މާލެ ސިޓީ މޭޔަރުގެ މަގާމާއި ކައުންސިލް ބައި އިލެކްޝަނުގައި ވާދަކުރުމުގެ ފުރުސަތު މޯލްޑިވިއަން ޑިމޮކްރެޓިކް ޕާޓީ (އެމްޑީޕީން) ހުޅުވާލައިފިއެވެ.

އެ ޕާޓީން އަންގާރަ ދުވަހު ކުރި އިއުލާނެއްގައި ބުނީ މާލެ ސިޓީ ކައުންސިލްގެ މޭޔަރުގެ މަގާމަށާއި، މާލެ ސިޓީ ކައުންސިލްގެ މާފަންނު ދެކުނު ދާއިރާ، މެދު ހެންވޭރު ދާއިރާ، އަދި ހެންވޭރު ދެކުނު ދާއިރާގެ ކައުންސިލް މެންބަރުކަމަށް އިންތިޚާބު ކުރުމަށް ބާއްވާ ބައި-އިލެކްޝަންގައި، އެ ޕާޓީގެ ފަރާތުން ކުރިމަތިލުމަށް ޝައުގުވެރިވާ ފަރާތްތަކަށް އެ ފުރުސަތު މިހާރު ހުޅުވިފައިވާ ކަމަށެވެ. އެގޮތުން އެކަމަށް އެދެން ގޫގަލް ފޯމު ފުރިހަމަ ކުރުމަށްފަހު ހުށަހެޅުމަށް ވަނީ އެދިފައެވެ.

އެމްޑީޕީން މި ފުރުސަތު ހުޅުވާލާފައިވަނީ 1 ޑިސެމްބަރު ވާ ހުކުރު ދުވަހުގެ ހަވީރު 4:00 އާ ހަމައަށެވެ.

މާލޭގެ މޭޔަރުގެ މަގާމު ހުސްވެފައިވަނީ އެ މަގާމުގައި ހުންނެވި ޑރ. މުޙައްމަދު މުއިއްޒު ރިޔާސީ އިންތިޚާބު ކާމިޔާބު ކުރައްވައި ރައީސް ކަމާ ހަވާލުވެވަޑައިގެންނެވުމުންނެވެ. އެހެން ބައެއް ދާއިރާތަކުގެ ގޮނޑިތައް ހުސްވީ ސަރުކާރުގެ އެކި މަގާމުތަކަށް އެ ބޭފުޅުން އައްޔަން ކުރެއްވުމާ ގުޅިގެންނެވެ.

މާލެ ސިޓީ ކައުންސިލުގައި ހުސްވެެފައިވާ ގޮނޑިތަކަށް މެންބަރުން ހޮވުމަށް ބާއްވާ ބައި އިލެކްޝަން 13 ޖެނުއަރީ 2024 ގައި ބޭއްވުމަށް އިލެކްޝަންސް ކޮމިޝަނުން ވަނީ ނިންމާފައެވެ. އެ ގޮނޑިތަކަށް ކުރިމަތިލައްވަން ބޭނުންވާ ފަރާތްތަކަށް 13 ޑިސެމްބަރު 2023 ގެ މެންދުރު 2:00 ގެ ކުރިން ފޯމު ހުށަހެޅުމަށް އީސީން ވަނީ ފުރުސަތު ހުޅުވާލައިފައެވެ.