އެމްޑީޕީގެ ރިޔާސީ ކެންޑިޑޭޓާ ދެކޮޅަށް މަސައްކަތް ކުރި ފަރާތްތަކަށް ޕާޓީގެ ޓިކެޓު ނުދޭނެ
16 ޑިސެމްބަރު 2023 | ހޮނިހިރު 06:58ޕާޓީގެ ޤަވާއިދުގައި ބުނެފައިވާ ޝަރުތުތަކަށް ބަލާނެ
އެމްޑީޕީގެ ރިޔާސީ ކެންޑިޑޭޓު ގޮތުގައި ވާދަކުރެއްވި ކުރީގެ ރައީސް އިބްރާހިމް މުޙައްމަދު ސާލިޙު
ނިމިދިޔަ ރިޔާސީ އިންތިޚާބުގައި މޯލްޑިވިއަން ޑިމޮކްރަޓިކް ޕާޓީ (އެމްޑީޕީ) ގެ ރިޔާސީ ކެންޑިޑޭޓު ގޮތުގައި ވާދަކުރެއްވި ކުރީގެ ރައީސް އިބްރާހިމް މުޙައްމަދު ސާލިޙާ ދެކޮޅަށް އިންތިޚާބުގައި މަސައްކަތް ކުރި މެމްބަރުންނަށް ޕާޓީގެ ޓިކެޓު ނުދޭނެކަމަށް އެ ޕާޓީން ބުނެފިއެވެ.
ހޮނިހިރު ދުވަހު އެމްޑީޕީން ބޭއްވި ނޫސްވެރިންގެ ބައްދަލުވުމެއްގައި އެމްޑީޕީގެ ޑެޕިއުޓީ ޗެއާޕާސަން އިބްރާހިމް ވަހީދު (އިބުރޭ) ވިދާޅުވީ، ޓިކެޓު ދިނުމުގައި ހުރި ޝަރުތުތަކުގެ އިތުރުން، ޕާޓީއަށް ކޮށްދީފައިވާ ޚިދުމަތްތަކާއި، ޕާޓީގައި އުޅެފައިވާ މުއްދަތާއި، ޕާޓީގެ ޤަވާއިދުގައި ބުނެފައިވާ ޝަރުތުތަކަށްވެސް ބަލާނެކަމަށެވެ.
އެގޮތުން ބަލާއިރު، އެމްޑީޕީގެ ރިޔާސީ ކެންޑިޑޭޓުންނާ ދެކޮޅަށް ނުވަތަ ޕާޓީގެ ރޫޙާ ޚިލާފަށް މަސައްކަތް ކޮށްފައިވާ ފަރާތްތަކެއްނަމަ، އެކަން ބެލުމަށް އަމިއްލައަށްވެސް ހުށައަޅުއްވާނެކަމަށް އިބުރޭ ވިދާޅުވިއެވެ.
އެއީ ޕާޓީގެ ޓިކެޓު ލިބުމުގެ ޝަރުތު އުނިވާނެ ސަބަބެއްކަންވެސް އޭނާ ފާހަގަ ކުރެއްވިއެވެ.
2024 ވަނަ އަހަރު ބޭއްވުމަށް ހަމަޖެހިފައިވާ 20 ވަނަ ރައްޔިތުންގެ މަޖިލިސް އިންތިޚާބުގައި އެމްޑީޕީގެ ޓިކެޓްގައި ވާދަކުރަން ބޭނުންވާ އެމް.ޑީ.ޕީގެ މެމްބަރުންނަށް ފުރުސަތު ހުޅުވާލާފައިވާއިރު، މި ފުރުސަތު ހުޅުވާލާފައިވަނީ 16 ޑިސެމްބަރު 2023 ވާ ހޮނިހިރު ދުވަހުން ފެށިގެން 2023 ޑިސެމްބަރ 25 ވާ ހޯމަ ދުވަހުގެ ހަވީރު 04:00 އާ ހަމައަށެވެ.
