ގަދަ 16ގައި ޗެމްޕިއަން ސިޓީން ކޯޕަންހޭގަނާ ދެކޮޅަށް، ބާސެލޯނާ އާއި ނަޕޯލީގެ ކުރިމަތިލުމެއް!

މި ސީޒަންގެ ޔުއެފާ ޗެމްޕިއަންސް ލީގުގެ ގަދަ 16 ވަނަ ބުރުގައި ވާދަކުރާ ޓީމުތަކުގެ މެދުގައި ގުރު ނަގައިފިއެވެ.

މި ސީޒަންގެ ޗެމްޕިއަންސް ލީގުގެ ގަދަ 16 ވަނަ ބުރުން ޖާގަ ހޯދި ޓީމުތަކަކީ، އެންމެ ފަހުގެ ޗެމްޕިއަން މެންޗެސްޓަރ ސިޓީ، އާސެނަލް، ބާސެލޯނާ، ރެއާލް މެޑްރިޑު، އެތުލެޓިކޯ މެޑްރިޑު، ރެއާލް ސޮސިއެޑާޑް، ބަޔާން މިއުނިކް، ބޮރޫޝިއާ ޑޯޓްމަންޑު، އާރްބީ ލައިޕްޒިގް، ޕެރިސް ސެއިންޓް ޖާމަން (ޕީއެސްޖީ)، ޕޯޓޯ، ލާޒިއޯ، އިންޓަ މިލާން، ނަޕޯލީ، ޕީއެސްވީ އައިންދޯވަން އަދި ކޯޕަންހޭގަން އެވެ.

މީގެ ތެރެއިން އެެންމެ ފަހުގެ ޗެމްޕިއަން ސިޓީ ނުކުންނާނީ ކޯޕަންހޭގަންއާ ދެކޮޅަށެވެ. ބާސެލޯނާ އިން ނުކުންނާނީ ނަޕޯލީއާ ދެކޮޅަށެވެ. އެންމެ ފަހުގެ ރަަނައަޕް އިންޓަ މިލާނުން ނުކުންނާނީ އެތުލެޓިކޯ މެޑްރިޑާ ދެކޮޅަށެވެ. ޗެމްޕިއަންސް ލީގުގެ އެންމެ ކާމިޔާބު ޓީމު ކަމަށްވާ، ރެއާލް މެޑްރިޑުން ނުކުންނާނީ ލައިޕްޒިގާ ދެކޮޅަށެވެ. ޕީއެސްޖީން ނުކުންނާނީ ރެއާލް ސޮސިއެޑާޑާ ދެކޮޅަށެވެ. ބަޔާން ނުކުންނާނީ ލާޒިއޯއާ ދެކޮޅަށެވެ. ގިނަ އަހަރުތަކަށް ފަހު މުބާރާތުގައި ވާދަކުރަމުން އަންނަ އާސެނަލް ނުކުންނާނީ ޕޯޓޯއާ ދެކޮޅަށެވެ. ބޮރޫޝިއާ ޑޯޓްމަންޑު ނުކުންނާނީ ޕީއެސްވީ އައިންދޯވަނާ ދެކޮޅަށެވެ.

މުބާރާތުގެ ގަދަ 16 ވަނަ ބުރުގެ ފުރަތަމަ މެޗުތައް ކުޅުން އޮންނާނީ އަންނަ އަހަރުގެ ފެބްރުވަރީ މަހުއެވެ. އެގޮތުން އެ މެޗުތައް ކުޅުމަށް ހަމަޖެހިފައި ވަނީ ފެބްރުވަރީ 13، 14 އަދި 20، 21 ގައެވެ. އަދި ގަދަ 16 ވަނަ ބުރުގެ ދެ ވަނަ ލެގުގެ ކުޅުން އޮންނާނީ މާޗު މަހުއެވެ. އެއީ 5، 6 އަދި 12، 13 ގަައެވެ.