ލޮނުމަސްކަމަށް ދައްކައިގެން މިޔަރު އުރަހަ ބޭރުކުރަން އުޅުނު މައްސަލައިގައި އެކަކު އިއުތިރާފުވެއްޖެ
އެމީހުންގެ ފަރާތުން ފުރަތަމަ ހުށައަޅާފައިވަނީ ހަމައެކަނި ޖޫރިމަނާގެ އަދަބެއް އަންނަ ގޮތަށް އިއުތިރާފުގެ އެއްބަސްވުމަކަށް އައުމަށް
ރާއްޖޭއިން ބޭރުކުރަން އުޅުނު ގިނަ އަދަދެއްގެ މިޔަރު އުރަހަ ތަކެއް އަތުލައިގަތުން
ފޮށީގައި ބަންދުކޮށްފައިވާ ލޮނުމަސް ޝިޕްމެންޓެއްގެ ގޮތުގައި މިޔަރު އުރަހަތަކެއް ދިވެހިރާއްޖެއިން ބޭރުކުރަން އުޅުނު މައްސަލައިގައި ދެ މީހެއްގެ މައްޗަށް އުފުލާފައިވާ ދައުވާތަކުގެ އަޑުއެހުމެއް ބުރާސްފަތި ދުވަހު ކްރިމިނަލް ކޯޓުގައި ކުރިއަށް ގެންގޮސްފިއެވެ.
މޯލްޑިވްސް ކަސްޓަމްސް ސަރވިސްއާއި އޭވިއޭޝަން ސެކިއުރިޓީ ކޮމާންޑް ގުޅިގެން ހިންގި އޮޕަރޭޝަނެއްގައި މި ޝިޕްމަންޓު އަތުލައިގެންފައިވަނީ 2021 ވަނަ އަހަރުގެ ޖެނުއަރީ މަހުގެ 3 ވަނަ ދުވަހުއެވެ.
މި މައްސަލައިގައި ދައުވާ އުފުލާފައިވަނީ މ. ސެންޓްރޯސެމާ، ޢައްބާސް ޢަބްދުﷲއާއި ހދ. ކުޅުދުއްފުށި، ކިރުދޫނިގެ، އަޙުމަދު މުޙައްމަދުގެ މައްޗަށެވެ.
އެމީހުންގެ މައްޗަށް އުފުލާފައިވާ ދައުވާތައް:
އެމީހުންގެ މައްޗަށް އުފުލާފައިވާ ދައުވާތަކުގެ ތެރޭގައި ސިއްރުން މުދާ އެތެރެކުރުމުގެ ކުށުގެ ދައުވާވެސް ހިމެނޭއިރު، އެ ދައުވާ ސާބިތުވެއްޖެނަމަ، 10،000 ރުފިޔާއާއި 2 ލައްކަ ރުފިޔާއާ ދެމެދުގެ ޖޫރިމަނާއެއް ނުވަތަ 12 މަސް ދުވަހުގެ ޖަލު ޙުކުމެއް އަންނާނެއެވެ.
އެ ދެމީހުންގެ ފަރާތުން މީގެ ކުރިން ވަނީ އިއުތިރާފު އެއްބަސްވުމަކަށް ދާން ބޭނުންވާކަމަށް ބުނެ ސިޓީއެއް ހުށައަޅާފައެވެ. ނަމަވެސް އެކަން އެގޮތަށް ކުރެވެން ނެތްކަމަށް ދައުލަތުން ބުނެއެވެ.
ދައުލަތުގެ ވަކީލު ވިދާޅުވީ، އެމީހުންގެ ފަރާތުން ހުށައަޅާފައިވަނީ ހަމައެކަނި ޖޫރިމަނާގެ އަދަބެއް އަންނަ ގޮތަށް އިއުތިރާފުގެ އެއްބަސްވުމަކަށް އައުމަށް ކަމަށެވެ. ނަމަވެސް ޙުކުމުގެ ކޮންމެސް މިންވަރެއް ޖަލު އަދަބުގެ ގޮތުގައި ތަންފީޒު ކުރަންޖެހޭނެކަމަށް ދައުލަތުން ވަނީ އެ ފަރާތްތަކަށް އަންގާފައެވެ.
