އިނގިރޭސި ޕްރިމިއަރ ލީގުގައި ޗެލްސީ އާއި ނިއުކާސަލް ޔުނައިޓެޑް މޮޅުވެ, ތާވަލްގައި ކުރިއެރުމެއް ހޯދައިފިއެވެ.

ޗެލްސީ އަމިއްލަ ދަނޑުގައި ޝެފީލްޑް ޔުނައިޓެޑް އަތުން މޮޅުވެ, ތާވަލްގެ 10 ވަނަ އަށް ވަނީ ޖެހިލާފައެވެ. ޝެފީލްޑްގެ މައްޗަށް ޗެލްސީން ކުރިހޯދީ 2-0 ނެވެ. މެޗުގައި ޗެލްސީގެ ދެ ލަނޑު ޖެހީ ކޯލް ޕަލްމާއާއި ނިކޮލަސް ޖެކްސަން އެވެ. ދެ ލަނޑުވެސް ޖެހީ ދެވަނަ ހާފްގައެވެ. ފުރަތަމަ ލަނޑު ޖެހުމަށްފަހު ދެވަނަ ލަނޑު ޖަހަން ފުރުޞަތު ތަވަނަސްކޮށްދިނީވެސް މެންޗެސްޓަރ ސިޓީން ޗެލްސީ އަށް ބަދަލުވު ޒުވާން ޕަލްމާ އެވެ. އޭނާ ވަނީ މިސީޒަންގައި ޗެލްސީއަށް ކުޅުނު 19 މެޗުން 13 ގޯލް ޖެހުމުގައި ސީދާ ގޮތުން ބައިވެރިވެފައެވެ. ކޯޗު ޕޮޗެޓީނޯ ވަނީ މެޗަށްފަހު ކޯލް ޕަލްމާ އަށް ވަރަށް ބޮޑަށް ތައުރީފްވެސް ކޮށްފައެވެ. ޕޮޗެޓީނޯ ބުނީ އެއީ ގޯލް ޖެހުމާއި, ގޯލް ޖަހަން ފުރުޞަތު ތަނަވަސްކޮށްދިނުމުގައިވެސް މޮޅު ކުޅުންތެރިއެއް ކަމަށެވެ. ޗެލްސީ 10 ވަނާގައި އޮތީ 17 މެޗުން 22 ޕޮއިންޓާ އެކުއެވެ.

ނިއުކާސަލް ޔުނައިޓެޑް ވަނީ 3-0 ން ފުލަމް ބަލިކޮށް, ހަ ވަނަ އަށް ޖެހިލާފައެވެ. އެއީ 17 މެޗުން 29 ޕޮއިންޓާ އެކުއެވެ. ފުލަމް ކޮޅަށް ނިއުކާސަލްގެ ފުރަތަމަ ލަނޑު ޖެހީ 17 އަހަރުގެލެވިސް މިލޭ އެވެ. ދެވަނަ ލަނޑު ޖެހީ އަލްމިރޯން އެވެ. އަދި ތިންވަނަ ލަނޑު ޖެހީ ބާން އެވެ. ތިން ލަނޑުވެސް ޖެހީ ދެވަނަ ހާފްގައެވެ. މެޗުގެ ބޮޑުގައި ފުލަމް ކުޅުނީ ދިހަ ކުޅުންތެރިންނާ އެކުއެވެ. އެއީ 22 ވަނަ މިނެޓުގައި ހިމެނޭޒް އަށް ސީދާ ރަތްކާޑެއް ދެއްކުމުންނެވެ. އެއީ ސީން ލޯންގްސްޓާފް އަށް ކުރި ނުރައްކާތެރި ޗެލެންޖަކާ ގުޅިގެންނެވެ. ނިއުކާސަލް ހަ ވަނާގައި އޮތީ 29 ޕޮއިންޓާ އެކުއެވެ.