ޑިޕާޓްމަންޓް އޮފް ނޭޝަނަލް ރެޖިސްޓްރޭޝަން (ޑީއެންއާރު) ގައި ރައްކައުކޮށްފައި ހުރި ރައްޔިތުންގެ ޒާތީ މައުލޫމާތު ބޭނުންކޮށްގެން ގަވައިދާ ޚިލާފަށް ވަގަށް ރައީސް މުއިއްޒުގެ ޕާޓީ ޕީއެންސީ އަށް މީހުން ވެއްދީ އެކަން ކުރި މުވައްޒަފުންނަށް މަޖުބޫރުކުރުވައިގެން ކަމަށް ތުހުމަތުކުރެވޭ ކަމަށް މަޖިލީހުުގެ ދާންދޫ ދާއިރާގެ ކުރީގެ މެމްބަރު ޔައުގޫބް އަބްދުﷲ ވިދާޅުވެއްޖެއެވެ.
އޭނާ އެފަދައިން ވިދާޅުވީ އެމްޑީޕީގެ ހަވަރު ބެރު ސައްލާގައި ވާހަކަދައްކަވަމުންނެވެ.
ޑީއެންއާރުގެ ޑޭޓާ ބޭސް ގައި ހުރި ފޮޓޯއާއި މީހުންގެ ޒާތީ މައުލޫމާތު ބޭނުންކޮށްގެން، ހޯމްލޭންޑް މިނިސްޓްރީގެ ސިޔާސީ އިސްފަރާތްތަކުން ފޯމުގައި ސޮއި ފޯޖްކޮށް އިނގިލީގެ ނިޝާން ޖަހާ ޕާޓީ ބަދަލުކުރަން މަސައްކަތް ކޮށްފައިވާކަން ވަނީ ފަޅާ އަރާފައެވެ. އަދި އެ މަސައްކަތް ކުރި ތަނުގައި ހޯމް މިނިސްޓަރ އަލީ އިހުސާން އިންނަވާ މަންޒަރު ފެންނަ ފޮޓޯ އެއްވެސް ވަނީ އާޢްމުވެފައެވެ.
އެ މައްސަލަ އަށް އިޝާރާތްކުރައްވާ ޔައުގޫބް ވިދާޅުވީ ވަގު ފޯރމް ފުރައިގެން ޕީއެންސީ އަށް މީހުން ވެއްދި މައްސަލަ އަށް ބަލާލުމުން އެކަން ކުރުވީ ބައެއް މުވައްޒަފުންނަށް މަޖުބޫރުކޮށްގެން ކަމަށް ދޭހަވާ ކަމަށެވެ. އަދި އެކަން ކޮށްފައި ވަނީ ހޯމް މިނިސްޓަރ އަލީ އިހުސާންގެ ނުފޫޒުން ކަމަށް ވެސް ތުހުމަތުކުރެވޭ ކަމަށް ޔައުގޫބް ވަނީ ވިދާޅުވެފައެވެ. މި ސަރުކާރުން ދަނީ ވަޒީފާގެ ބިރު ދައްކައިގެން ދިވެހިން ބޭނުން ނުވާ އެތައް ކަމެއް ދިވެހިން ލައްވާ ކުރުވަމުން ކަމަށާއި އެކަމުގެ ސަބަބުން ދިވެހިން ނިކަމެތިވެފައިވާ ކަމަށް ޔައުގޫބް ވަނީ ވިދާޅުވެފައެވެ. ރާއްޖޭގައި ވައްކަމެއްކޮށްގެން އެންމެ ސާފުކޮށް ފަޅާއެރި ވައްކަމަކީ ޑީއެންއާރުގައި ހުރި ޑާޓާއިން ވައްކަން ކުރި މައްސަލަކަމަށް ޔައުގޫބް ވިދާޅުވިއެވެ.