މި އަޑުއެހުމުގައިވެސް ދައުވާލިބޭ ދެމީހުން ވަނީ ދައުލަތާއެކު އިއުތިރާފުގެ އެއްބަސްވުމަކަށް ދާން ބޭނުންވާކަމަށް ބުނެފައެވެ. ނަމަވެސް ޖަލު ބަންދެއް ނާންނަ ގޮތަކަށް އިއުތިރާފުގެ އެއްބަސްވުމަކަށް ދާން ބޭނުންވާކަމަށް އެމީހުން ބުނެފައިވެއެވެ.
މި މައްސަލައިގައި ދައުވާވެސް އިއްވާފައިވާއިރު، ދައުވާލިބޭ ދެމީހުންވެސް ހާޒިރުވެފައިވަނީ ވަކީލަކު ނެތިއެވެ. އެމީހުން ވަކީލެއްގެ ފުރުސަތު ބޭނުންނުވާކަމަށް ބުނާތީ ޝަރީއަތުން ވަނީ ވީ އެންމެ ބޮޑަށް މައްސަލައިގެ ޤާނޫނީ ކަންކަން ސާފު ކޮށްދެއްވާފައެވެ.
ގާޒީ ވިދާޅުވީ، ޖަލު އަދަބު ފިޔަވައި އިތުރު އަދަބެއް ކަނޑައަޅާ ޙާލަތުގައި ޖޫރިމަނާގެ އެންމެ ބޮޑު އަދަބެއް ކަނޑައަޅައި، އެ ފައިސާ 4 މަސް ދުވަހުގެ ތެރޭގައި މީރާއަށް ދައްކަންޖެހޭގޮތަށް އެންގުމަށް ޝަރީއަތުގެ ވިސްނުން ހުރިކަމަށެވެ.
ދައުވާއަށް ޖަވާބުދާރީވަމުން އައްބާސް ވަނީ ދައުވާއަށް އިއުތިރާފުވާކަމަށް ބުނެފައެވެ. އެގޮތުން 26 ދާގީނާ ގެންދިޔައިރު އޭގައި މިޔަރު އުރަހަ ހުރިކަން އެނގިހުރެ، އޭގައި ހުރީ ލޮނުމަސްކަމަށް ބުނެފައިވާނެކަމަށް އޭނާ ބުންޏެވެ.
ގާޒީ ވިދާޅުވީ، އައްބާސް އަބްދުﷲ ގެ ބައިގައި އޭނާ އިއުތިރާފުވެފައިވާތީ އަވަސްނިޔާގެ އަޑުއެހުމެއް ބާއްވަވާނެކަމަށެވެ.
އަހުމަދު މުޙައްމަދު ބުނެފައިވަނީ އެތަކެތި ބަންދުކުރީ ބަންގްލަދޭޝް ކުދިންތަކެއް ކަމަށާއި، އެ މުދާ ހިފައިގެން އޭނާ އެއާޕޯޓަށް ގޮސްފައިވާނެކަމަށެވެ. އޭގައި މިޔަރު އުރަހަ ހުރިކަން ނޭނގޭކަމަށް ބުނެ އޭނާ ވަނީ ދައުވާއަށް އިންކާރުކުރާކަން ހާމަކޮށްފައެވެ.
އަހުމަދު މުޙައްމަދަށް ކުރާ ދައުވާގައި އޭނާ އިންކާރުކޮށްފައިވާތީ، ދެން އޮންނާނީ ދެފަރާތުންވެސް ހެކި ހާމަކުރުންކަން ގާޒީ ފާހަގަ ކުރެއްވިއެވެ.
މި ފަހަކަށް އައިސް، ގަވައިދާ ޚިލާފަށް މިޔަރު މަސްވެރިކަން ކުރުމާއި، މިޔަރުމަހާއި އުރަހަ ޕްރޮސެސް ކުރުން، ރާއްޖޭގައި ވަނީ ވަރަށް ބޮޑަށް އިތުރުވެފައެވެ.
