ދިވެހި ކަނޑުތައް ކުރެހުމުގެ ޤާބިލްކަން އަށަގެންނެވުމަށާއި އެކަމަށް ބޭނުންވާ ޒަމާނީ ވަސީލަތްތައް ހޯދުމުގެ މަސައްކަތަށް ހޭދަވާނެ ޚަރަދުގެ ތަފްސީލެއް އަދި ނޭނގޭ ކަމަށް ސަރުކާރުން ބުނެފިއެވެ.
ދިވެހި ކަނޑުތައް ކުރެހުމުގެ ޤާބިލްކަން އަށަގެންނެވުމާއި އެކަމަށް ބޭނުންވާ ޒަމާނީ ވަސީލަތްތައް ހޯދުމުގެ މަސައްކަތް މިހާރު ކުރިއަށްދާ ކަަމަށް ރައީސް ޑރ.މުހައްމަދު މުއިއްޒު ވިދާޅުވީ ހޮނިހިރު ދުވަހުގެރޭ ބޭއްވި ހުރަވީ ދުވަހުގެ ޖަލްސާގައި ވާހަކަފުޅުދައްކަވަމުންނެވެ. ރައީސް ވަނީ އިންޑިޔާއާއެކު ވެފައިވާ ހައިޑްރޯގްރެފިކް އެއްބަސްވުމުގެ މުއްދަތު ހަމަވުމާއި ގުޅިގެން އެ އެއްބަސްވުން އަލުން ކުރިޔަށް ނުގެންދަން ނިންމަވާފައިވާކަން ފާހަގަކުރައްވާފައެވެ. އަދި ރައީސް ވިދާޅުވީ އެ އެއްބަސްވުން އައު ނުކުރާނެކަން އިންޑިޔާ ސަރުކާރަށް އަންގަވާފައިވާ ކަމަށާއި ދިވެހި ކަނޑުތައް ކުރަހާނީ ދިވެހީން ކަމަށް އެމަނިކުފާނު ވިދާޅުވިއެވެ.
އެގޮތުން އެކަމުގެ ޤާބިލުކަން ދިވެހި ސިފައިންގެ ކިބައިގައި އަށަގެންނެވުމުގެ މަސައްކަތް މިހާރު މި ސަރުކާރުން ފަށާފައިވާކަމަށާއި ކަމަށް ބޭނުންވާ މީހުން ބިނާކުރުމާއި ޒަމާނީ ވަސީލަތްތައް ހޯދުމުގެ މަސައްކަތް، މިހާރުން ފެށިގެން ކުރިއަށްދާ ކަމަށް ވެސް ރައީސް ވިދާޅުވިއެވެ. ނަމަވެސް އެކަމާއި ގުޅޭގޮތުން އާދިއްތަ ދުވަހުގެ ނޫސްވެރިންގެ ބައްދަލުވުމުގައި ސަރުކާރުގެ ތަރުޖަމާނު މުހައްމަދު ޝަހީބް ވިދާޅުވީ އެކަމަށްޓަކައި ހޭދަވާނެ ކަމަށް އަންދާޒާކުރެވޭ ޚަރަދާއި އެކަމަށް ހޭދަވާނެ މުއްދަތު ފަދަ މައުލޫމާތުތައް އަދި ނޭނގޭ ކަމަށެވެ. އެ މަސައްކަތް ކުރިއަށްދަނީ އަދި ފުރަތަމަ މަރުހަލާގައި ކަމަށް ޝަހީބް ވަނީ ވިދާޅުވެފައެވެ.
އިންޑިޔާއާއެކު ވެފައިވާ ހައިޑްރޯގްރެފިކް އެއްބަސްވުމުގެ މުއްދަތު ހަމަވުމާއި ގުޅިގެން އެ އެއްބަސްވުން އާ ނުކުރަން ނިންމާ އެކަން އިންޑިއާ ސަރުކާރަށް އެންގިކަން ނިމިދިޔަ ހަފްތާގެ ތެރޭގައި ސަރުކާރުން ވަނީ އިޢުލާން ކޮށްފައެވެ.
