އިސްރާއީލުން ޣައްޒާއަށް މެދުކެނޑުމެއްނެތި ދެމުންދާ ވަރުގަދަ ހަމަލާތަކާއެކު ޣައްޒާ އިން އަނެއްކާވެސް މުވާސަލާތީ ޚިދުމަތް މެދުކެނޑިއްޖެއެވެ.

މިއީ އިސްރާއީލުން ޣައްޒާއަށް ހަމަލާތައްދޭން ފެށިފަހުން ޣައްޒާއިން މުވާސަލާތީ ޚިދުމަތް މެދުކެނޑުނު ތިން ވަނަ ފަހަރެވެ. ޣައްޒާއަށް މުވާސަލާތީ ޚިދުމަތްދޭ ކުންފުނިކަމުގައިވާ ޕަލްޓެލް އިން ބުނެފައިވަނީ ޣައްޒާއިން އެއްކޮށް ކަހަލަ ގޮތަކަށް މުވާސަލާތީ ޚިދުމަތާއި އިންޓަރނެޓްގެ ޚިދުމަތް މެދުކެނޑިފައިވާކަމަށެވެ.

ސައިބަރ ސެކިޔުރިޓީ ވޮޗް ޑޯގް ނެޓް ބްލޮކްސް އިންވެސް ވަނީ ޣައްޒާއިން އެއްކޮށް ކަހަލަ ގޮތަކަށް އިންޓަރނެޓްގެ ޚިދުމަތް މެދުކެނޑިފައިވާކަމަށެވެ. އެއާއެކު ގިނަ ބަޔަކަށް މުވާސަލާތު ކުރުމަށް ވަރަށް ބޮޑެތި ދަތިތައް ކުރިމަތިވާނެކަމަށް ވަނީ ބުނެފައެވެ.

އޮކްޓޯބަރ މަހުގެ 7 ވަނަ ދުވަހު ހަމާސް އިން އިސްރާއީލަށް ދިން ކުއްލި ވަރުގަދަ ހަމަލާއަށްފަހު އިސްރާއީލުން އަންނަނީ ޣައްޒާއަށް ވަރުގަދަ ހަމަލާތަކެއް ދެމުންނެވެ. ދެ ފަރާތުން ވި އެއްބަސްވުމާއެކު ހަމަލާތައް ބަދަލުކުރުން 7 ދުވަހަށް މެދުކަނޑާލުމަށްފަހު އަލުން ހަމަލާތައް ދޭން ފަށާފައިވަނީ ޑިސެމްބަރ މަހުގެ 1 ވަނަ ދުވަހުއެވެ. އޭގެފަހުން އިސްރާއީލުން އަންނަނީ ކުރިޔަށްވުރެ ހަމަލާތައް ވަރުގަދަކުރަމުންނެވެ.

މުޅި ޣައްޒާގެ އިންފްރާ ސްޓްރަކްޗަރ އެއްކޮށް އިސްރާއީލުން އަންނަނީ ހަލާކުކުރަމުންނެވެ.

މިހަމަލާތަކުގައި ފަލަސްތީނުގެ އެންމެ މަދުވެގެން 15،899 މީހުންގެ ފުރާނަ ގެއްލިފައިވާނެކަމަށް ބެލެވެއެވެ. އަނެއްކޮޅުން 2.3 މިލިއަން މީހުން ދިރިއުޅެމުން އަންނަ ޣައްޒާގެ 75 އިންސައްތަ މީހުންގެ ގެދޮރު ވަނީ ގެއްލިފައެވެ.