ވަރިވާން ދިޔަ އަންހެނަކަށް ޒާތީ މެސެޖް ފޮނުވި މެޖިސްޓްރޭޓް މަގާމުން ވަކިކޮށްފި
އޭނާ މަގާމުން ވަކިކުރުމަށް 46 މެންބަރުން ވޯޓު ދެއްވި
ޒާތީ މެސެޖް ފޮނުވި މެޖިސްޓްރޭޓް، އަލީ އާދަމް
ވަރިވާން ދިޔަ އަންހެނަކަށް ޒާތީ މެސެޖް ފޮނުވި މެޖިސްޓްރޭޓް އަލީ އާދަމް މަގާމުން ވަކިކޮށްފިއެވެ.
އަލީ އާދަމް ވަކިކުރަން ނިންމައި، ދެ މައްސަލައެއް ޖޭއެސްސީން މަޖިލީހަށް ފޮނުވިއެވެ. އެ ދެ މައްސަލަ ދިރާސާ ކުރުމަށްފަހު ޖުޑިޝަރީ ކޮމިޓީން ނިންމީ، އޭނާ ވަކިކުރުމަށްޓަކައި ޖޭއެސްސީން މަޖިލީހަށް ފޮނުވީ ގާނޫނުއަސާސީއާއި ގާނޫނުގައި ބުނާ އިޖުރާއަތާ އެއްގޮތަށް ކަމަށެވެ.
އަލީ އާދަމް މަގާމުން ވަކިކުރުމާމެދު މެންބަރުންނަށް ފެނިވަޑައިގަންނަވާ ގޮތަކަށް ވޯޓު ދެއްވުމަށް ރިޔާސަތުން ހުޅުވާލުމުން، އޭނާ ވަކިކުރުމަށް 46 މެންބަރުން ވޯޓު ދެއްވިއެވެ. އަލީ އާދަމް މަގާމުން ވަކިކުރުމާ ދެކޮޅަށް އެއް މެންބަރަކު ވޯޓު ދެއްވިއެވެ.
ވަރިވާން ދިޔަ އަންހެނަކަށް ގުޅައި މެސެޖްކުރި މައްސަލާގައި ޖޭއެސްސީން އެ މައްސަލަ ބަލައި، އޭނާ މަގާމުން ވަކިކުރަން ފުރަތަމަ ހުށަހެޅީ ޖުލައި މަހުގައެވެ. އަދި އެ މައްސަލާގައި މަޖިލީހުން ގޮތެއް ނުނިންމައި އޮއްވައި އަލީ އާދަމްގެ އެފަދަ އިތުރު މައްސަލައެއް ފެންމަތިވިއެވެ. އަދި ޖޭއެސްސީން ވަނީ އޭނާ ހދ. ޖުޑީޝަލް ދާއިރާގެ އިސް މެޖިސްޓްރޭޓް މަގާމުން މެޖިސްޓްރޭޓުގެ މަގާމަށް ދަށްކޮށްފައެވެ.
އަލީ އާދަމްގެ މައްސަލާގައި މަޖިލީހުގެ ޖުޑީޝަރީ ކޮމިޓީން އޭނާއަށް ޖަވާބުދާރީވާން ފުރުސަތު ދީފައިވެއެވެ. އަދި ކޮމިޓީގައި މި މައްސަލަ ބެލުމަށްފަހު ކޮމިޓީން ނިންމީ އޭނާ މަގާމުން ދުރުކުރުމަށެވެ.
ހދ ޖުޑީޝަލް ދާއިރާގެ އިސް މެޖިސްޓްރޭޓް އަލްއުސްތާޒު އަލީ އާދަމާ ގުޅޭގޮތުން ތަހުގީގުކުރި މައްސަލާގައި، ހދ. ކުޅުދުއްފުށީ މެޖިސްޓްރޭޓް ކޯޓަށް ވަރިވުމަށް އެދި ހުށަހެޅި މައްސަލަ އެކޯޓުގައި ހިނގަމުންދަނިކޮށް، އެ ގަޒިއްޔާ ބަލަމުންދިޔަ އިސްމެޖިސްޓްރޭޓް އަލީ އާދަމް، ދައުވާގައި ހިމެނޭ ޚަސްމަކަށް ގުޅައި، މެސެޖުކޮށް، ހުށަހަޅާފައިވާ މައްސަލައާ ގުޅޭގޮތުން ޝަރީއަތުގެ ބޭރުން އެކި ވާހަކަތައް ދައްކައި، ރަހުމަތްތެރިކަން ބާއްވަން ހުށަހަޅައި، ދެމަފިރިކަމުގެ ގުޅުމުގެ ޒާތީ މައުލޫމާތު އަހައި، މި ނޫންވެސް ޒާތީ އެކި މެސެޖުތައް ކޮށް، ކުރާ މެސެޖުތައް ޑިލީޓްކޮށްފައި ބެހެއްޓުމަށް އެދި މެޖިސްޓްރޭޓް އަލީ އާދަމް މުވާސަލާތު ކޮށްފައިވާކަން، ތަހުގީގަށް ލިބިފައިވާ ސްކްރީންޝޮޓްތަކުންނާއި، ބަޔާންތަކުންނާއި، އަދި އިސް މެޖިސްޓްރޭޓް އަލީ އާދަމްގެ އިއުތިރާފުން ސާބިތުވާކަމަށް ޖޭއެސްސީން ބުނެއެވެ.
