފިސަރ، ޑްރައިވަރ އަދި މަސައްކަތު މީހުން ހޯދުމަށް ވަނީ ހުޅުވާލާފައެވެ.

މީގެއިތުރުން އިލެކްޝަނުން ބޭއްވުމަށް ތައްޔާރުވަމުންދާ ބައި-އިލެކްޝަންތަކުގައި ވޯޓުލާ މަރުކަޒުތަކުގައި ހަރަކާތްތެރިވާނެ އޮފިޝަލުން ހޯދުމަށްވެސް އިލެކްޝަންސް ކޮމިޝަނުން މިހާރު ވަނީ ހުޅުވާލާފައެވެ. އޮފިޝަލުންގެ ގޮތުގައި ގާތްގަނޑަކަށް 350 އެއްހާ މީހުން ބޭނުންވާނެ ކަމަށް އެ ކޮމިޝަނުން ބުނެއެވެ.

ޖޮބް-ފެއަރގެ ތެރެއިން މި މަޤާމުތަކާގުޅޭ މަޢުލޫމާތު އިލެކްޝަންސްގެ އޮފިޝަލުން ފޯރުކޮށްދޭނެއެވެ. މި މަޤާމުތަކަށް ޝަޢުގުވެރިވާ ފަރާތްތަކުން އައިޑީ ކާޑާއި، ތަޢުލީމާއި ތަޖުރިބާގެ ލިޔުންތައް ގެނައުމަށް އެ ކޮމިޝަނުން ވަނީ އެދިފައެވެ.