ރައީސް މުއިއްޒުގެ އެންގެވުމަށް ފެނަކައިގެ މުވައްޒަފުން ވަޒީފާއިން ވަކިކުރާ މައްސަލަ މަޖިލީހަށް
5 ޑިސެމްބަރު 2023 | އަންގާރަ 04:35ކުއްލި މައްސަލައިގައި ބުނެފައިވަނީ އަނިޔާވެރިކަމާއި ބޭއިންސާފުން ބަދަލު ހިފުމުގެ ރޫހެއްގައި، މުވައްޒަފުން ވަޒީފާއިން ދަނީ ވަކިކުރަމުން ކަމަށް
ފެނަކަ ކޯޕަރޭޝަންގެ މުވައްޒަފުންތަކެއް މަސައްކަތުގައި
ރައީސް ޑރ. މުހައްމަދު މުއިއްޒުގެ އެންގެވުމަށް ފެނަކައިގެ މުވައްޒަފުން ވަޒީފާއިން ވަކިކުރާ މައްސަލަ، ކުއްލި މައްސަލައެއްގެ ގޮތުގައި ރައްޔިތުންގެ މަޖިލީހަށް ހުށަހަޅައިފިއެވެ.
މި ކުއްލި މައްސަލަ މަޖިލީހަށް ހުށަހަޅުއްވާފައިވަނީ ފުވައްމުލަކު މެދު ދާއިރާގެ މެންބަރު ހުސައިން މުހައްމަދު ދީދީއެވެ. މި ކުއްލި މައްސަލައިގައި ބުނެފައިވަނީ މިއީ އަތޮޅުތަކުގެ ރަށްތަކުގެ ފެނަކަ ކޯޕަރޭޝަންގެ ފަރާތުން ދެމުން ގެންދާ ކަރަންޓާއި އައިސްޕްލާންޓާއި ފެނާއި ނަރުދަމާ އަދި ބޮޓެލިން ޕްލާންޓުގެ ހިދުމަތް ދެމުންގެންދާ ފެނަކަ ކޯޕަރޭޝަންގެ މުވައްޒަފުން މި ސަރުކާރުން، ރައީސް ޑރ. މުހައްމަދު މުއިއްޒުގެ އެންގެވުމަށް ވަޒީފާއިން ވަކިކޮށް، އެ މުވައްޒަފުންނަށް ޖައްސަމުން ގެންދާ ހާލު ކުށްވެރިކޮށް ހުށަހަޅާ ކުއްލި މައްސަލައެއް ކަމަށެވެ.
އަދި މި ހިދުމަތް ރައްޔިތުންނަށް ފޯރުކޮށްދިނުމަށްޓަކައި މަސައްކަތް ކުރަމުން ގެންދާ ހީވާގި މުވައްޒަފުން އަނިޔާވެރިކަމާއި ބޭއިންސާފުން ބަދަލު ހިފުމުގެ ރޫހެއްގައި، ވަޒީފާއިން ވަކިކުރަމުންދާ މައްސަލަ ހުއްޓުވައިދިނުމަށް އެދި އެ ފަރާތްތަކުން ރައްޔިތުންގެ މަޖިލީހުގެ މެޖޯރިޓީ ޕާލަމެންޓްރީ ގްރޫޕުގައި އެދިފައިވާ މައްސަލަ ސަރުކާރުގެ ސަމާލުކަމަށް ގެނެސް، މިހިނދުން މިހިނދަށް މި އަނިޔާވެރި އަމަލު ހުއްޓާލުމަށް ގޮވާލާ މި ކުއްލި މައްސަލަ ހުށަހަޅާކަމަށެވެ.
މި ކުއްލި މައްސަލަ ބަލައިގަތުމަށް ނެގުނު ވޯޓުގައި ބައިވެރިވެވަޑައިގެންނެވި މެންބަރުންގެ އަގުލަބިއްޔަތުން ވަނީ ކުއްލި މައްސަލައިގެ ބަހުސްކުރުމަށް ފެންނަކަމަށް ފާސްކޮށްފައެވެ. ވޯޓު ދެއްވީ 33 މެންބަރުންނެވެ.
