އެންޓިކޮރަޕްޝަން އެކެޑަމީ ރަޖިސްޓްރީކޮށް، ބުރާސްފަތި ދުވަހު ރަސްމީކޮށް އިފްތިތާހުކުރަނީ
ސެޓްފިކެޓް ލެވެލް 3 އަދި ޑިޕްލޮމާގެ ކޯސްތައް ފުރަތަމަ ފަށާނެ
އެންޓިކޮރަޕްޝަން ކޮމިޝަންގެ ޑިރެކްޓަރ އޮފް ޕްރިވެންޝަން އަލީ ޝަމީމް
އެންޓިކޮރަޕްޝަން އެކެޑަމީ ރަޖިސްޓްރީކޮށް، ބުރާސްފަތި ދުވަހު ރަސްމީކޮށް އިފްތިތާހުކުރުމަށް ނިންމައިފިއެވެ.
އެންޓިކޮރަޕްޝަން އެކެޑަމީއާ ގުޅޭގޮތުން ރާއްޖެޓީވީގެ ފަލަސުރުޚީ ޕްރޮގްރާމުގައި ވާހަކަފުޅު ދައްކަވަމުން އެންޓި ކޮރަޕްޝަން ކޮމިޝަންގެ ޑިރެކްޓަރ އޮފް ޕްރިވެންޝަން އަލީ ޝަމީމް ވިދާޅުވީ، އެންޓިކޮރަޕްޝަން އެކެޑަމީއެއް އުފައްދައިގެން މީހުން ބިނާކުރަން ޖެހޭ ކަމަށެވެ. އަދި ތަހުގީގުތައް ރަނގަޅަށް ކުރިއަށް ގެންދެވޭނީ މީހުން ބިނާކޮށް، ތަމްރީނު ދީގެން ކަމަށާއި އެންޓި ކޮރަޕްޝަން ކޮމިޝަނުން ދެކެނީ ކޯސްތައް ހިންގައިގެން ސެޓްފިކެޓެއް ލިބި އެކްރެޑިޓް ކުރެވޭ ތަމްރީނުތައް ދޭންޖެހޭ ކަމަށެވެ.
ޝަމީމް ވިދާޅުވީ ކުރިއަށް އޮތް 3 އަހަރަށް ރާވައިގެން ކޯސްތަކެއް ފަރުމާ ކުރެވިފައިވާ ކަމަށެވެ. އެގޮތުން ކޯސްތައް ފަރުމާ ކުރުމަށް ފަސޭހަވެފައިވަނީ މިހާރުވެސް ތަމްރީނުތައް ކުރިއަށް ގެންދާތީ ކަމަށާއި، އުއްމީދަކީ އިންޓަރނަލް ތަމްރީނުތައް ހިންގާއިރު، ކޯސްތަކަށް ވެސް އިއުލާންކުރެވުން ކަމަށެވެ. އަދި ކޯސްތައް ރަސްމީކޮށް އިފްތިތާހުކުރި ނަމަވެސް، މި ކޯސްތަކަށް އިއުލާނުކުރެވޭނީ ކޮލިފިކޭޝަން އޮތޯރިޓީން ރަސްމީކޮށް އެޕްރޫވްކޮށްގެން ކަމަށް ޝަމީމް ވިދާޅުވިއެވެ.
އަދި ފުރަތަމަ އިއުލަންކުރާނީ ސެޓްފިކެޓް 3 އަދި ޑިޕްލޮމާ ފެންވަރުގެ ކޯސްތައް ކަމަށް ވެސް އޭނާ ވިދާޅުވިއެވެ.
