އަހުމަދު މޫސާ މުހައްމަދު (އައްމަޓީ)ގެ ޕާސްޕޯޓް ހިފެހެއްޓުމުގެ ވަގުތީ އަމުރެއް ނެރެދިނުމަށް, ޕްރޮސެކިއުޓަރ ޖެނެރަލްގެ އޮފީސް (ޕީޖީ)ން ދިވެހިރާއްޖޭގެ ހައިކޯޓުގައި އެދިފައިވާ މައްސަލައިގެ އަޑުއެހުމެއް ހޯމަ ދުވަހު ކުރިއަށްގެންގޮސްފިއެވެ.
އައްމަޓީގެ މައްޗަށް ކްރިމިނަލް ކޯޓަށް ހުށަހަޅާފައިވާ، ޚިޔާނާތްތެރިވުމުގެ ކުށުގެ 42 ދައުވާއާ ގުޅިގެން ކްރިމިނަލް ކޯޓުން 16 ޖޫން 2021 ދުވަހު ބޭއްވި އަޑުއެހުމެއްގައި ވަނީ، ޝަރީއަތް ނިމެންދެން ފުރުން މަނާކޮށް އޭނާގެ ޕާސްޕޯޓު ނުވަތަ ޓްރެވަލް ޑޮކިއުމަންޓް ހިފެހެއްޓުމަށް މޯލްޑިވްސް އިމިގްރޭޝަންގެ މައްޗަށް އަމުރުކޮށްފައެވެ.
މި އަމުރު މުރާޖައާކުރުމަށް އެދި އައްމަޓީގެ ފަރާތުން 29 ނޮވެންބަރު 2023ގައި އެދުމުން، އަމުރު މުރާޖައާކޮށް 06 ޑިސެންބަރު 2023 ދުވަހު ވަނީ ޕާސްޕޯޓު ދޫކުރުމަށް އަމުރެއް ނެރެފައެވެ.
ހޯމަ ދުވަހުގެ އަޑުއެހުމުގައި ދައުލަތުގެ ވަކީލު ވަނީ އަމުރު ނެރުއްވަން އެދިވަޑައިގަންނަވާ ސަބަބުތައް ކިޔައިދެއްވާފައެވެ.
ކްރިމިނަލް ކޯޓުގެ ނިންމުމުގައި ބުނެފައިވަނީ އެގޮތަށް ނިންމާފައިވަނީ މައިބަދައިގެ އޮޕަރޭޝަނަކީ އޭގެ ޒާތަށް ބަލާއިރު ސީރިއަސް އޮޕަރޭޝަނެއްކަމަށް ބެލެވޭތީއާއި، އަހުމަދު މޫސާ މުހައްމަދުގެ އާއިލާ ދިރިއުޅެނީވެސް ސްރީލަންކާގައި ކަމަށް ފާހަގަ ކޮށްފައިވާތީ، އޭނާއަށް އާއިލާ ކައިރީގައި ހުރެގެން ފަރުވާ ލިބުމުގެ ފުރުސަތު ފަހިކޮށްދިނުމަށް ކަމަށެވެ.
އޭގެ އިތުރުން، ކޯޓަށް ހުށަހެޅިފައިވާ މައްސަލަތަކުގައި އަހުމަދު މޫސާ މުހައްމަދުގެ ފަރާތުން ކޯޓަށާއި ޝަރީއަތަށް މިހާތަނަށް އެއްބާރުލުން ދީފައިވާތީ، ކުރީގެ ހާލަތު ބަދަލުވެފައިވާކަމަށް ޝަރީއަތަށް ބުރަވެވޭތީ ކަމަށްވެސް ކޯޓުން މައުލޫމާތު ދެއެވެ.
ދައުލަތުގެ އިސްތިއުނާފު މައިގަނޑު ގޮތެއްގައި ބިނާވެފައިވަނީ އެ ނުކުތާތަކުގެ މައްޗަށެވެ.
ދައުލަތުގެ ވަކީލު ވިދާޅުވީ، ކްރިމިނަލް ކޯޓުގެ އަމުރު މުރާޖައާކޮށް ނިންމި ގޮތް، ގާނޫނުއަސާސީގެ 143 ވަނަ މާއްދާގެ (ރ) އާ ޚިލާފު ކަމަށެވެ.
އެ މާއްދާގައި އޮންނަނީ، މަތީ މަރުހަލާގެ ނިންމުންތަކަށް ދަށު މަރުހަލާގެ ކޯޓުތަކުގެ ނިންމުންތަކުން އަމަލުކުރަންޖެހޭނެ ކަމަށެވެ.
