މިނިސްޓްރީ އޮފް އެގްރިކަލްޗަރ އެންޑް އެނިމަލް ވެލްފެއަރ ހިންގެވުން، ވަގުތީގޮތުން ޑިފެންސް މިނިސްޓަރާ ހަވާލުކުރައްވައިފި
އެގްރިކަލްޗަރ މިނިސްޓަރު ވަޑައިގަންނަވަންދެން ޑިފެންސް މިނިސްޓަރު މި މި މިނިސްޓްރީ ބަލަހައްޓަވާނެ
ޑިފެންސް މިނިސްޓަރު މުހައްމަދު ޣައްސާން މައުމޫން
ރައީސުލްޖުމްހޫރިއްޔާ ޑޮކްޓަރ މުހައްމަދު މުއިއްޒު، މިނިސްޓްރީ އޮފް އެގްރިކަލްޗަރ އެންޑް އެނިމަލް ވެލްފެއަރ ހިންގެވުން ވަގުތީގޮތުން މިނިސްޓަރ އޮފް ޑިފެންސް މުހައްމަދު ޣައްސާން މައުމޫނާ ހަވާލުކުރައްވައިފިއެވެ.
މިނިސްޓްރީ އޮފް އެގްރިކަލްޗަރ އެންޑް އެނިމަލް ވެލްފެއަރ ހިންގެވުން މިނިސްޓަރ އޮފް ޑިފެންސާ ހަވާލުކުރައްވާފައި މި ވަނީ، މިނިސްޓަރ އޮފް އެގްރިކަލްޗަރ އެންޑް އެނިމަލް ވެލްފެއަރ ޑޮކްޓަރ އާއިޝަތު ރަމީލާ، ނޮވެމްބަރު 23ގައި ރާއްޖެއިން ބޭރަށް ފުރާވަޑައިގެންފައިވާތީ، އެ ކަމަނާ މި ދަތުރުފުޅު ނިންމަވާލެއްވުމަށްފަހު އެނބުރި ރާއްޖެ ވަޑައިގަންނަވަންދެންނެވެ.
އެގްރިކަލްޗަރ މިނިސްޓަރ ޑރ. އައިޝަތު ރަމީލާ ރާއްޖެއިން ބޭރަށް ފުރާވަޑައިގަތީ ކެންސަރުގެ އާލާސްކަންފުޅާ ގުޅިގެންނެވެ. ފޭސްބުކްގައި ކުރެއްވި ޕޯސްޓެއްގައި މިނިސްޓަރު ރަމީލާ ވިދާޅުވެފައިވަނީ، ކެންސަރު ޖެހިފައިވާތީ ކީމޯއާއި ރޭޑިއޭޝަންގެ ފަރުވާއަށް ރާއްޖެއިން ބޭރަށް ފުރާވަޑައިގަންނަވަން ނިންމާފައިވާކަމަށެވެ. އަދި ބަލި ހުރިކަން އެނގިވަޑައިގަތީ ކެންސަރުގެ އެންމެ ފަހު ސްޓޭޖުގައި ހުއްޓައި ކަމަށް އޭނާ ވިދާޅުވިއެވެ.
