ލާމަރުކަޒީ ނިޒާމުގެ ދަށުން މާލެސިޓީއަށް ބޭނުންވާ ފެހިފަހި ތަނަވަސް މާލެއެއް ހޯދައިދޭނީ އެމްޑީޕީން: ޝާހިދު
11 ޑިސެމްބަރު 2023 | ހޯމަ 07:36ލާމަރުކަޒީ ނިޒާމަކީ އެމްޑީޕީގެ ދަރިއެއް
ކުރީ ސަރުކާރުގެ ފޮރިން މިނިސްޓަރު އަބްދުﷲ ޝާހިދު
ލާމަރުކަޒީ ނިޒާމުގެ ދަށުން މާލެސިޓީއަށް ބޭނުންވާ ފެހިފަހި ތަނަވަސް މާލެއެއް ހޯދައިދޭނީ އެމްޑީޕީން ކަމަށް ކުރީ ސަރުކާރުގެ ފޮރިން މިނިސްޓަރު އަބްދުﷲ ޝާހިދު ވިދާޅުވެއްޖެއެވެ.
"ފެހި ތަނަވަސް މާލެ" ކެމްޕޭންގެ ތެރެއިން މާލެ ސިޓީ މޭޔަރު އަދި ކައުންސިލްގެ ހުސްވެފައިވާ 3 ދާއިރާއަށް ވާދަކުރައްވާ އެމްޑީޕީގެ ކެންޑިޑޭޓުންގެ ކެމްޕޭން ރަސްމީކޮށް ފެށުމުގެ ޖަލްސާގައި ވާހަކަފުޅު ދައްކަވަމުން ޝާހިދު ވިދާޅުވީ މާލެ ކުނިވަމުންދިޔަ ގޮތް ފެނިފައިވާ ކަމަށާއި، މާލޭގެ ރައްޔިތުން މިއަދު ބުނަމުންދަނީ ފެހިފަހި ތަނަވަސް މާލެއެއް ބޭނުންވާ ކަމަށެވެ. މާލޭގެ ރައްޔިތުންގެ އެދޭ ގޮތަށް ކަންކަން ކުރެއްވުމަށް ނުކުމެވަޑައިގެން ހުންނެވީ މާލޭގެ މޭޔަރު ކަމަށް ވާދަކުރެއްވުމަށް އާދަމް އާޒިމް ކަމަށާއި، އެއީ ގާބިލް ހިތްވަރުގަދަ ކެންޑިޑޭޓެއް ކަމަށެވެ. އަދި އެހީތެރިންގެ ގޮތުގައި ވެސް ނުކުމެވަޑައިގެން ތިއްބެވީ ވެސް ހިންގުމުގައި ތަޖުރިބާ ހުރި އެމްޑީޕީގެ ބޭފުޅުން ކަމަށް ޝާހިދު ވިދާޅުވިއެވެ.
ޝާހިދު ވިދާޅުވީ މާލެ ރައްޔިތުން އެދޭފަދަ ފެހިފަހި ތަނަވަސް މާލެއެއް ހޯދައިދެވޭނީ އެމްޑީޕީއަށް ކަމަށެވެ.
މީގެ އިތުރުން ލާމަރުކަޒީ ނިޒާމަށް އިޝާރަތް ކުރައްވައި ޝާހިދު ވިދާޅުވީ ލާމަރުކަޒީ ނިޒާމަކީ އެމްޑީޕީގެ ދަރިއެއް ކަމަށާއި، ލާމަރުކަޒީ ނިޒާމު އުފެދުނީއްސުރެ ހަލާކުކޮށްލަން އުޅުނު ބަޔަކަށް ލާމަރުކަޒީ ނިޒާމެއް ނުހިންގޭނެ ކަމަށެވެ. އެކަން މިސަރުކާރުގެ ތެރެއިން މިހާރު ވެސް ފެންނަމުންދާ ކަމަށް ޝާހިދު ވިދާޅުވިއެވެ.
ޝާހިދު ވިދާޅުވީ ރާއްޖެ އަނބުރާ ރާއްޖޭގެ ރައްޔިތުންނަށް ހޯދައިދޭނެ ކަމަށާއި، އެމްޑީޕީން ފަހަތަށް ނުޖެހޭނެ ކަމަށެވެ. އެމްޑީޕީން އަލުން މިނުކުންނަނީ އެމްޑީޕީ އަލިގަދަ ރީދޫކުލަ މިމާލޭގައި ފާއްދާލުމަށް ކަމަށް ޝާހިދު ވިދާޅުވިއެވެ.