ދައުލަތުގެ ވަކީލު ވިދާޅުވީ، އައްމަޓީ ފިލައިގެން ދިއުމުގެ އިހުތިމާލު އޮތްކަމަށް ބެލެވޭތީ، އެ ހާލަތުގައި ރާއްޖެއިން ފަރުވާ ކުރެވެން އޮވެމެ، ރާއްޖެއިން ބޭރަށް ދިއުމަށް ދައުލަތުން އިއުތިރާޒު ކުރާކަމަށެވެ.
ކްރިމިނަލް ކޯޓުގެ ނިންމުމުގެ ސަބަބުން އައްމަޓީ މިހާރު ހުރީ މުޅިން ބަންދުން މިނިވަންވެފައިކަން ފާހަގަކުރައްވައި ދައުލަތުގެ ވަކީލު ވިދާޅުވީ، އެކަމުގެ ސަބަބުން އައްމަޓީ ފިލައިގެން ދިއުމުގެ އިހުތިމާލު އޮތްކަން ދައުލަތުގެ ހެކިތަކާއި، މި މައްސަލައިގެ ކަން ހިނގާފައިވާ ގޮތަށް ބަލާއިރު އެނގޭކަމަށެވެ.
މި ނުކުތާގައި ދައުލަތަށް ފާހަގަވާ ކަމަކީ އެންމެ ފުރަތަމަ މި މައްސަލައިގެ ބަންދަށް ލެވުނު ހިސާބުން ފަށައިގެން، ފަހުން ބަންދުން ދޫކޮށްލި މުއްދަތުގެ ތެރޭގަ މި ބަލި ހާލަތު އޮވެމެ، ކުއްލިއަކަށް، ފުރަތަމަ ޝަރީއަތް ނިމެންދެން ބަންދު ކުރެވިފަ ހުރީ. ދެން ފަހުން ހަރުކަށި ފިޔަވަޅުތަކެއް އެޅިފަ ހުރީ. އަޅުގަނޑުމެންނަށް މި މައްސަލަ ދިރާސާކުރާއިރު ފާހަގަވާން އޮތް ކަމަކީ އަހުމަދު މޫސާ މުހައްމަދުގެ މައްޗަށް އެ އެޅިފަ ހުރި ފިޔަވަޅަކަށްފަހު ފިޔަވަޅެއް ނެއްޓެމުން ނެއްޓެމުން އައިސް، އެ ޕާސްޕޯޓުވެސް އާކޮށްފަ، އޭގެ ކޮޕީއެއްވެސް ހޯދާފަ، ދެން އެންމެ ފަހުން އަނެއްކާވެސް ކުއްލިއަކަށް ބަލި ހާލަތުގެ ވާހަކަ ފާހަގަކުރައްވާފަ، ޕާސްޕޯޓު ވަކި މުއްދަތަކަށް ނެގިފަ އޮތްތަން.ދައުލަތުގެ ވަކީލު
ދައުލަތުގެ ވަކީލު ވިދާޅުވީ، އައްމަޓީ ކުރިންވެސް ލަންކާއަށް ގޮސް ހުއްޓައި ގެނެވުނީ، ޕާސްޕޯޓުގެ މުއްދަތު ހަމަވުމުންވެސް ވަކި ދުވަސްތަކެއްވަންދެން މަޑުކޮށްގެން ހުއްޓައި، ވިސާގެ މުއްދަތު ހަމަވުުމުންކަމަށެވެ.
ދައުލަތުން ވަނީ ފިލާފާނެކަމަށް ބެލެވޭ މީހެއްގެ އަތްމައްޗަށް އޭނާގެ ޕާސްޕޯޓު މުތުލަގަށް ދޫކުރި ކުރުމަށްވެސް އަލިއަޅުވާލައްވައި، އެކަމުގެ ކަންބޮޑުވުންވެސް ފާޅުކުރައްވާފައެވެ.
އައްމަޓީގެ ފަރާތުންވެސް ވަނީ އެ ކަންކަމާ ގުޅޭގޮތުން ވާހަކަ ދައްކާފައެވެ. އެގޮތުން ދައުލަތުން ދަށު ކޯޓުގައި ދައްކާފައިނުވާ ވާހަކަތައް ހައިކޯޓުގައި ދައްކާފައިވާކަމަށް އޭނާގެ ވަކީލު ވިދާޅުވިއެވެ.
ފަނޑިޔާރުން ވިދާޅުވީ، ވަގުތީ އަމުރާމެދު ނިންމަވާ ގޮތެއް ދެފަރާތަށްވެސް އަންގަވާނެ ކަމަށާއި، ދެން އޮންނަ އަޑުއެހުމެއްގައި މި މައްސަލައާ ގުޅިގެން ހައިކޯޓުން ގޮތެއް ނިންމަވާނެކަމަށެވެ.
