މާލޭ މޭޔަރު ކަމަށާއި ހުސްވެފައިވާ ކައުންސިލް ގޮނޑިތަކަށް ކުރިމަތިލުމުގެ ފުރުސަތު ހުޅުވާލައިފި
މާލެ ސިޓީގެ 4 ގޮނޑިއާއި ރަކީދޫ ކައުންސިލަށް މެންބަރުން އައްޔަން ކުރަން ވަނީ ނިންމާފައި
އިލެކްޝަންސް ކޮމިޝަން
މާލެ ސިޓީ މޭޔަރު ކަމަށާއި މިވަގުތު ހުސްވެފައިވާ ގޮނޑިތަކަށް ކުރިމަތިލުމުގެ ފުރުސަތު އިލެކްޝަންސް ކޮމިޝަން (އީސީ) އިން ހުޅުވާލައިފިއެވެ.
އީސީން މި ފުރުސަތު ހުޅުވާލާފައިވަނީ މިދިޔަ އަންގާރަ ދުވަހުން ފެށިގެން 13 ޑިސެމްބަރު 2023 ވާ ބުދަ ދުވަހުގެ މެންދުރު 2:00 އާ ހަމައަށެވެ. އެގޮތުން، ފަސް ގޮނޑިއަކަށް ވާދަ ކުރުމުގެ ފުރުސަތު އެ އިދާރާއިން މިހާރު ވަނީ ހުޅުވާލައިފައެވެ.
މިވަގުތު ކައުންސިލްތަކުގައި ހުސްވެފައިވާ ދާއިރާތަކުގެ ތެރޭގައި މާލޭގެ މޭޔަރާއި މާލެ ސިޓީ ކައުންސިލްގެ މާފަންނު ދެކުރު ދާއިރާ އާއި މެދުހެންވޭރު ދާއިރާ އާއި އަންހެނުންނަށް ހާއްސަކޮށްފައިވާ ހެންވޭރު ދެކުނު ދާއިރާ އަދި ވ. ރަކީދޫ ކައުންސިލުގެ އަންހެން މެންބަރު ހިމެނެއެވެ.
މި ކައުންސިލަރުން އައްޔަން ކުރުމަށް ބާއްވާ ބައި އިލެކްޝަން 13 ޖެނުއަރީ 2024 ގައި ބޭއްވުމަށް އިލެކްޝަންސް ކޮމިޝަނުން ވަނީ ތާވަލު ކޮށްފައެވެ. އެގޮތުން، އެ ދުވަހުގެ ހެނދުނު 8:00 ން ހަވީރު 4:00 އަށް ވޯޓުލުން ކުރިއަށްދާއިރު އިންތިޚާބުގެ ރަސްމީ ނަތީޖާ 15 ޖެނުއަރީގައި އިއުލާން ކުރާނެ ކަމަށް އީސީން ބުނެއެވެ.
ލޯކަލް ކައުންސިލްތަކުގެ އިންތިޚާބުގެ ޤާނޫނުގެ 12 ވަނަ މާއްދާގެ (ހ) ގައި ބަޔާންކޮށްފައިވާގޮތަށް އެ އިންތިޚާބަށް ކުރިމަތިލާ މީހެއްގައި ކިބައިގައި ފުރިހަމަވާން ޖެހޭ ޝަރުތުތަކެއް ހިމެނެއެވެ. މީގެ ތެރޭގައި:
އީސީން ބުނީ ކައުސިލަރުންނަށް ކުރިމަތިލާ ފަރާތްތަކުން ހުށަހަޅަން ޖެހޭ ދަރަނީގެ ރެކޯޑާއި، ކުށުގެ ރެކޯޑަކީ 27 ނޮވެންބަރު 2023 ގެ ފަހުން ސާފުކޮށްފައިވާ ރެކޯޑަކަށް ވާންޖެހޭނެ ކަމަށެވެ. އަދި އަންހެނުންނަށް ހާއްސަކޮށްފައިވާ ދެ ގޮނޑިއަށް ކުރިމަތިލެވޭނީ ލޯކަލް ކައުންސިލްތަކުގެ އިންތިޚާބުގެ ގަވާއިދާ އެއްގޮތަށް އަންހެނުންނަށް އެކަނި ކަމަށް ވެސް އެ އިދާރާއިން ބުނެއެވެ.
ޖެނުއަރީ 13ގައި ބާއްވާ ބައި އިލެކްޝަނުގައި އެންމެ ބޮޑު ވާދަވެރިކަމެއް ފެންނަނީ މާލޭގެ މޭޔަރު ކަމަށެވެ. ބައެއް ސިޔާސީ ޕާޓީތަކުވަނީ އެ ގޮނޑިއަށް އެ ޕާޓީތަކުގެ ޓިކެޓުގައި ވާދަކުރާނެ ކެންޑިޑޭޓުން ވެސް ކަނޑައަޅައިފައެވެ. އެހެން ބައެއް ޕާޓީތަކުން ވަނީ ޓިކެޓަށް ވާދަކުރުމުގެ ފުރުސަތު މިހާރު ހުޅުވާލައިފައެވެ.
