އަނިޔާ ލިބުނު ރެފްރީ، ފަރުވާ އަށް ފަހު ހޮސްޕިޓަލުން ދޫކޮށްލައިފި
ހަލީލަށް ވަނީ އަންކާރާ ހޮސްޕިޓަލުގައި 36 ގަޑިއިރު ވަންދެން ފަރުވާ ދީފައި
ހަލީލް އުމެޓް މެލާ ހޮސްޕިޓަލުން ނިކުންނަނީ
ތުރުކީ ސުޕަ ލީގުގައި ރިޒެސްޕޯ އަދި އަންކާރަގުޗޫ ބައްދަލު ކުރި މެޗުގެ ރެފްރީއަކަށް ހުރި، ހަލީލް އުމެޓް މެލާ އަށް ލިބުނު އަނިޔާއާ ގުޅިގެން، ހޮސްޕިޓަލުގައި ފަރުވާ ދިނުމަށްފަހު ގެޔަށް ދޫކޮށްލައިފި އެވެ.
އެ ދެ ޓީމު ބައްދަލު ކުރި މެޗު އެއްވަރުވެގެން ނިމުނުއިރު، މެޗު ނިމުމާއެކު އަންކާރަގުޗޫގެ ރައީސް ފާރުކް ކޯޗާ ވަނީ ދަނޑަށް އަރައި ހަލީލަށް ހަމަލާ ދީފައެވެ. އޭނާ ވަނީ ހަލީލްގެ މޫނު މަތީގައި ޖަހައިފައެވެ. އެކަމުގެ ސަބަބުން ހަލީލަށް ވަނީ އަންކާރާ ހޮސްޕިޓަލުގައި 36 ގަޑިއިރު ވަންދެން ފަރުވާ ދީފަ އެވެ. ހޮސްޕިޓަލުގައި އޭނާ އަށް ފަރުވާ ދެމުން ދިޔައިރު، އެ ޤައުމުގެ ރައީސް ތައްޔިބް އުރުދުޣާން ވަނީ އޭނާގެ ޙާލު ބައްލަވައިފަ އެވެ.
ހޮސްޕިޓަލުން ބުނީ ހަލީލް އުމެޓް މެލާ ދޫކޮށްލީ އޭނާގެ ހާލު ރަނގަޅުވުމުން ކަމަަށެވެ. ގެޔަށް ބަދަލު ކުރި ނަމަވެސް އޭނާގެ ޙާލަތު ގާތުން ބެލޭނެ އިންތިޒާމުތައް ހަމަޖައްސާފައިވާނެ ކަމަށް ވެސް ހޮސްޕިޓަލުން ވަނީ ބުނެފަ އެވެ. ލިބުނު އަނިޔާގެ ސަބަބުން، ގެޔަށް ދޫކޮށްލިއިރު ވެސް އޭނާގެ ލޮލުގައި ރިއްސުން ހުންނާނެ ކަމަށް ވެސް ހޮަސްޕިޓަލުން ވަނީ ފާހަގަކޮށްފަ އެވެ. ހޮސްޕިޓަލުން ވެސް ވަނީ އޭނާ އަށް ފުރިހަމަ، އަވަސް ޝިފާ އަކަށް އެދިފަ އެވެ.
ހަލީލް އުމެޓް މެލާ އަށް ހަމަލާ ދިން މައްސަލައިގައި އަންކާރަގުޗޫގެ ރައީސް ފާރުކް ކޯޗާ މިހާރު ވަނީ ހައްޔަރު ކޮށްފަ އެވެ. އޭނާ ހައްޔަރު ކުރުމަށްފަހު، ފުލުހުން އަންނަނީ އެ މައްސަލަ ތަހުގީގު ކުރަމުންނެވެ. އެ މައްސަލަ ތަހުގީގު ކުރުމަށް ތުރުކީގެ ސަރުކާރުން ވެސް ވަނީ ވަރަށް ބޮޑަށް ބާރު އަޅައިފަ އެވެ.