ޑިޕާޓްމަންޓް އޮފް ނެޝަނަލް ރަޖިސްޓްރޭޝަން (ޑީއެންއާރު) ގައި ޕީއެންސީގެ ފޯމުފުރަން މީޓީންގ ރޫމް ދޫކުރީ މިނިސްޓަރުގެ ބިއުރޯއިން އެދިގެން ކަމަށް ޑީއެންއާރުން ބޭއްވި ނޫސްވެރިންގެ ބައްދަލުވުމެއްގައި ވަނީ ބުނެފައެވެ. ޔައުގޫބް ވަނީ އެއީ ވަޒީރުގެ ނުފޫޒުން އެކަންކުރިކަމަށް އެންމެ ސާދާކޮށް ބުނެވެން އޮތް މިންވަރަށް އެ މުވައްޒަފުން އިއުތިރާފްވުން ކަމަށް ސިފަކުރައްވާފައެވެ.
ހޯމް މިނިސްޓަރ މަޖުބޫރުކުރުވީ އެ މީހުންނަށް އެ މަސައްކަތް ކުރަން. އެކަން އެނގެނީ ހޯމް މިނިސްޓްރީން ބޭއްވި ނޫސްވެރިންގެ ބައްދަލުވުމެއް. އެތަނަށް ވަދެވެނީ ވަކި ބަޔަކަށް. ނުގަބޫލުގަ މަސައްކަތް ކުރުވީ. އެހެންވީމަތާ ވީޑިއޯ އާ ފޮޓޯ ނަގާފައި މީހުންނަށް ފޮނުވާނީ.ކުރީގެ މެމްބަރު ޔައުގޫބް އަބްދުﷲ
ހަވަރުބެރުގައި ވާހަކަދައްކަވަމުން އެމްޑީޕީގެ ޤައުމީ މަޖިލީހުގެ މީދޫ ދާއިރާގެ ރައީސް މަރިޔަމް ނިއުމާ ވިދާޅުވީ އެފަދަ ކަންކަމަކީ ކަމާއި ގުޅުން ހުރި އިދާރާތަކުގެ ވެރިންނަށް ނޭނގި ހިނގާ ވަރަށް ވުރެ މާ ބޮޑެތި ކަންކަން ކަމަށެވެ. އެއީ ކިހާވަރެއްގެ ކަމެއްކަން ވެރިންނަށް އެނގޭނެ ކަމަށާއި އެފަދަ ޖަރީމާތައް ހިންގާފައި ވަނީ ދައުލަތުގެ އެކި ފަންތީގެ އިސްވެރިންގެ ބައިވެރިވުމާއި އެކު ރޭވިގެން ކަމަށް ނިއުމާ ވަނީ ވިދާޅުވެފައެވެ. ފޯރމުތައް އިތުރުކުރުމުގެ މަޝްރޫޢު އެއް ކުރިއަށް ގެންދާކަމަށް ބުނެ ރައީސް ޑރ.މުހައްމަދު މުއިއްޒު އިސްވެ މަސައްކަތްތަކެއް ކުރައްވާކަން ޕީއެންސީ އިން ހާމަކުރައްވާފައިވާ އިރު އެ މަސައްކަތުގައި އިސްކޮށް ހޯމް މިނިސްޓަރ އިހުސާން އުޅުއްވާކަން އެ ބޭފުޅުން އަމިއްލަފުޅަށް އާއްމުންނާއި ހިއްސާކޮށްފައިވާކަމަށް ނިއުމާ ވިދާޅުވިއެވެ. އެހެންކަމުން އެ މަރުހަލާގެ ތެރޭގައި އެތައް ހާސްވަގު ފޯމުތަކެއް ފުރާ އިލެކްޝަނަށް ހުށަހެޅުމުން އެކަމުގެ ފުރިހަމަ ޒިންމާ ސަރުކާރުން ނަގަން ޖެހޭނެ ކަމަށް ޤަބޫލުކުރައްވާ ކަމަށް އޭނާ ވަނީ ވިދާޅުވެފައެވެ.
ޕާޓީގެ މެންބަރުންގެ ދަފުތަރު އިތުރުކުރުމަށްޓަކައި ދިވެހިރައްޔިތުންގެ ޒާތީ މައުލޫމާތުން ވައްކަންކުރި ކަމަށް ތުހުމަތުކުރެވުމާއި އެކު އެކަމުގެ ކަންބޮޑުވުންތައް ވަނީ އިންތިހާއަށް އިތުރުވެފައެވެ.
