މިވަގުތު ކުރަމުން އަންނަނީ އެއަރޕޯޓްތަކުގެ ހާލަތު ދެނެގަތުމުގެ މަސައްކަތް: މުބީން

ރީޖަނަލް އެއަރޕޯޓް ކުންފުނިން މިހާރު ކުރަމުން އަންނަ މަސައްކަތަކީ ކުންފުނީގެ ބެލުމުގެ ދަށުގައި އޮތް 7 އެއަރޕޯޓްގެ ހާލަތު ދެނެގަތުމުގެ މަސައްކަތްކަމަށް އެކުންފުނީގެ މެނޭޖިންގ ޑިރެކްޓަރ އަހުމަދު މުބީން ވިދާޅުވެއްޖެއެވެ.

ރީޖަނަލް އެއަރޕޯޓް ކުންފުނީގެ މަސައްކަތްތަކާއި ގުޅޭގޮތުން ރާއްޖެޓީވީގެ "ފަލަސުރުޚީ" ޕްރޮގްރާމްގައި ވާހަކަދައްކަވަމުން މުބީން ވިދާޅުވީ އެއަރޕޯޓްތައް އެސެސްކުރުމުގެ މަސައްކަތް ކުރިޔަށްދާއިރު ކުރިޔަށް އޮތް މަސްދުވަސްތެރޭގައި އެއަރޕޯޓްތަކުގެ ހާލަތު ދެނެގަނެވޭނެކަމަށެވެ. އަދި މިހާރުން މިހާރަށްވެސް ބައެއް އެއަރޕޯޓްތަކަށް ކުރަންޖެހޭ ކަންކަން ކުރަމުންދާކަމަށް މުބީން ވިދާޅުވިއެވެ.

އެގޮތުން މިހާރުވެސް ގިނަ އެއަރޕޯޓްތަކެއް ހުރީ މަރާމާތުކުރަންޖެހިފައި ކަމަށާއި ފެން ލީކުވުން ފަދަ މައްސަލަތައް ކުރިމަތިވަމުން އަންނަކަމަށެވެ. އެހެންކަމުން ކޮންމެ އެއަރޕޯޓެއްގެ ހާލަތު ވަކިވަކިން ދެނެގަތުމުގެ މަސައްކަތްކުރަމުން އަންނަކަމަށް މުބީން ވިދާޅުވިއެވެ.

މީގެއިތުރުން މުބީން ވިދާޅުވީ ރައީސުލްޖުމްހޫރިއްޔާ ޑރ މުހައްމަދު މުއިއްޒުގެ ރިޔާސީ ވައުދުގެ ތެރެއިން ފުރަތަމަ 100 ދުވަހުގެ ތެރޭގައި ކުޅުދުއްފުށީ އެއަޕޯޓްގެ އެކްސްޓެންޝަން މަސައްކަތްކުރިޔަށްދާނެކަމަށެވެ. އެއާއެކު އެ އެއަރޕޯޓްގައި ހައްލުކުރަން ހުރި ކަންކަންވެސް ހައްލުކުރާނެކަމަށް މުބީން ވިދާޅުވިއެވެ.

އެއަރޕޯޓްތަކުގައި ހުންނަ މައްސަލަތައް ހައްލުކުރުމަށް ކުރިޔަށް އޮތްތަނުގައި އެއަރޕޯޓްތައް ޑިޒައިންކުރާ ހިސާބުން ފެށިގެން ރީޖަނަލް އެއަރޕޯޓްގެ ބައިވެރިވުން އޮންނާނެކަމަށް މުބީން ވިދާޅުވިއެވެ. އަދި ކުރިޔަށް އޮތްތަނުގައި އެއަރޕޯޓްތައް ހެދިގެންދާނީ 50 އަހަރު ދުވަހުގެ މުއްދަތަށް މަރާމާތެއް ކުރަންނުޖެހޭ ގޮތަށްކަމަށް މުބީން ވިދާޅުވިއެވެ.

މީގެއިތުރުން އެއަރޕޯޓްތަކުން ލިބޭ އާމްދަނީ އިތުރުކުރުމަށް ފަތުރުވެރިކަމުގެ މޮޑެލްތައް ތަޢާރަފްކުރެވިގެންދާނެކަމަށް މުބީން ވިދާޅުވިއެވެ.

ރީޖަނަލް އެއަރޕޯޓްގެ ދަށުގައި ހުރި އެއަޕޯޓްތަކަކީ ހަނިމާދޫ އިންޓަރނޭޝަނަލް އެއަރޕޯޓް، ކުޅުދުއްފުށި އެއަރޕޯޓް، ހޯރަފުށި އެއަރޕޯޓް، ފުނަދޫ އެއަރޕޯޓް، މާވަރުލު އެއަރޕޯޓް، ފަރެސްމާތޮޑާ އެއަރޕޯޓް އަދި ފުވައްމުލައް އެއަރޕޯޓެވެ. މީގެއިތުރުން މިހާރު ހަދަމުން އަންނަ މަގޫދޫ އެއަރޕޯޓަކީވެސް ރީޖަނަލް އެއަރޕޯޓްގެ ބެލުމުގެ ދަށުގައި އޮތް އެއަރޕޯޓެކެވެ.