މަޖިލީހުގެ ނައިބު ރައީސް ކަމަށް މެންބަރު ސަލީމް އިންތިހާބުކޮށްފި
މަޖިލީހުގެ ނައިބު ރައީސް ކަމުގެ މަގާމް ހުސްވެފައިވަނީ މަޖިލީހުގެ ކުރީގެ ނާއިބު ރައީސް، އީވާ އަބްދުﷲ އެ މަގާމުން އިސްތިއުފާ ދެއްވުމުން
މަޖިލީހުގެ ހޯރަފުށީ ދާއިރާގެ މެންބަރު އަޙްމަދު ސަލީމް
މަޖިލީހުގެ ނައިބު ރައީސް ކަމުގެ މަގާމަށް، ހޯރަފުށީ ދާއިރާގެ މެންބަރު އަޙްމަދު ސަލީމު އިންތިޚާބު ކުރައްވައިފި އެވެ.
އާދިއްތަ ދުވަހުގެ ރޭ މަޖިލީހުގައި ބޭއްވި ޚާއްޞަ ޖަލްސާގައި، ހުސްވެފައިވާ މަޖިލީހުގެ ނާއިބު ރައީސް ކަމުގެ މަގާމަށް ސަލީމް އައްޔަނުކުރެއްވީ އެ ވޯޓުގައި ބައިވެރިވި 74 މެންބަރުންގެ ތެރެއިން 51 މެންބަރުންގެ ވޯޓުންނެވެ.
ސަލީމް އާ އެ ވޯޓުގައި ވާދަ ކުރެއްވީ ކާށިދޫ ދާއިރާގެ އެމްޑީޕީގެ މެންބަރު އަބްދުﷲ ޖާބިރު އެވެ. ޖާބިރަށް ލިބިވަޑައިގެންނެވީ 23 ވޯޓެވެ.
މެންބަރު ސަލީމު މަޖިލީހުގެ ނައިބު ރައީސަކަށް ހޮވިވަޑައިގެންފައިވާއިރު، އެމްޑީޕީގެ ޕީޖީގެ ފަރާތުން މަޖިލީހުގެ ނާއިބު ރައީސަކަށް ވާދަ ކުރައްވާނެ ބޭފުޅަކު ހޮވުމަށް ބޭއްވި ވޯޓު ވެސް ކާމިޔާބު ކުރެއްވީ ސަލީމެވެ.
އެ އިންތިޚާބުގައި ސަލީމް އަށް 26 ވޯޓު ލިބިވަޑައިގެންނެވި އިރު، ސަލީމް އާ ވާދަ ކުރެއްވި އައްޑޫ މީދޫ ދާއިރާގެ މެންބަރު ރޮޒައިނާ އާދަމް އަށް 23 ވޯޓު، އަދި ކާށިދޫ ދާއިރާގެ މެންބަރު އަބްދުﷲ ޖާބިރަށް 4 ވޯޓު ލިބިވަޑައިގެންނެވިއެވެ.
ރައްޔިތުންގެ މަޖިލީހުގެ ނާއިބު ރައީސް ކަމުގެ މަގާމް ހުސްވެފައިވަނީ އެ މަގާމުގައި ކުރިން ހުންނެވި ގަލޮޅު އުތުރު ދާއިރގެ މެންބަރު އީވާ އަބްދުﷲ އިސްތިއުފާ ދެއްވުމުންނެވެ. އީވާ އިސްތިއުފާދެއްވީ އޭނާގެ މައްޗަށް އިތުބާރު ނެތް ކަމުގެ ދެވަނަ މައްސަލައެއް މަޖިލީހަށް ހުށަހަޅައި، އެ މައްސަލައިގައި ޖަވާބުދާރީ ވުމަށް ބޭއްވި ޖަލްސާގައި އެވެ.
