ކިތަންމެ ވަރަކަށް ދީނީ ކާޑު ކުޅެން އުޅުނަސް ރައީސް މުއިއްޒަށް އިތުބާރު ކުރެެވެން ނެތް: ޖަމީލް

ކިތަންމެ ވަރަކަށް ދީނީ ކާޑު ކުޅެން އުޅުނު ނަމަވެސް ރައީސުލްޖުމްހޫރިއްޔާ ޑރ. މުޙައްމަދު މުއިއްޒުއަށް އިތުބާރު ކުރެެވެން ނެތް ކަމަށް ކުރީގެ ރައީސް އަބްދުﷲ ޔާމީންގެ ގާނޫނީ ވަކީލު އަދި ކުރީގެ ނައިބު ރައީސް ޑރ. މުޙައްމަދު ޖަމީލް އަހުމަދު ވިދާޅުވެއްޖެއެވެ.

ކުރީގެ ރައީސް ޔާމީން އިތުރު ލުޔަށް އެދިވަޑައިގެންނެވުމުން އެ ލުއިތައް ނުދެވޭނެ ކަމަށް ކަރެކްޝަންސް އިން އަންގާފައިވާ ކަމަށް ބުދަ ދުވަހު މީދިއާތަކުން ވަނީ ރިިޕޯޓު ކޮށްފައެވެ. މިކަމާ ގުޅިގެން ޖަމީލް އެކްސްގައި ކުރެއްވި ޕޯސްޓެއްގައި ވިދާޅުވީ މިއަދު ރައީސް މުއިއްޒުގެ އަމަލުފުޅުން އެމަނިކުފާނަށް ދުވަހަކުވެސް އިތުބާރު ނުކުރެވޭނެ ކަމަށް ސާބިތުކޮށްދެއްވާފައިވާ ކަަމަށެވެ.

ކަރެކްޝަނުން ޔާމީނަށް އިތުރު ލުއިތައް ނުދިނުމަށް ނިންމި ނިންމުމަކީ ސީޔާސީ ނިންމުމެއްކަމަށް ފާހަގަކުރައްވާ ޖަމީލް ވިދާޅުވީ ރައީސް މުއިއްޒު ޕީޕީއެމަށާއި ޔާމީނަށް އެމަނިކުފާނުގެ އަސްލު ސޫރަ ދައްކަވާފައިވާ ކަމަށެވެ. އަދި އެމަނިކުފާނު ކިތަންމެ ވަރަކަށް ދީނީ ކާޑު ކުޅެން އުޅުއްވި ނަމަވެސް، އެމަނިކުފާނަށް އިތުބާރު ކުރެވެން ނެތްކަން މިހާރު އެނގޭކަމަށް ވިދާޅުވިއެވެ.

'ތިބާއަށް އިތުބާރު ކުރާ މީހަކަށް ދޮގު ނަހަދާށެވެ. އަދި ދޮވެރިޔަކަށް ދުވަހަކުވެސް އިތުބާރު ނުކުރަން އޮންނަ ބަސް ހާދަތެދޭ!'ޖަމީލް ކުރެއްވި ޕޯސްޓުގައި ހިއްސާ ކުރެއްވިއެވެ.

ޖަމީލް އިތުރަށް ވިދާޅުވީ ފަހަތަށް ޖެހި ބިރުގަންނަ ބަޔަކަށް އީމާންތެރި ނުވާނެ ކަމަށާއި ޔާމީން މިނިވަން ވަންދެން އަޑުއުފުއްލަވާނެ ކަމަށެވެ.

މައުލޫމާތު ލިބިފައިވާ ގޮތުގައި ޔާމީން ކަރެކްޝަންސްގައި އެދިވަޑައިގެންނެވީ ސިޔާސީ ހަރަކާތްތަކުގައި ބައިވެރިވެވަޑައިގެންނެވޭ ގޮތަށް އިތުރު ލުއިތައް ދެއްވުމަށެވެ. މިހާރު އެމަނިކުފާނަށް ދީފައިވާ ލުއިތަކާއެކު ވެސް ސިޔާސީ ހަރަކާތްތަކުގައި ބައިވެރިވެވަޑައިގަތުމަކީ މަނާ ކަމެކެވެ. މީގެ ކުރިން ޕީޕީއެމް އޮފީހުގައި ބޭއްވި ބައްދަލުކުރެއްވުންތަކެއްގައި ބައިވެރިވެވަޑައިގެންނެވުމުންނާއި އެމަނިކުފާނު އިސްކޮށް ހުންނަވައި އުފައްދާ ޕީއެންއެފްގެ އޮފީހަށް ވަޑައިގަތުމުން އެ މައްސަލަ ވެސް ކަރެކްޝަންސް އިން ތަހުގީގު ކުރާ ކަމަށް ބުންޏެވެ.

ޔާމީނުގެ ވެރިކަމުގައި ޖަލުތަކާއި ޕެރޯލް ޤާނޫނަށް ގެނައި އިސްލާޙުގައިވާ ގޮތުން، ސިޔާސީ ޕާޓީތަކާއި ޖަމިއްޔާތަކަށް އާންމު މެންބަރެއްގެ ޙައިސިއްޔަތުން ނިސްބަތްވުން ފިޔަވައި، އެއިން ތަނެއްގެ މަސްއޫލުވެރި ފަރާތެއްގެ ގޮތުގައި ހުރުމާއި، އެ ތަންތަނުން ހިންގާ ޙަރަކާތްތަކުގައި ބައިވެރިވުމުގެ ޙައްޤު ވެސް ޙުކުމެއް ތަންފީޒު ކުރުމަށްޓަކައި ޖަލުގައި ބަންދުކޮށްފައި ހުންނަ މުއްދަތުގައި ލިބިގެން ނުވާކަމަށް ވަނީ ބަޔާންކޮށްފައެވެ.

ވ. އާރަށު ޚިޔާނާތުގެ މައްސަލައިގައި ރިޝްވަތު ނެންގެވުމާއި އެ ފައިސާ ލޯންޑަރ ކުރެއްވުމުގެ ކުށް ކުރީގެ ރައީސް ޔާމީނުގެ މައްޗަށް ވަނީ ސާބިތުވެފައެވެ. އެ މައްސަލައިގައި އެމަނިކުފާނުގެ މައްޗަށް ކްރިމިނަލް ކޯޓުން 11 އަހަރުގެ ޖަލު ހުކުމެއް އިއްވާފައިވަނީ 2022 ވަނަ އަހަރުގެ ޑިސެމްބަރު މަހުގެ 25 ވަނަ ދުވަހުއެވެ. އެމަނިކުފާނަށް ލުއިތައް ދެއްވައި ގޭބަންދަށް ބަދަލުކޮށްފައިވަނީ ކުރީ ސަރުކާރުން 1 އޮކްޓޯބަރުގައެވެ. އެ ލުއިތަކުގެ އިތުރަށް އެއްވެސް ލުޔެއް މިހާތަނަށް އެމަނިކުފާނު ދީފައިނުވާ ކަމަށް އެމަނިކުފާނާ އަރިސް ބޭފުޅުން ވަނީ ހާމަކުރައްވާފައެވެ.