ޕީއެންއެފް އުފެއްދުމަށް 3،000 ފޯމު ހަމަވެ، އިލެކްޝަންސްއަށް ހުށަހެޅުމުގެ މަސައްކަތް ކުރިއަށް

ރައީސް ޔާމީން އުފައްދަވާ ޕީޕަލްސް ނޭޝަނަލް ފްރޮންޓް (ޕީއެންއެފް) އުފެއްދުމަށް 3،000 މެމްބަރުންގެ ފޯމު މިހާރު ވެސް ހަމަކުރެވިފައިވާ ކަމަށާއި، މިހާރު ކުރެވެމުންދަނީ އިލެކްޝަންސް ކޮމިޝަނަށް އެ ފޯމުތައް ހުށަހެޅުމުގެ މަސައްކަތް ކަމަށް އެ ޕާޓީގެ އިސްކޮށް އުޅުއްވާ ކުރީގެ ޓެކްނޮލޮޖީ މިނިސްޓަރު މަލީހް ޖަމާލު ވިދާޅުވެއްޖެއެވެ.

ޕީއެންއެފް އުފެއްދުމުގެ އެންމެ ފަހުގެ މައުލޫމާތު "ރާއްޖެ އެމްވީ" އަށް ދެއްވަމުން މަލީޙް ވިދާޅުވީ ޕާޓީ އުފެއްދުމަށް ބޭނުންވާ އަދަދަށް ފޯމުތައް ހަމަކުރެވިފައިވާ ކަމަށާއި، މިހާރު ކުރިއަށް ދަނީ އިލެކްޝަންސްއަށް ހުށަހެޅުމަށް އެ ފޯމުތައް ވެރިފައި ކުރުމުގެ މަސައްކަތް ކަމަށެވެ.

އެގޮތުން އިލެކްޝަންސް ކޮމިޝަނުގެ ފަރާތުން އެ ޕާޓީއަށް ބޭނުންވާ އޮންލައިން ޕޯޓަލް ނުލިބުމުގެ ސަބަބުން ރާއްޖޭގެ ކަންކޮޅުތަކުން އަދި ރާއްޖެއިން ބޭރުން ފުރި ފޯމުތައް ޕްރޮސެސް ކުރުމުގައި ދަތިތަކެއް ކުރިމަތިވި ނަމަވެސް، މިހާރު އެ ފޯމުތައް މާލެއަށް ގެނެސް ޕްރޮސެސް ކުރުމުގެ މަސައްކަތް ކުރައްވަމުން ގެންދަވާ ކަމަށް މަލީހް ވިދާޅުވިއެވެ.

"އަލަށް ޕާޓީއެއް އުފައްދަވާއިރު ހުރޭ ދެއްތޯ ދަތިތަކެއް. ތަފާތު ކަންތައްތަކެއް. މިސާލަކަށް ޕާޓީއަށް ރަޖިސްޓްރީ ކުރާ މީހާގެ މަންމަގެ އައިޑީކާޑު ނަންބަރު ވެސް ޖަހަން ޖެހޭ. އައިޑީކާޑުގައި އިންނަ ފޮޓޯ އާ ޕާޓީގެ ފޯމުގައި އިންނަ ފޮޓޯ އެއް ފޮޓޯއަކަށް ނުވެވޭ. އެހެންވީމާ އެ ފޯމުތައް ވެރިފައި ކުރުމުގެ މަސައްކަތް ކުރިއަށް ގެންދަނީ،" މަލީހް ވިދާޅުވިއެވެ.

މަލީހް ވިދާޅުވީ އެ މަސައްކަތް ކުރިއަށް ގެންދިޔުމުގައި ލަސްތަކެއް ކުރިމަތިވި ނަމަވެސް، އަމާޒަކީ ވީހާ ވެސް އަވަހަކަށް އެ މަސައްކަތް ކުރުން ކަމަށެވެ.

މަލީޙް އިތުރަށް ވިދާޅުވީ އެ ޕާޓީއަށް ވަނުމަށް، ގިނަ ފަރާތްތަކުން އެދެމުންދާ ކަމަށާއި، އެ މަސައްކަތް ޕާޓީ އުފެއްދުމުގެ މަސައްކަތް ނިންމުމަށްފަހު ފަށާނެ ކަމަށެވެ.