ހަގީގަތުގައި ޤައުމަށް ގައްދާރުވުމަކީ ހަގީގަތާ ޚިލާފު ވާހަކަ ދައްކައިގެން ޤައުމީ ސަލާމަތަށް ނުރައްކާވާ ފަދަ ކަންކަން ކުރުންކަމަށް މަޖިލީހުގެ ކުރީގެ ނައިބްރައީސް މޫސާ މަނިކު (ރީކޯ މޫސަ) ވިދާޅުވެއްޖެއެވެ.
ރާއްޖެޓީވީގެ ފަލަސުރުޙީ ޕްރޮގްރާމްގައި މޫސަ ވަނީ ޤައުމީ ސަލާމަތާ ގުޅުވައި ދައްކާފައިވާ ވާހަކަތަކާއި ގުޅިގެން ރައްޔިތުންގެ މަޖިލީހުގެ ޤައުމީ ސަލާމަތާއި ބެހޭ ކޮމިޓީއާއި މަޖިލީހުން ތަހުގީގެއް ހިންގަން ޖެހޭކަމަށް ވިދާޅުވެފައެވެ.
މޫސަ ވިދާޅުވީ، ނޫސްވެރިކަމުގެ މިނިވަންކަމުގައިވެސް ރަތް ރޮނގެއް އޮންނާނެ ކަމަށާއި ދައުލަތުގެ މިނިވަންކަން މުހިއްމުވާނެކަމަށެވެ.
ޖިއޯ ޕޮލިޓިކްސްގެ ތެރެއަށްވަދެ، ޗައިނާއާއި އިންޑިއާއާ ޖެހޭގޮތަށް ވާހަކަ ދެއްކުމާއި، އެމެރިކާއާއި ރަޝިއާއާ ޖެހޭގޮތަށް ވާހަކަ ދެއްކުމަކީ ހައްޤު އޮންނަ ކަމެއް ނޫންރީކޯ މޫސާ މަނިކު
ދިވެހި ޤައުމުންވެސް ބައިނަލްއަޤުވާމީ ގިނަ މުއާހަދާތަކެއްގައި ސޮއިކޮށްފައިވާކަން ފާހަގަ ކުރައްވައި މޫސަ އިތުރަށް ވިދާޅުވީ، ނޫސްތައް ހިންގުމަށްޓަކައި ދައުލަތަށް ގެއްލުންވާ ގޮތަށް ކަންކަން ކޮށްގެން ނުވާނެކަމަށެވެ.
ހަގީގަތުގައި ޤައުމަށް ގައްދާރުވުމަކީ ހަގީގަތާ ޚިލާފު ވާހަކަ ދައްކައިގެން ޤައުމީ ސަލާމަތަށް ނުރައްކާވާ ފަދަ ކަންކަން ކުރުންކަމަށް މޫސަ ވިދާޅުވިއެވެ. މޫސަ ވިދާޅުވީ، އިންޑިއާ އައުޓްގެ ނަމުގައި ސިޔާސީ ބޭނުމަށް ހިންގި ޙަރަކާތްތަކުގެ އަސަރު މިއަދު އެކި ގޮތްގޮތުން ކުރަމުންދާކަމަށެވެ.
އަދި ސިޔާސީ ބޭނުމަށް އެފަދަ ވާހަކަތައް ފަތުރާ ޕާޓީތައް އުވާލެވޭ ގޮތަށް ޤަރާރެއް ހަދަންޖެހޭކަމަށް ވެސް މޫސަ ވިދާޅުވިއެވެ.
އޭގެ އިތުރުން، މި ސަރުކާރު ވެރިކަމަށް އައިއިރު ގޮވާލަމުން ދިޔައީ ޗާގޯސް މައްސަލައިގައި ނިމިދިޔަ ސަރުކާރުން މޮރިޝަސްގެ ބޮޑުވަޒީރަށް ފޮނުއްވެވި ސިޓީއާއި އުތުރުތިލަފަޅު އެއްބަސްވުން ހާމަ ކުރުމަށް ކަމަށާއި ނަމަވެސް މިހާރު އެ ވާހަކަ ބަދަލުވެފައިވާ މަންޒަރު ފެނިވަޑައިގަންނަވާކަމަށް ވެސް މޫސަ ފާހަގަކުރެއްވިއެވެ.
