އެނގޭތަ؟ ކަނޑާއި ވައިގެ ދަތުރުތަކަށްވުރެ ފެޝަންގެ ދުނިޔެއިން ވެއްޓަށް ދޭ ގެއްލުން ބޮޑު!

މޫސުމަށް އަންނަ ނޭދެވޭ ބަދަލުތަކުގެ ހިއްސާދާރުންނަކީ ކޮބައިތޯ ސުވާލުކޮށްލައިފިނަމަ ގިނަ ފަހަރަށް ދުލުކުރިއަށް އެންމެ ފުރަތަމަ އަންނަ އެއްޗަކަށް ވެފައި އޮންނަނީ ޕްލާސްޓިކް ފުޅިއާއި، ކޮތަޅާއި އެފަދަ ކުނިބުނީގެ ލިސްޓެކެވެ. ނޫނީ އެކި މަންސަތަކުގައި ކޮޅުކޮޅަށް ދުއްވާ އުޅަނދުފަހަރުތަކުން ބޭރު ކުރާ ވިހަ ދުމުގެ ވާހަކައެވެ. ފަހަރެއްގައިވެސް، ޒަމާނީ ފެޝަންގެ ހިއްސާއެއް އެކަމުގައި އޮވެދާނެ ކަމާ މެދު އެއް ފަހަރުވެސް ވިސްނާލެވުނު ހެއްޔެވެ؟ ވަރަށް ނާދިރެވެ. އެހެނެއް ނޫން ހެއްޔެވެ؟

މި ދުވަސްވަރަކީ މޫސުމަށް އަންނަ ނޭދެވޭ ބަދަލުތަކުގެ ވާހަކައިގެ އަޑުފަށްގަނޑު އަނެއްކާވެސް ގަދަވެފައިވާ ދުވަސްވަރެކެވެ. ސަބަބަކަށް ވަނީ ދުބާއީގައި ކުރިއަށް ދާ ކޮޕް-28 ނުވަތަ މޫސުމީ ބަދަލުތަކާ ބެހޭ އދގެ ބައްދަލުވުމެވެ. މި ބައްދަލުވުމަކީ މޫސުމީ ނޭދެވޭ ބަދަލުތަކުގެ މައްސަލައަށް ރިޢާޔަތްކޮށް ބައިނަލްއަޤުވާމީ ފެންވަރުގައި ކޮންމެ އަހަރަކުވެސް ކުރިއަށް ގެންދާ އެންމެ ވަރުގަދަ ބައްދަލުވުމެވެ. ބައްދަލުވުމުގެ ހަވާސާގައި ހުރެ، މި ބުނި ފެޝަންގެ ދުނިޔެ ތެރެއިން މޫސުމަށް ނޭދެވޭ އަސަރު ފޯރުވާ މައްސަލައަށް އަލިއަޅުވާލި އެކަކީ އިނގިރޭސި ފެޝަން ޑިޒައިނަރ، ސްޓެލާ މެކަރޓްނީއެވެ.

ފެޝަންގެ ދުނިޔޭގެ ޢަމަލުތައް ހުންނަނީ ވެއްޓާ ރައްޓެހި މޭރުމަކުންކަން ކަށަވަރު ކުރުމަށްޓަކައި ޚާއްޞަ ޤާނޫނުތަކެއް އެކުލަވާލުމަށް ސްޓެލާ ވަނީ ގޮވާލާފައެވެ.

މީޑިއާއާ ވާހަކަދައްކަމުން ދިޔައިރު ސްޓެލާގެ ފަހަތުން ފެންނަން ހުރި އެކި ޒާތްޒާތުގެ އަންނައުނަކީ، 200 މިލިއަން ޑޮލަރުގެ އަގުހުރި، ދެމެހެއްޓެނިވި އިންވެސްޓްމަންޓް ފަންޑެއްގެ ދަށުން އުފައްދާފައިވާ ބައެއް އުފެއްދުންތަކެވެ. ޚުދު ސްޓެލާއަކީވެސް އެ ފަންޑުގެ ކޯ-ފައުންޑަރެކެވެ. ސްޓެލާ ބުނި ގޮތުގައި ކޮޕް-28ގެ ބައްދަލުވުންތަކަށް އޭނާ ދިޔައީވެސް ފެޝަންގެ ސިނާޢަތުން ދުނިޔެއަށް ލިބެމުންދާ ގެއްލުންތައް ކުޑަކުރުމާ ބެހޭ ގޮތުން، ސިޔާސަތު އެކުލަވާލާ ފެންވަރުގެ ބޭބޭފުޅުންނާ ވާހަކަދެއްކުމުގެ މަޤްޞަދުގައެވެ.

