އެސެޓް ރިކަވަރީގެ މޮޑެލް ގާނޫނު ޑްރާފްޓްކޮށް ނިމިއްޖެ، ވަރަށް އަވަހަށް ހުށަހަޅާނަން: އޭސީސީގެ ރައީސް

އެސެޓް ރިކަވަރީގެ މޮޑެލް ގާނޫނު ޑްރާފްޓްކޮށް ނިމިފައިވާ ކަމަށް، އެންޓި-ކޮރަޕްޝަން ކޮމިޝަން (އޭސީސީ)ގެ ރައީސް އާދަމް ޝާމިލް ވިދާޅުވެއްޖެއެވެ.

ބައިނަލްއަގުވާމީ އެންޓި-ކޮރަޕްޝަން ދުވަސް ފާހަގަކުރުމަށް ބުރާސްފަތި ދުވަހު ބޭއްވި ޖަލްސާގައި ޝާމިލް ވިދާޅުވީ، އެސެޓް ރިކަވަރީގެ މޮޑެލް ގާނޫނު ޑްރާފްޓްކޮށް ނިމިފައިވާއިރު، އެ ޑްރާފްޓް ވަރަށް އަވަހަށް ކަމާބެހޭ އިދާރާތަކަށް ހުށަހަޅުއްްވާނެ ކަމަށެވެ. އެ ގާނޫނު ޑްރާފްޓްކޮށްފައިވަނީ ޓްރާންސްޕޭރެންސީ މޯލްޑިވްސްއާ ގުޅިގެން، ކަމާގުޅޭ ފަންނީ ބޭފުޅެއްގެ ލަފާގެ މަތިން ކަމަށްވެސް ވިދާޅުވިއެވެ.

އޭސީސީގެ ތަހުގީގު ހަރުދަނާކުރުމަށް މުޅިން އައު ކޭސް މެނޭޖްމަންޓް ސިސްޓަމެއް ތަރުތީބުކޮށް، ބޭނުންކުރުމާ ހަމައަށް ގެނެސްފައި ވާނެކަމަށްވެސް ވިދާޅުވިއެވެ.

އޭސީސީގެ މަސައްކަތާ ހަވާލުވެވަޑައިގަތް ފަހުން 1 އަހަރާއި 9 މަސް މަސައްކަތުގައި ހޭދަވެއްޖެކަން ފާހަގަކުރައްވައި ޝާމިލް ވިދާޅުވީ، މިހާތަނަށްވެސް މަސައްކަތްތައް ބައްޓަންކުރެއްވީ އޭސީސީގެ ގާނޫނާ އެއްގޮތްވާ ގޮތުގެ މަތިން ކަމަށެވެ.

ބައެއް ފަހަރު މުޖުތަމައުންވެސް ކޮރަޕްޝަނާ ދެކޮޅަށް މަސައްކަތްކުރާ މީހުންގެ މަތިން ހަނދާންނެތޭ ކަމަށާއި، އެފަދަ ފަރާތްތަކުގެ އަގު ވަޒަންކުރުމަކީ މުހިންމުކަމެއް ކަމަށް ވިދާޅުވިއެވެ. ޝާމިލް ވަނީ އޭސީސީގެ މުވައްޒަފުން ކުރައްވަމުން ގެންދަވާ ބުރަ މަސައްކަތް ފާހަގަކުރައްވައި ޝުކުރު އަދާކުރައްވާފައެވެ.

އެންމެ އިސްކަމެއް ދެއްވައިގެން ކުރައްވާ މަސައްކަތަކީ މީހުން ބިނާކުރެއްވުން ކަމަށާއި، އެންޓި ކޮރަޕްޝަންގެ ދާއިރާއިން ރާއްޖެއިން މުވައްޒަފުން ހޯދުން ނުހަނު ދަތިކަމަށް ވިދާޅުވިއެވެ. އެހެންކަމުން މިހާތަނަށްވެސް މަސައްކަތް ކުރެއްވީ ދާއިރާއިން ފަންނުވެރި ގާބިލު ބަޔަކު އުފެއްދެވުމަށް ކަމަށް ޝާމިލް ވިދާޅުވިއެވެ.