ރާއްޖޭގެ ފޮރިން ޕޮލިސީ ދިގު މުއްދަތަށް ކަނޑައަޅަންޖެހޭ: މެންބަރު ޔާސިރު
ކޮންމެ ވެރިކަމަކާއެކު ފޮރިން ޕޮލިސީ ބަދަލުވުމުން ދިވެހި ރައްޔިތުންނަށް އެކަމުގެ ދެރަ ލިބޭ
ކުޅުދުއްފުށި އުތުރު ދާއިރާގެ މެންބަރު ޔާސިރު އަބްދުއްލަތީފު
ރާއްޖޭގެ ފޮރިން ޕޮލިސީ ދިގު މުއްދަތަށް ކަނޑައަޅަންޖެހޭ ކަމަށް ކުޅުދުއްފުށި އުތުރު ދާއިރާގެ މެންބަރު ޔާސިރު އަބްދުއްލަތީފު ވިދާޅުވެއްޖެއެވެ.
ރާއްޖެޓީވީގައި ވާހަކަދައްކަވަމުން މެންބަރު ޔާސިރު ވިދާޅުވީ ކޮންމެ ފަސް އަހަރަކުން ފޮރިން ޕޮލިސީ ބަދަލުވުމަކީ ރާއްޖެއަށް ފޫނުބެއްދޭވަރުގެ ބޮޑެތި ގެއްލުންތައް ލިބޭނެ ކަމެއް ކަމަށާއި، މިކަމުގައި ހުރިހާ ސިޔާސީ ޕާޓީތައް އެއް މޭޒަކަށް އެއްވެ މަޝްވަރާކޮށް، ރާއްޖޭގެ ފޮރިން ޕޮލިސީ ދިގު މުއްތަކަށް ކަނޑައަޅަންޖެހޭ ކަމަށެވެ.
މެންބަރު ޔާސިރު ވިދާޅުވީ ކޮންމެ ވެރިކަމަކާއެކު ފޮރިން ޕޮލިސީ ބަދަލުވުމުން ދިވެހި ރައްޔިތުންނަށް އެކަމުގެ ދެރަ ލިބޭ ކަމަށެވެ. އިންޑިއާއަށް އިޝާރާތް ކުރައްވައި މެންބަރު ޔާސިރު ވިދާޅުވީ ޒަމާނުއްސުރެ ދިވެހިންނަކީ އަވައްޓެރި ގައުމުތަކާއި ގާތް ގުޅުމެއް ބާއްވާ ގައުމެއް ކަމަށާއި، އިންޑިއާއަކީ ގާތް އެކުވެރި ގައުމެއް ކަމަށެވެ. އަވައްޓެރި ގައުމުތަކާއި ގުޅުން މާބޮޑަށް ބަދަހިވުމަކީ އެހެން ގައުމުތަކާއި ރާއްޖެއާއި އޮންނަ ގުޅުން ހީނަރުވުން ނޫން ކަމަށް މެންބަރު ޔާސިރު ވިދާޅުވިއެވެ. އަދި ވިދާޅުވީ ރާއްޖެއަކީ ހުރިހާ ގައުމުތަކާއެކު ވެސް މަސައްކަތް ކުރާ ގައުމެއް ކަމަށެވެ.
މީގެ އިތުރުން މެންބަރު ޔާސިރު ވިދާޅުވީ ރިޔާސީ އިންތިޚާބު 2023 ގެ ކެންޕޭންގެ ތެރޭގައި އިދިކޮޅު ފަރާތްތައް ޕީޕީއެމް/ޕީއެންސީ އިންޑީއާބެހޭ ގޮތުން ހަގީގަތެއް ނެތް ދޮގު ގިނަ ވާހަކަތައް ފެތުރި ކަމަށެވެ. މިއަދު ޑރ.މުހައްމަދު މުއިއްޒަށް ވެރިކަން ލިބިވަޑައިގެންނެވުމުން އެދުވަހު އާއްމުކުރަން ގޮވި އެގްރިމެންޓްތައް މިއަދު ސިއްރުވެފައިވާ ކަމަށާއި، އިންޑިއާގެ ސިފައިންނުންނާއި ގުޅުވައިގެން ދެއްކީ ވެސް ހަގީގަތާއި ހިލާފު ވާހަކަތައްކަން ހާމަވަމުންދާ ކަމަށް މެންބަރު ޔާސިރު ވިދާޅުވިއެވެ.
މެންބަރު ޔާސިރު ވިދާޅުވީ ރާއްޖޭގެ ފޮރިން ޕޮލިސީ ރަނގަޅުކުރަންޖެހޭ ކަމަށާއި، އެކަމާއި ގުޅޭގޮތުން ފުންކޮށް ވިސްނައި ރަނގަޅު ފިޔަވަޅުތަކެއް އަޅަންޖެހޭ ކަމަށެވެ. އަދި ވިދާޅުވީ އެއްވެސް ހާލަތެއްގައި އެއްވެސް ގައުމަކާ ގުޅުން ކެނޑިގެން އެގޮތަށް މަސައްކަތް ކުރުމަކީ އަމާން މަންޒިލަކަށް ދެވޭނެ ގޮތެއް ނޫން ކަމަށެވެ.
