އެފްއޭއެމްގެ އިންތިޚާބު އަންނަ މަހުގެ 31ގައި
45 ދުވަހުގެ ތެރޭގައި އިންތިޚާބު ބޭއްވުމަށް ވެސް އެކްސްކޯގެ 20 ވަނަ ބައްދަލުވުމުން ނިންމާފައިވޭ
އެފްއޭއެމްގެ ރައީސް ބައްސާމް
ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް) ގެ އިންތިޚާބު އަންނަ ޖަނަވަރީ މަހުގެ 31 ގައި ބާއްވަން ނިންމައިފިއެވެ.
އެފްއޭއެމްގެ އިންތިޚާބު އަންނަ މަހުގެ 31 ގައި ބާއްވަން ނިންމީ އެ އިދާރާގެ އެކްސްކޯ އިންނެވެ. އެގޮތުން 45 ދުވަހުގެ ތެރޭގައި އިންތިޚާބު ބޭއްވުމަށް ވެސް އެކްސްކޯގެ 20 ވަނަ ބައްދަލުވުމުން ނިންމާފައިވެއެވެ. އެފްއޭއެމުން މިހާރު ވަނީ އިންތިޚާބަށް ކުރިމަތިލުމުގެ ފުރުސަތު ވެސް ހުޅުވާލައިފައެވެ. އިންތިޚާބަށް ކުރިމަތިލުމުގެ މުއްދަތު ހަމަވަނީ މި މަހުގެ 27 ވަނަ ދުވަހުއެވެ. މިހާތަނަށް އެފްއޭއްމެގެ އިންތިޚާބުގައި ވާދަކުރާނެކަން ރަސްމީކޮށް އިއުލާންކޮށްފައި ވަނީ، މިހާރުގެ މަހިބަދޫ ދާއިރާގެ ރައްޔިތުންގެ މަޖިލީހުގެ މެންބަރު އަދި އެފްއޭއެމްގެ ކުރީގެ ރައީސް އަޙުމަދު ޠާރިޤު (ޓޮމް) އެވެ. ނަމަވެސް، ކުރިއަަށް އޮތް އިންތިޚާބުގައި ބައްސާމް ވެސް ވާދަކުރާނެ ކަމުގެ އަޑުތައް ވަނީ ފެތުރިފައެވެ.
އެފްއޭއެމްގެ އިންތިޚާބު އަންނަ މަހު ބާއްވަން ނިންމާފައިވާއިރު، އެ އިދާރާގެ މިހާރުގެ ރައީސް ބައްސާމް އަދީލް ޖަލީލްގެ އިތުބާރު ނެތްކަމުގެ މައްސަލަ ހުށަހެޅުމަށް ދަނީ މަސައްކަތް ކުރަމުންނެވެ. އެގޮތުން ޓޮމް އިސްވެ ފައްޓަވާފައިވާ މަސައްކަތުގައި، އިތުބާރު ނެތްކަމަށް ހުށަހަޅަން ބޭނުންވާ މިންވަރަށް ކުލަބުތަކުން ސޮއިކޮށްފައިވާ ކަމަށް މައުލޫމާތު ލިބެއެވެ. އަދި އެ މައްސަލަ ވީއެންމެ އަވަހަކަށް ހުށަހެޅުމުގެ މަސައްކަތް ކުރަމުން އަންނަ ކަމަށް މައުލޫމާތު ލިބިފައިވެއެވެ.
ބައްސާމްގެ އިތުބާރު ނެތްކަމަށް ސޮއި ކުރި ކުލަބުތަކުގެ ތެރޭގައި ރާއްޖޭގެ އެންމެ ފަހުގެ ޗެމްޕިއަން މާޒިޔާ ސްޕޯޓްސް އެންޑް ރެކްރިއޭޝަންގެ އިތުރުން ޓީސީ ސްޕޯޓްސް ކުލަބު، ކުލަބު ގްރީން ސްޓްރީޓްސް އަދި ސުޕަ ޔުނައިޓެޑު ސްޕޯޓްސް (ސަސް) ހިމެނެއެވެ. އޭނާގެ އިތުބާރު ނެތްކަމުގެ މައްސަލަ ހުށަހެޅުމުގެ މަސައްކަތް ކުރަމުން އަންނަ އިރު، އެފްއޭއެމް ހިންގުމުގަައި ވަނީ ބޮޑެތި މައްސަތަކެއް ނުކުމެފައެވެ. އެގޮތުން މާލީ ގޮތުން އެ އިދާާރާ ބޮޑު އަނދަވަޅަކަށް ވެއްޓިފަައިވާއިރު، މަނީ ލޯންޑަރިންގެ ތުހުމަތު ބައްސާމް އަދި އެފްއޭއެމްގެ އިސްވެރިންގެ މައްޗަށް ކުރެވެއެވެ. އެ މައްސަލަ މިހާރު އޮތީ ދައުވާ ކުރާ ހިސާބުގައެވެ.
