އިހަވަންދޫ ދާއިރާގެ މެމްބަރު ޝިފާއުއަށް މަރުގެ އިންޒާރު ދީފި
18 ޑިސެމްބަރު 2023 | ހޯމަ 16:29ޝިފާއު ވަނީ ރައީސް މަގާމުން ވަކިކުރުމަށް އެމްޑީޕީ ޕީޖީއަށް ހުށަހަޅުއްވާނެކަމަށް ވިދާޅުވެފައި
ފޭސްބުކުގައި ޝިފާއުއަށް މަރުގެ އިންޒާރުދީ ޕޯސްޓްކޮށްފައި
ރައީސުލްޖުމްހޫރިއްޔާ ޑރ. މުހައްމަދު މުއިއްޒު މަގާމުން ވަކިކުރުމަށް އެމްޑީޕީ ޕާލަމެންޓްރީ ގްރޫޕަށް ހުށަހަޅުއްވާނެކަމަށް އިހަވަންދޫ ދާއިރާގެ މެމްބަރު މުހައްމަދު ޝިފާއު ވިދާޅުވުމުން، އޭނާއަށް މަރުގެ އިންޒާރުދީފިއެވެ.
ރައީސް މުއިއްޒު މަގާމުން ވަކިކުރާނެކަމަށް ވިދާޅުވި ޚަބަރު ފޭސްބުކްގައި ޕޯސްޓުކުރަމުން މީހަކު ހުތުރު ބަހުރުވައިން ޝިފާއުއަށް މުޚާތަބުކޮށް ބުނެފައިވަނީ "ކަރުވެސް ކަނޑާލަން ޖެހިދާނެ" ކަމަށެވެ.
މަޖިލީހުގެ ޖުމްލަ މެންބަރުންގެ މިހާރުގެ ޖުމްލަ އަދަދަކީ 80 މެމްބަރުން ކަމަށް ކަނޑައެޅުމަށް މަޖިލީހުގެ ގަވައިދަށް ހުށަހެޅި އިސްލާހު ދިރާސާކޮށް ކޮމިޓީން ހުށަހެޅި ރިޕޯޓަށް، މަޖިލީހުގެ ތަޅުމުގައި ހޯމަ ދުވަހު ކުރިއަށްދިޔަ ބަހުސްގައި ވާހަކަދައްކަވަމުން ޝިފާއު ވިދާޅުވެފައިވަނީ، ރައީސް މުއިއްޒުގެ ސަރުކާރުގައި ގާނޫނީ ހުކޫމަތެއް އޮތް ކަމަށް ދިވެހި ރައްޔިތުން މިއަދު ގަބޫލުނުކުރާ ކަމަށެވެ.
ޝިފާއު ހުށަހެޅުއްވި އިސްލާހު ފާސްކޮށްފައިވާއިރު، މި އިސްލާހާއެކު އެހެން ޕާޓީއެއްގެ އެހީތެރިކަމަކާނުލައި އެމްޑީޕީއަށް ރައީސުލްޖުމްހޫރިއްޔާއާއި ނައިބު ރައީސް މަގާމުން ދުރުކުރެވޭނެއެވެ.
މި އިސްލާހު ފާސްވެފައިވާއިރު، މަހިބަދޫ ދާއިރާގެ މެމްބަރު އަހުމަދު ތާރިގް ވިދާޅުވެފައިވަނީ ޕީޕީއެމް /ޕީއެންސީއަކީ 2013ން 2018ށް ވެރިކަންކުރި ޕާޓީކަމަށެވެ.
ޝިފާއުއަށް މަރުގެ އިންޒާރު ދިން މީހާ ވަނީ އިންޒާރުދީ އެކި ޕޯސްތައް ފޭސްބުކުގައި ލިޔެފައެވެ.
