މަސްކިލޯއެއް 25 ރުފިޔާއަށް ވުރެ ބޮޑަށް ގަނެވޭނެ، އަގު ކުޑަކުރަނީ މަސްވެރިންނަށް ޖެއްސުން ކުރުމަށް: މެންބަރު ޔައުގޫބް

25 ރުފިޔާއަށް ވުރެ ވެސް ބޮޑުކޮން މަސްވެރިންނަށް ފައިސާ ދެވޭނެ މަގު ކުރީ ސަރުކާރުން ވަނީ ހަމަޖައްސާފައި ކަމަށާއި، ރައީސް ޑރ.މުހައްމަދު މުއިއްޒުގެ ސަރުކާރުން މަސްވެރިންނަށް ދޭ ފައިސާ ކުޑަ ކުރަން ނިންމީ މަސްވެރިންނަށް ޖެއްސުން ކުރަން ކަމަށް ދާންދޫ ދާއިރާގެ މެންބަރު ޔައުގޫބް އަބްދުﷲ ވިދާޅުވެއްޖެއެވެ.

ރާއްޖެޓީވީގެ ފަލަސުރުޚީ ޕްރޮގްރާމުގައި މެންބަރު ޔައުގޫބް ވިދާޅުވީ، އައު ސަރުކާރުގެ ކެބިނެޓް އެކުލަވާލެއްވިއިރު މަސްވެރިކަމާއި ކަނޑުގެ ވަސީލަތްތަކާއި ބެހޭ ވަޒީރު އަހްމަދު ޝިޔާމް އައްޔަންކުރެއްވުމުން ވަރަށް ހިތްހަމަޖެހިވަޑައިގެންނެވި ކަމަށާއި، އެބޭފުޅާއަކީ 19 ވަނަ ރައްޔިތުން މަޖިލީހުގައި ހުންނަވައިގެން މަސްވެރިންގެ ހައްގުގައި ވަރަށް ބޮޑަށް ވާހަކަފުޅު ދެއްކެވި ބޭފުޅެއް ކަމަށެވެ. އެހެންކަމުން މަސްވެރިކަމުގެ ވުޒާރާގެ އިސްބޭފުޅެއްގެ ގޮތުގައި ޝިޔާމް އައްޔަންކުރެއްވުމުން އުންމީދު އާވި ކަމަށް މެންބަރު ޔައުގޫބް ވިދާޅުވިއެވެ. ނަމަވެސް މެންބަރު ޔައުގޫބް ވިދާޅުވީ ކަންކަންވަމުން ދަނީ އުންމީދު ކުރި ގޮތަށް ނޫން ކަމަށާއި، 25 ރުފިޔާއަށް މަސް ކިލޯއެއް ނުގަނެވޭނެ ކަމަށް ނިންމުމުން އެކަމާއި ކަންބޮޑުވާ ކަމަށެވެ.

މެންބަރު ޔައުގޫން ވިދާޅުވީ ކުރީގެ ސަރުކާރުން 25 ރުފިޔާއަށް މަހުގެ އަގު ބޮޑުކުރީ ކުރަންޖެހޭ ހުރިހާ ކަމެއް ކުރުމަށްފަހު އެއަގުގައި މަސް ގަނެވޭނެ ކަމުގެ ޔަގީންކަން އޮތުމުން ކަމަށެވެ. އެގޮތުން އިނގިރޭސިވިލާތުގެ ސަރުކާރާއެކު މަޝްވަރާތައްކޮށްފައިވާ ކަމަށާއި، ޓެރިފް ކަނޑާލާނެކަމުގެ ޔަގީންކަން އެބައޮތް ކަމަށް މެންބަރު ޔައުގޫބް ވިދާޅުވިއެވެ.

ކުރީގެ ރައީސް އިބްރާހިމް މުހައްމަދު ސާލިހު މަސްވެރިންނާއެކު ބޭއްވެވި ބައްދަލުވުމަށް އިޝާރާތް ކުރައްވައި މެންބަރު ޔައުގޫބް ވިދާޅުވީ 20 ރުފިޔާއިން 17 ރުފިޔާއަށް މަހުގެ އަގު ކުޑަކުރީ ކޮވިޑް-19އާއި ގުޅިގެން ކަމަށާއި، ކޮވިޑްގެ ރިކަވަރީއަށްފަހު މަހުގެ އަގުބޮޑު ކުރަން ނިންމި ކަމަށެވެ. ކުރީގެ ރައީސް ސާލިހު ނިންމެވީ 23 ރުފިޔާއަށް މަހުގެ އަގު ބޮޑު ކުރުމަށް ކަމަށާއި، ނަމަވެސް ބައްލުވުމުގައި ބައިވެރިވި މަސްވެރިން ބޭނުންވީ 25 ރުފިޔާއަށް މަސް ކިލޯއެއް ބޮޑު ކުރުމަށް ކަމަށް މެންބަރު ޔައުގޫބް ވިދާޅުވިއެވެ. އެ އަގަކީ ވެސް ދައުލަތަށް ދެވޭނެ އަގެއްކަމަށްވާތީ މަހުގެ އަގު 25 ރުފިޔާއަށް ބޮޑު ކުރީ ކަމަށް މެންބަރު ޔައުގޫބް ވިދާޅުވިއެވެ.