ޕޮލިސް ކޮމިޝަނަރު ކަމަށް ކުރިމަތިލެއްވީ ޝުޖާއުއާއި ނަވީން
ކޮމިޝަނަރުގެ މަގާމަށް ކުރިމަތިލުމަށް ހުޅުވާލި މުއްދަތު ހަމަވީ މިއަދު މެންދުރު 12:00ށް
ޕޮލިސް ކޮމިޝަނަރު ކަމަށް ކުރިމަތިލެއްވި ދެ އޮފިސަރުން
ޕޮލިސް ކޮމިޝަނަރު ކަމުގެ މަގާމަށް އެސިސްޓެންޓް ކޮމިޝަނަރުގެ މަގާމުގައި ތިއްބެވި އަލީ ޝުޖާއު އާއި އިސްމާއިލް ނަވީން ކުރިމަތިލައްވައިފިއެވެ.
އެކަން ހާމަކޮށް މިނިސްޓްރީ އޮފް ހޯމްލޭންޑް ސެކިއުރިޓީން އަންގާރަ ދުވަހުގެރޭ ބުނީ ޕޮލިސް ކޮމިޝަނަރަށް ކުރިމަތިލުމަށް ހުޅުވާލި މުއްދަތު ހަމަވިއިރު ކުރިމަތިލެއްވީ އެންމެ ދެ ބޭފުޅުން ކަމަށެވެ. އެއީ އޭސީޕީ ޝުޖާއު އާއި އޭސީޕީ ނަވީން ކަމަށް އެ މިނިސްޓްރީން ބުންޏެވެ.
ޕޮލިސް ކޮމިޝަނަރުގެ މަގާމަށް ބޭފުޅަކު އައްޔަން ކުރަން ހުޅުވާލީ އެ މަގާމުގައި ކުރިން ހުންނެވި މުޙައްމަދު ހަމީދު ނޮވެމްބަރު 15 ގައި ރިޓަޔަރ ކުރެއްވުމާ ގުޅިގެންނެވެ. އެ މަގާމާ ވަގުތީގޮތުން ހަވާލުވެ ހުންނެވި ޑެޕިއުޓީ ކޮމިޝަނަރު އަބްދުލް މަންނާނު ޔޫސުފް ވެސް ވަނީ ރިޓަޔަރ ކުރައްވާފައެވެ.
ފުލުހުންގެ ހިދުމަތުގެ ގާނޫނުގައިވާ ގޮތުން، ޕޮލިސް ކޮމިޝަނަރުކަމަށް އައްޔަން ކުރަންޖެހޭނީ އެސިސްޓެންޓް ކޮމިޝަނަރުގެ ރޭންކުން ފެށިގެން މަތީގެ ރޭންކުގެ ބޭފުޅެކެވެ. އެ މަގާމަށް ބޭފުޅަކު އައްޔަން ކުރަނީ އެ މަގާމަށް ކުރިމަތިލައްވާ ބޭފުޅުންނާ ޕޮލިސް ބޯޑުން އިންޓަވިއުކުރުމަށް ފަހުގައެވެ. އަދި އެ މަޤާމަށް ބޭފުޅަކު އައްޔަންކުރަނީ ޕޮލިސް ބޯޑުން މިނިސްޓަރަށް ހުށަހަޅާ ނަންތަކުގެ ތެރެއިން، މިނިސްޓަރުގެ ލަފަޔާއި އެކު ރައީސުލްޖުމްހޫރިއްޔާއެވެ.
