ކްލޮޕް: މިވަރަށް ކުޅޭނަމަ އިދިކޮޅު ޓީމަށް އަމިއްލަ ހާފު ދޫކޮށްނުދެވޭނެ

އިނގިރޭސި ޕްރެމިއާ ލީގުގައި ރޭ މެންޗެސްޓާ ޔުނައިޓެޑާ ބައްދަލުކޮށް 0-0އިން އެއްވަރުވި މެޗަކީ އެ ޓީމު 7-0އިން ބަލިކުރި މެޗަށްވުރެ މޮޅަށް ލިވަޕޫލް ކުޅުނު މެޗެއް ކަމަށް ލިވަޕޫލްގެ ކޯޗު ޔާގެން ކްލޮޕް ބުނެފި އެވެ.

ލިވަޕޫލާއި ޔުނައިޓެޑް ރޭ ކުޅުނު މެޗު އެއްވަރުވުމުން ލިވަޕޫލް ވަނީ 17 މެޗުން ޓޭބަލުގެ ދެވަނަ އަށް ވެއްޓިފަ އެވެ. އެއީ 39 ޕޮއިންޓާއެކު އެއްވަނައިގައިވާ އާސެނަލްއަށްވުރެ އެއް ޕޮއިންޓް މަދުވެގެންނެވެ. ޔުނައިޓެޑް އޮތީ 28 ޕޮއިންޓާއެކު ހަތްވަނައިގައެވެ.

ރޭގެ މެޗުގައި ލިވަޕޫލުން 34 ބޯޅަ ޔުނައިޓެޑްގެ ގޯލާ ދިމާލަށް ފޮނުވާލިއެވެ. ޔުނައިޓެޑަށް ފޮނުވާލެވުނީ އެންމެ ހަ ބޯޅައެވެ. ލިވަޕޫލަށް 12 ކޯނަރު ލިބުނުއިރު ޔުނައިޓެޑަށް އެންމެ ކޯނަރެއް ވެސް ނުލިބެއެވެ.

2015 ވަނަ އަހަރުން ފެށިގެން ލިވަޕޫލަށް ކޯޗުކޮށްދެމުން އަންނަ ކްލޮޕް ބުނީ ޔުނައިޓެޑާ ދެކޮޅަށް ރޭ ލިވަޕޫލް ކުޅުނު ވަރަށް އެހެން މެޗުތަކުގައި ކުޅެފިނަމަ އިދިކޮޅު ޓީމުތައް ސަލާމަތްނުވާނެ ކަމަށެވެ.

"މިވަރަށް ކުޅެފިނަމަ އިދިކޮޅު ޓީމުތަކަށް އެމީހުންގެ ހާފުތެރެއިން އަރައި ނުގަނެވޭނެ. އަހަރުމެންނަށް ގޯލެއް މި މެޗުގައި ޖެހުނުނަމަ އެމީހުން ދިފާއު ދޫކޮށް ކުރިއަރާނެ. އެއިރުން މެޗު އޯޕަންވީސް. އެކަމަކު އެހެނެއްނޫން ނަތީޖާ މިފެނުނީ،" ކްލޮޕް ބުންޏެވެ.