ރައީސްގެ ރަސްމީ ދަތުރުފުޅުތަކުގެ ޚަރަދު ހާމަކުރަން ނިންމައިފި
މިހާތަނަށް ރައީސް ވަނީ ރަސްމީ ދެ ދަތުރުފުޅު ކުރައްވާފައި
ރައީސް މުއިއްޒު، ރައީސް އުރުދުޣާން އާ ބައްދަލުކުރައްވަނީ
ރައީސުލްޖުމްހޫރިއްޔާ ޑރ. މުހައްމަދު މުއިއްޒު ކުރައްވާ ރަސްމީ ދަތުރުފުޅުތަކަށް ދައުލަތުން ކުރާ ޚަރަދުތަކުގެ ތަފްސީލް ހާމަކުރަން ރައީސް އޮފީހުން ނިންމައިފިއެވެ.
ރައީސް އޮފީހުން މިކަން ހާމަކޮށްފައިވަނީ ހޮނިހިރު ދުވަހު އެކްސްގައި ކުރި ޕޯސްޓެއްގައެވެ. އެ ޕޯސްޓުގައި ބުނެފައިވާ ގޮތުގައި ރަސްމީ ދަތުރުފުޅުތަކުގެ ޚަރަދުތައް ހާމަކުރައްވަން ނިންމެވީ ރައީސުލްޖުމްހޫރިއްޔާ އަމިއްލަފުޅަށެވެ.
މި ނިންމެވުމާއެކު ރައީސް މުއިއްޒު ކުރައްވާ ރަސްމީ ދަތުރުފުޅުތަކަށް ދައުލަތުގެ ބަޖެޓުން ހިނގާ ހަރަދުތަކުގެ މައުލޫމާތު ކޮންމެ ދަތުރުފުޅެއް ނިމޭތާ 15 ދުވަހުގެ ތެރޭގައި ހާމަކުރާނެ ކަމަށް ރައީސް އޮފީހުން ބުނެއެވެ.
މިދިޔަ ނޮވެމްބަރު މަހުގެ 17 ގައި ވެރިކަމާ ހަވާލުވެވަޑައިގެންނެވުމަށްފަހު ރައީސް މުއިއްޒު އެންމެ ފުރަތަމަ ރަސްމީ ދަތުރުފުޅެއް ކުރެއްވީ ތުރުކީއަށެވެ. އެއީ އެ ޤައުމުގެ ރައީސް ރަޖަބް ތައްޔިބް އުރުދުޣާންގެ ދައުވަތަކަށް ކުރެއްވި ދަތުރުފުޅެކެވެ. އެ ދަތުރުފުޅަށްފަހު މިހާރު ކުރިއަށްދާ ޔުނައިޓެޑް ނޭޝަންސް ފްރޭމްވޯކް ކޮންވެންޝަން އޮން ކްލައިމެޓް ޗޭންޖް (ކޮޕް28) ބައްދަލުވުމުގައި ބައިވެރިވެވަޑައިގަތުމަށް އެ މަނިކުފާނު ވަނީ ޔޫއޭއީއަށް ވަޑައިގެންފައެވެ.
ރައީސް ކުރައްވާ ރަސްމީ ދަތުރުފުޅުތަކުގެ ޚަރަދުތައް އާއްމުކުރުމަށް މި ސަރުކާރުން ނިންމާފައިވަނީ ކުރީ ސަރުކާރުތަކުން އެ ޚަރަދުތައް ހާމަނުކުރުމުން އޭރު އިދިކޮޅުގައި ތިބެ ފާޑުކިޔުމާ ގުޅިގެން ގިނަ ބަޔަކު މި ސަރުކާރުން ޚަރަދުތައް ހާމަކުރާނެތޯ ސުވާލު އުފެއްދުމުންނެވެ.
