އިސްރާއީލުން ދިން ހަމަލާ އެއް އީރާނުގެ ފޮރިން މިނިސްޓްރީ އަށް އަމާޒުވެ، އިމާރާތަށާއި މުވައްޒަފުންނަށް ގެއްލުން ވެއްޖެއެވެ.

އީރާނުގެ ފޮރިން މިނިސްޓްރީން ވަނީ ވެރިރަށް ތެހުރާނުގައި ހުންނަ އެ މިނިސްޓްރީގެ އިމާރާތަކަށް އިސްރާއީލުގެ ސިފައިން ހަމަލާ ދިނުމާ ގުޅިގެން އިމާރާތަށާއި މިނިސްޓްރީގެ މުވައްޒަފުންނާއި އަދި އާންމު ބައެއް މީހުންނަށް އަނިޔާވެފައިވާތީ އެކަން ވަރަށް ހަރުކަށި އިބާރާތުން ކުށްވެރިކޮށްފައެވެ.

އާދީއްތަ ދުވަހު ނެރުނު ބަޔާނެއްގައި ޑެޕިއުޓީ ފޮރިން މިނިސްޓަރ ސައީދު ހަތީބްޒާދާ ވިދާޅުވެފައި ވަނީ މިއީ "މުޖުރިމު އިސްރާއީލު ސަރުކާރުން" "ގަސްތުގައި" ހިންގި ކަމެއް ކަމަށެވެ.

"އަނިޔާވި މީހުންގެ ތެރޭގައި އެކުގައި މަސައްކަތް ކުރާ އެތައް ބަޔަކު ހިމެނޭ. އެމީހުން ފަރުވާ ހޯދުމަށް ހޮސްޕިޓަލަށް ގެންދެވިފައި ވާނެ،" ހަތީބްޒާދާ ވިދާޅުވިއެވެ. އޭނާ އަކީ މިނިސްޓްރީގެ ފޮރިން ޕޮލިސީ ތިންކް ޓޭންކް ކަމުގައިވާ އިންސްޓިޓިއުޓް ފޮރ ޕޮލިޓިކަލް އެންޑް އިންޓަނޭޝަނަލް ސްޓަޑީޒް (އައިޕީއައިއެސް) ގެ އިސްވެރިޔާ ވެސް މެއެވެ.

ހަތީބްޒާދާ މި ހާދިސާ ސިފަކުރެއްވީ "އަނެއްކާވެސް ހިންގި ފާޅުކަން ބޮޑު ހަނގުރާމައިގެ ކުށެއް" ގެ ގޮތުގައެވެ. އަދި މިއީ އިސްލާމީ ޖުމްހޫރިއްޔާއާ ދެކޮޅަށް އިސްރާއީލު ސަރުކާރުން ހިންގާ "ދެމިގެންދާ އަދި ސިސްޓަމެޓިކް އަނިޔާވެރިކަމުގެ" ބައެއް ކަމަށްވެސް ވިދާޅުވިއެވެ.

ހުކުރު ދުވަހުގެ ހެނދުނުން ފެށިގެން އީރާނަށް އިސްރާއީލުން ގެންދަނީ ހަމަލާ ދެމުންނެވެ. މި އަނިޔާވެރިކަން ވެރިރަށް ތެހެރާން ހިމެނޭ ގޮތައް ގައުމުގެ އެކި ސަރަޙައްދު ތަކަށް ދަނީ ހުއްޓުމެއް ނެތި އަމާޒު ވަމުންނެވެ.

އިސްރާއީލުގެ އަނިޔާވެރި ޓެރަރިސްޓް ޢަމަލުތަކުގެ ސަބަބުން ގިނަ އަދަދެއްގެ އަސްކަރީ ވެރިންނާއި، ނިއުކްލިއަރ ސައިންޓިސްޓުންނާއި ކުޑަކުދިންނާއި އަންހެނުން ހިމެނޭ ގޮތަށް އާންމު ރައްޔިތުން ވަނީ ޝަހީދު ކޮށްލާފައެވެ.

މިކަމަށް ރައްދު ދިނުމުގެ ގޮތުން، އީރާނުން ވަނީ އޮޕަރޭޝަން ޓްރޫ ޕްރޮމިސް 3 ފަށާފައެވެ. މިއީ އިސްރާއީލުން ދިން ހަމަލާތަކަށް ބަދަލު ހިފުމުގެ ގޮތުން އީރާނުން ހިންގާ އަސްކަރީ އޮޕަރޭޝަނެއް ކަމަށް އެ ގައުމުން ބުނެއެވެ.

ހަމަލާތަކުގައި އީރާނުން މިހާތަނަށް 128 މީހުން މަރުވެ، 900 މީހުން ޒަޚަމަވެފައިވާ ކަމަށް ރިޕޯޓު ކޮށްފައިވެއެވެ އަނެއް ކޮޅުން އިސްރާއީލުން ބުނީ 13 މީހުން މަރުވެ 370 މީހުން ޒަޚަމްވެފައިވާ ކަމަށެވެ.