މި ސަރުކާރުން ޑްރޯންތަކެއް ގަނެފައިވަނީ ގާނޫނާ ހިލާފަށް: ޔައުގޫބް

ރައީސުލްޖުމްހޫރިއްޔާ ޑރ.މުހައްމަދު މުއިއްޒުގެ ސަރުކާރުން އަގުބޮޑުކޮށް ޑްރޯންތަކެއް ގަނެފައިވަނީ ގާނޫނާ ހިލާފަށް ކަމަށް ރައްޔިތުން މަޖިލީހުގެ ދާންދޫ ދާއިރާގެ ކުރީގެ މެންބަރު ޔައުގޫބް އަބްދުﷲ ވިދާޅުވެއްޖެއެވެ.

ފަލަސުރުހީ ޕްރޮގްރާމްގައި ޔައުގޫބް ވިދާޅުވީ ކުރީގެ ރައީސް އިބްރާހިމް މުހައްމަދު ސާލިހުގެ ސަރުކާރުގައި ސަޕްލިމެންޓްރީ ބަޖެޓެއް ހުށަހެޅުމުން ވަރަށް ބޮޑަށް މިސަރުކާރުގެ ބޭފުޅުން ފާޑު ވިދާޅުވި ކަމަށާއި، ނަމަވެސް އެ ބަޖެޓު ފާސްވުމުގެ ކުރިން ހަރަދުކޮށްފައިނުވާނެ ކަމަށެވެ. ނަމަވެސް މިސަރުކާރުން އެއާ ހިލާފަށް އަމަލު ކޮށްފައިވާ ކަމަށް އޭނާ ވިދާޅުވިއެވެ.

މިސަރުކާރުން ޑްރޯން ގަނެފައިވަނީ ގާނޫނާ ހިލާފަށްކަން ފާހަގަކުރައްވައި ޔައުގޫބް ވިދާޅުވީ އެމަސައްކަތް ކޮށްފައިވަނީ ކޮންޓިންޖެންސީ ބަޖެޓުން ކަމަށެވެ.

ޑްރޯން ގަތުމަށް 37 މިލިއަން ޑޮލަރު ހަރަދުކޮށްފައިވާއިރު، ޑްރޯންތައް ބޭނުންކޮށްފައިވަނީ 20 އޭޕްރީލް 2024 ގައި މ. ރަތްމަންދޫ ބޭރުން ގެއްލުނު ދޯންޏެއް އެކަނި ހޯދުމަށެވެ. އޭގެފަހުން ކަނޑުމާތީގެ ހާދިސާތައް ހިނގި ނަމަވެސް މި ޑްރޯންތައް ބޭނުންކޮށްފައިނުވެއެވެ. އަދި ޑްރޯންތައް ބޭނުން ނުކުރާ ސަބަބާއި ގުޅޭގޮތުން އެމްއެންޑީއެފްގެ ބަހެއް ވަނީ ލިބޭ ގޮތް ނުވެފައެވެ.

މީގެ އިތުރުން ޔައުގޫބް ވިދާޅުވީ އެމްޑީޕީއަކީ ވައްކަންކޮށް ރައްޔިތުންގެ ފައިސާއަށް ހިޔާނަތްތެރިވާ ބައެއް ނޫން ކަމަށާއި، ކޮރަޕްޝަންގެ ތުހުމަތު ކުރެވޭނަމަ ތަހުގީގު ކުރިއަށް ގެންދަންޖެހޭ ކަމަށެވެ.

މިއަދު މުޅި ގައުމުގެ ކޮންޓްރޯލް އޮތީ ސަރުކާރުގެ އަތުގައި ކަމަށާއި، ފިޔަވަޅު އަޅަންޖެހޭ ކަމަށް އޭނާ ވިދާޅުވިއެވެ. އަދި ވިދާޅުވީ އެމްޑީޕީގެ ސަރުކާރުގައި އެގޮތަށް ހިންގާފައިވާ އެއްވެސް ކަމެއް ދެއްކެން ނޯންނާނެ ކަމަށެވެ. ނަތީޖާއެއް ގޮތުން މިސަރުކާރުގެ ބޭފުޅުން ދައްކަނީ ބޭކާރު ބަރުދަނެއް ނުހުންނަ ވާހަކަތަކެއް ކަމަށް ޔައުގޫބް ވިދާޅުވިއެވެ.