ރައްޔިތުންގެ މަޖިލީހުގެ ނާއިބްރައީސް އިންތިޚާބުކުރުމަށް ބާއްވާ ޖަލްސާ މިރޭ ބާއްވަން ނިންމައިފިއެވެ.

މަޖިލީހުގެ ނާއިބްރައީސް އިންތިޚާބު ކުރުމަށް މިރޭ ޖަލްސާއެއް ބޭއްވުމަށް ނިންމާފައިވަނީ، އެ މަގާމުން ގަލޮޅު އުތުރު ދާއިރާގެ މެންބަރު އީވާ އަބްދުﷲ އިސްތިއުފާ ދެއްވާފައިވާތީއެވެ.

މަޖިލީހުގެ ރައީސް މުހައްމަދު އަސްލަމް ވިދާޅުވީ މަޖިލީހުގެ ނާއިބްރައީސް އީވާ މަޖިލީހުގެ ނާއިބްރައީސްކަމުން އިސްތިއުފާ ދެއްވާފައިވާކަން، ދިވެހިރާއްޖޭގެ ގާނޫނު އަސާސީގެ 82 ވަނަ މާއްދާގެ (ނ) ގެ މަތިން ލިޔުމުން އަންގަވާފައިވާ ކަމަށެވެ.

އަސްލަމް ވިދާޅުވީ އީވާ އިސްތިއުފާ ދެއްވާފައިވާތީ އެ މަގާމުން އޭނާ ވަކިކުރުމަށް ހުށަހަޅާފައިވާ ގަރާރުގެ މަސައްކަތް ދެން ކުރިއަށް ނުގެންދަވާނެ ކަމަށެވެ. އަދި ގާނޫނު އަސާސީގެ 82 ވަނަ މާއްދާގެ (ހ) ގައިވާ ގޮތުގެ މަތިން މަޖިލީހުގެ ނާއިބްރައީސް އިންތިހާބުކުރުމަށް ބާއްވާ ޖަލްސާ މިރޭ 8:30 ގައި އޮންނާނެ ކަމަށެވެ.