މޫސުމީ ނޭދެވޭ ބަދަލުތަކަށް މަގު ފަހި ކުރާ އެންމެ ބޮޑު އެކައްޗަކީ ދުނިޔެ ހޫނު ކުރާ ވިހަ ގޭސް ނުވަތަ ގްރީން ހައުސް ގޭސްތަކެވެ. ދުނިޔޭގެ ވައިގެ ފަށަލައިގެ ތެރެއަށް އަރައިގެން ދާ ވިހަ ގްރީން ހައުސް ގޭސްތަކުގެ 10 ޕަސެންޓް ހިއްސާ ކުރަނީ އެކި ކަހަލަ އަންނައުނާއި ބޫޓާއި ފައިވާން ފަދަ ތަކެއްޗެވެ. މިއީ، ބައިނަލްއަޤުވާމީ ފެންވަރުގައި މުޅި ދުނިޔޭގެ އެކި ކަންކޮޅުތަކަށް ކަނޑާއި ވައިގެ މަގުން ކުރާ ދަތުރުތަކުން އެކު ޖުމުލަ ހިއްސާ ކުރާ މިންވަރަށް ވުރެވެސް ބޮޑު ޢަދަދެކެވެ.

ސްޓެލާގެ ފަހަތުން ފެންނަން ހުރި ޝޯކޭހުގައި ހުރި ބައެއް އުފެއްދުންތަކަށް ބަލާއިރު، މަސްނޫޢީ ލެދަރާއި ކެހެރީގެ ބާވަތްތައް ބޭނުންކޮށްގެން އުފައްދާފައިވާ ފެޝަންގެ އޭތިމީތި ހުއްޓެވެ. އުކާލާ ޕްލާސްޓިކް އަލުން ބޭނުން ކުރެވޭ ގޮތް ހަދައިގެން ތައްޔާރުކޮށްފައިވާ ކޯޓެއްވެސް އެ ޝޯކޭހުގައި ހުއްޓެވެ.

ފެޝަންގެ ދުނިޔޭގައި ޢާންމުކޮށް ކަން ކުރަމުން އަންނަ އުސޫލު ދޫކޮށް އެހެން ގޮތްތަކެއް އިޚްތިޔާރު ކުރުމުގެ ތެރޭގައި، ޖައްވަށް ބޭރުވެގެންދާ ކާބަންޑައިއޮކްސައިޑް (ސީއޯ-ޓޫ) ގެ މިންވަރު އިތުރުވުމުގެ އޮވެދާނެތޯ ސުވާލު ކުރުމުން ސްޓެލާ ދިނީ ފުރިހަމަ ޖަވާބެކެވެ. ކުޅޭ އެއްޗެހި އުފެއްދުމުގައި މަޝްހޫރުކަން ހޯދާފައިވާ ޑެންމާކްގެ ލެގޯ ކުންފުނިން ގެނައި މިފަދަ ބަދަލަކާއެކު ޖައްވަށް ވިހަ ގޭސް ބޭރުވި މިންވަރު އިތުރުވެގެން ދިޔައިރު، ސްޓެލާ ބުނާ ގޮތުގައި އެންމެ ފުރިހަމަ ނަތީޖާ ނެރެވެން އަންނަނީ، ހިސާބު ޢަދަދުތައް ޖަހާ އިރު، އިންސާނާގެ އަޚުލާޤާއި ސުލޫކީ ހަމަތައްވެސް ވަޒަންކޮށްގެން ކަމަށެވެ.

ތެލުގެ އަސްލުން އުފައްދާފައި ހުންނަ ޕްލާސްޓިކް ދޫކޮށް، ރީސައިކަލް ކޮށްފައި ވާ ޕޮލީއެތުލީން ޓެރެފްތަލޭޓް (އާރްޕެޓް) ބްލޮކްސް އުފެއްދުމުގެ މަރުހަލާގައި، ޖައްވަށް ބޭރުވާ ސީއޯ-ޓޫގެ މިންވަރު އިތުރުވާ ކަން ހާމަވުމާއެކު، ލެގޯ ކުންފުނިން ވަނީ ސެޕްޓެމްބަރު މަހުގެ ތެރޭގައި އެ މަޝްރޫޢު ހުއްޓާލާފައެވެ.