ސަރުކާރު ހިއްސާވާ ކުންފުނިތައް މެދުވެރިކޮށް މުލިއާގެ އަށް ފައިސާ ހޯދާ ކަމަށާއި އެ ފައިސާ ހޯދަނީ މަޖިލިސް މެމްބަރުންނަށް ދިނުމަށްޓަކާ ކަމަށް ރައްޔިތުންގެ މަޖިލީހުގެ ދާންދޫ ދާއިރާގެ ކުރީގެ މެމްބަރު ޔައުޤޫބް އަބްދުﷲ ވިދާޅުވެއްޖެއެވެ.
ޔައުގޫބް އެފަދައިން ވިދާޅުވި ރާއްޖެޓީވީގެ ފަލަސުރުޚީ ޕްރޮގްރާމްގައި ވާހަކަދައްކަވަމުންނެވެ.
ފެނަކަ ކޯޕަރޭޝަން ހިންގުމަށް ހުރި ދަތިތައް ހާމަކޮށް، ފެނަކައިގެ ކުރީގެ އެމްޑީ މުއާޒް މުހައްމަދު ރަޝީދު ވަނީ ހޯމަ ދުވަހު އިސްތިއުފާދެއްވާފައެވެ. ޔައުގޫބް ވިދާޅުވީ މުއާޒް އިސްތިއުފާދެއްވާފައި ވަނީ ރައީސް އާއި ސަރުކާރުގެ ޕްރެޝަރ ބޮޑުވެގެން ކަމަށް ފާހަގަކުރެވޭ ކަމަށެވެ. މުއާޒްގެ އިސްތިއުފާ އާއި މެދު ވާހަކަދައްކަވަމުން ޔައުގޫބް ވަނީ ކުންފުނީގެ ހާލަތާއި ނުބައްދަލު މިންވަރަށް، ކުންފުނީގެ އެމްޑީ އަށް ޕްރެޝަރކޮށްގެން ވަޒީފާ އަށް މީހުން ނަގާކަން މުއާޒްގެ އިސްތިއުފާގެ ސިޓީ އިން ހާމަވާ ކަމަށް ވިދާޅުވެފައެވެ.
ކުންފުނިތައް ހިންގަން ޖެހެނީ ވަކި ޤަވާއިދުތަކަކާއި އުސޫލުތަކެއްގެ ތެރެއިންކަން ފާހަގަކޮށް ޔައުގޫބް ވިދާޅުވީ ސަރުކާރު ހިއްސާވާ ކުންފުނިތަކަކީ ރައްޔިތުންގެ ކުންފުނިތަކެއް ކަމަށެވެ. އެހެންކަމުން އެ ކުންފުނިތައް ހިންގުމުގައި ވެސް ރައްޔިތުންނަށް އަމާނާތްތެރިވާން ޖެހޭ ކަމަށް އޭނާ ވަނީ ވިދާޅުވެފައެވެ. ޔައުގޫބު ވަނީ ހުރިހާ ކުންފުންޏެއް ވެސް ވީހާވެސް ރަނގަޅަށް ހިންގުމަކީ އެ ކުންފުނިތަކަށް އައްޔަންކުރާ އެމްޑީންގެ ޒިންމާ އެއް ކަމަށް ވިދާޅުވެފައެވެ. އެހެންނަމަވެސް ސަރުކާރުން މަސައްކަތް ކުރަނީ ކޮރަޕްޝަންގެ ކަންކަން ހިންގުމުގަ ކުންފުނިތައް ވެސް ހިއްސާކުރަން ކަމަށް ޔައުގޫބް ވިދާޅުވިއެވެ.
އަޅުގަނޑުމެންނަށް މައުލޫމާތު ލިބޭ ގޮތުގައި މުލިއާގެ އަށް ފައިސާ ހޯދަން އެބަ ޕްރެޝަރ ކުރޭ. ވެދާނެ އެއީ ކަމަށް އިސްތިއުފާދެއްވި ސަބަބަކީ. އަދި ހަގީގީ މާނައިގައި މަސައްކަތް ކުރާނެ މާހައުލެއް އެމްޑީންނަށް ނެތްކަން އެބަ އެނގޭ މި އިސްތިއުފާގެ ސިޓީ އިން.ރައްޔިތުންގެ މަޖިލީހުގެ ދާންދޫ ދާއިރާގެ ކުރީގެ މެމްބަރު ޔައުޤޫބް އަބްދުﷲ
މި ހުރިހާ ކޮރަޕްޝަންގެ މައްސަލަތައް ފެންމަތިވެގެން ދާއިރު މަޖިލިސް އޮތީ ހަނު ކަމަށާއި އެއީ ބަލައިގަނެވޭނޭ ކަމެއް ނޫން ކަމަށް ޔައުގޫބް ވަނީ ވިދާޅުވެފައެވެ. ޔައުގޫބް ވިދާޅުވި މިފަދަ މައްސަލަތައް ހައްލުކުރުމުގައި މަޖިލީހުގެ ދައުރު ވަރަށް މުހިންމު ކަމަށް ފާހަގަކުރައްވާފައެވެ.
އިތުރަށް ވާހަކަދައްކަވަމުން ޔައުގޫބް ވަނީ ސަރުކާރުގެ އެމްޑީން ލައްވާ ގޯސްތައް ހަދާ ބޭފުޅަކީ ސީދާ ރައީސް ޑރ.މުހައްމަދު މުއިއްޒު ކަމަށް ވިދާޅުވެފައެވެ. އިންތިހާއަށް މުވައްޒަފުން ނެގުމާއި، އުސޫލުން ބޭރުން ކަންކަން ކުރުން އިންތިހާ އަށް އާއްމުވެފައިވާ ކަމަށް ޔައުގޫބް ވިދާޅުވިއެވެ. އަދި ސަރުކާރުގެ ނުފޫޒު އެމްޑީންނަށް ފޯރާ މިންވަރު ކުންފުނިތަކުގެ ވެރިންގެ ވާހަކައިންވެސް ހާމަވާ ކަމަށް ޔައުގޫބް ވަނީ ވިދާޅުވެފައެވެ.
އިސްތިއުފާގެ ސިޓީގައި މުއާޒް ވަނީ ފުރިހަމައަށް މަސްޢޫލިއްޔަތު އަދާކުރުމަށް މަސައްކަތް ކުރެއްވި ނަމަވެސް ގިނަ ގޮންޖެހުންތަކާއި ކުރިމަތިލާން ޖެހިފައިވާ ކަމަށް ވިދާޅުވެފައެވެ. ލިބޭ އާމްދަނީން ކުންފުނި ހިންގާ މިންވަރަށް އާމްދަނީ ނުލިބޭ ކަމަށް އޭނާ ވަނީ ފާހަގަކުރައްވާފައެވެ. އަދި އެ ކުންފުނި އޮތީ މާލީ ގޮތުން ދަށް ހާލަތަކަށް ވެއްޓިފައި ކަމަށް ވަނީ ވިދާޅުވެފައެވެ. ކުންފުންޏަށް ބޭނުންވާ އަދަދަށް ވުރެ ކުންފުނީގެ މުވައްޒަފުން އިތުރުކުރަން ޖެހިފަވާތީ އެކަމުގެ ކަންބޮޑުވުން ވެސް މުއާޒް ވަނީ ހިއްސާކުރައްވާފައެވެ.
