ސައޫދީ އަރަބިއްޔާގެ އަންހެން ޓީމަށް ބާސެލޯނާގެ ކާމިޔާބު ކޯޗު ކޯޓޭސް

ސައޫދީ އަރަބިއްޔާގެ ޤައުމީ އަންހެން ފުޓުބޯޅަ ޓީމުގެ ކޯޗަކަށް ސްޕެއިންގެ ލުއިސް ކޯޓޭސް ހަމަޖައްސައިފިއެވެ.

އުމުރުން 37 އަހަރުގެ ކޯޓޭސް ސައޫދީ ޤައުމީ ޓީމާ ހަވާލުވީ ހަތަރު އަހަރު ދުވަހުގެ އެއްބަސްވުމެއްގެ ދަށުންނެވެ. ސައޫދީ ޤައުމީ ޓީމާއެކު އޭނާ ސޮއިކުރި އެއްބަސްވުމުގެ މުއްދަތު ހަމަވާނީ 2027 ވަނަ އަހަރުގެ ނިޔަލަށެވެ. ސައޫދީ ޤައުމީ އަންހެން ޓީމުގެ ކޯޗަކަށް ކޯޓޭސް ހަމަޖެއްސިކަން، ސައޫދީ އަރަބިއްޔާގެ ފުޓުބޯޅަ ފެޑެރޭޝަނުން ވަނީ ރަސްމީކޮށް އިއުލާންކޮށްފައެވެ. ސައޫދީ އަންހެން ޓީމުގެ ކޯޗަކަށް ކޯޓޭސް ހަމަޖެއްސީ ކުރިން އެ މަޤާމުގައި ހުރި ރޯޒާ ލަޕީ-ސެޕްޕާލާ ދުރުކުރުމަށްފަހު އެވެ. އެ މަގާމަށް އޭނާ ހަމަޖެއްސީ މިއަހަރުގެ ފެބްރުވަރީ މަހުއެވެ. ޓީމާ ހަވާލުވިތާ 10 މަސް ފަހުން، ސައޫދީ ފުޓުބޯޅަ ފެޑެރޭޝަނުން ވަނީ އޭނާ މަގާމުން ވަކި ކުރަން ނިންމައިފައެވެ.

ކުރިން މިޑްފީލްޑަރެއްގެ ގޮތުގައި ފުޓުބޯޅަ ކުޅުނު ކޯޓޭސް، ކޯޗިން ކެރިއަރު ފެށީ 2017 ވަނަ އަހަރުއެވެ. އޭނާ އެންމެ ފުރަތަމަ ހުރީ ސްޕެއިންގެ ބާސެލޯނާގެ އަންހެން ޓީމުގެ އެސިސްޓެންޓު ކޯޗަކަށެވެ. އޭގެ ދެ އަހަރު ފަހުން، 2019 ވަނަ އަހަރު ވަނީ އެ ކުލަބުގެ ކޯޗުކަމާ ހަވާލުވެފައެވެ. އޭނާގެ އިރުޝާދުގެ ދަށުން ބާސެލޯނާ އިން ވަނީ 2020/21 ވަނަ ސީޒަންގައި ތިން ތަށި ކާމިޔާބުކޮށްފައެވެ. އެއީ ބާސެލޯނާގެ އަންހެން ޓީމުގެ ތާރީޚުގައި ވެސް އެންމެ ކާމިޔާބު އެއް ސީޒަނެވެ.

ބާސެލޯނާގެ ކޯޗުކަމުގަައި ދެ އަހަރު ހުރުމަށްފަހު، 2021 ވަނަ އަހަރު ކޯޓޭސް ދެން ހަވާލުވީ ޔޫކްރެއިންގެ ޤައުމީ އަންހެން ފުޓުބޯޅަ ޓީމުގެ ކޯޗުކަމާއެވެ. ޔޫކްރެއިންގެ ކޯޗުކަމުގައި ވެސް ކޯޓޭސް ވަނީ ކާމިޔާބު މަސައްކަތްތަކެއް ކޮށްފައެވެ. ސައޫދީ ފުޓުބޯޅަ ފެޑެރޭޝަނުން އެ ޤައުމުގެ އަންހެން ޓީމުގެ ކޯޗުކަމަށް ކޯޓޭސް ހަމަޖެއްސީ، އަންހެން ފުޓުބޯޅަ އިތުރު ހަރުފަތަކަށް ގެންދިޔުމަށް ކުރަމުން އަންނަ މަސައްކަތުގެ ދަށުންނެވެ.